भांगरभूंय | प्रतिनिधी
भांगरभूंय । प्रतिनिधी
पणजीः चवथी निमितान वेगवेगळे कडेन आयोजीत केल्ल्या स्वयंपूर्ण बाजारांनी 20 लाख 37 हजार रुपयांची उलाढाल जाली. नियोजन आंकडेवारी आनी मोलावणी विभागाचो संचालक विजय सक्सेना हांणी पत्रकारांक ही म्हायती दिली.
ह्या बाजारांनी गांवगिऱ्या वाठारांतल्या 372 बायलांनी आपली पारंपरीक उत्पादना विकपाक दवोरिल्लीं. दरेका बायलेक सरासरी 5 ते 10 हजार रुपये मेळ्ळे. पयले फावट आयोजीत केल्ल्या ह्या बाजार उपक्रमाक अपेक्षे परस चड प्रतिसाद मेळ्ळो अशें सक्सेना हांणी सांगलें.
गोंयांक चालीक लायिल्ल्या स्वयंपूर्ण गोंय संकल्पनेची दखळ देशभरयां घेतली. वेगवेगळ्या राज्यांतले अधिकारी गोंयांत येवन हे संकल्पनेची म्हायती घेवपाक इत्सूक आसात. हालींच गुजरातचे कांय अधिकारी राज्यांत येवन गेले. तांणी स्वयंपूर्ण इश्टांकडेन संवाद सादलो अशी म्हायती तांणी दिली.
स्वयंपूर्ण गोंय 2.0क रोखडीच सुरवात करतले, दरेका गांवांत सरकारी अधिकारी पंचायत वाठारांत सरकारी येवजण्यांची म्हायती दितले. सरकार तुमच्या दारांत ह्या उपक्रमाक परत सुरवात करतले. ते खातीर 500 अधिकाऱ्यांक प्रशिक्षण दिलां. दिव्यांग, ज्येश्ठ नागरीक, राण बायलो हांचेर विशेश ल7 दितले. तांच्या मेरेन पावपा खातीर कांय कार्यावळींची आखणी करतले, पंचायत कार्यालयांत तांका येवप शक्य जायना जाल्यार आमी तांचे मेरेन वचपाचो यत्न करतले अशें सक्सेना हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
