भांगरभूंय | प्रतिनिधी
पॅरीस ऑलिम्पीक सर्तीचो सवो दीस भारता खातीर पदकाचो थारलो आसलो तरी बाकीच्या खेळांनी निर्शेणीच हाताक लागली. महाराष्ट्राच्या स्वप्नील कुशाळेन नेमबाजींत विक्रमी कांश्या पदक जिखलें. पूण, बॉक्सिंगेंत निखत जरीन आनी बॅडमिंटनांत फॉर्मांत आशिल्ले सात्वीकसाईराज रंकीरेड्डी आनी चिराग शेट्टी हे जोडयेक आपली बिटकी कवळची पडली.
दादल्यांच्या हॉकी पंगडाची जैताची धांव लेगीत काळ थांबली. जाल्यार लक्ष्य सेनान भारताच्याच खेळगड्याक हारोवन क्वॉर्टरफायनलींतली सुवात निश्चीत केली.
———-
सात्वीक-चिरागाचे खर यत्न
भारताची पयल्या क्रमांकाचे सात्वीकराईराज रंकिरेड्डी आनी चिराग शेट्टी हे बॅडमिंटन जोडयेक हारीचो धपको बसलो. मलेशियाचे चिआ आरोन आनी सोह वुई यीक हांणी पुनरागमन करतना भारताचे जोडयेक 13-21, 21-14 आनी 21-16 अशा फरकान हारयली.
लक्ष्य सेन आड एच एस प्रणॉय
दादल्यांचे एकोड्या गटांतले बॅडमिंटन सर्तींतले उप उपांत्यपूर्व फेरयेंतली मॅच लक्ष्य सेन आनी एच एस प्रणॉय ह्या भारतीय खेळगड्यां मदीं जाली. ताका लागून एक भारतीय खेळगडो सर्तींतल्यान भायर पडटलो हें निश्चीत जाल्लें. लक्ष्य सेनान पयली गेम 21-12 अशा फरकान जिखून आपलो फॉर्म कायम राखलो. दुसरे गेमींत लक्ष्य सेनान आनीक बरें प्रदर्शन करतना 14-6 अशें जैत जोडून फुडले फेरयेंत सुवात मेळयली.
———–
भारताची हॉकींतली जैताची धांव थांबली
भारताच्या दादल्यांच्या हॉकी पंगडाची जैताची धांव काल थांबली. बळिश्ट बॅल्जियमाक खर आव्हान दिवन लेगीत भारताक 2-1 अशी हार घेवची पडली. अभिषेकान मॅचीच्या 18व्या मिनटाक गोल करून भारताक आघाडी मेळोवन दिल्ली. पूण, तिसऱ्या आनी चवथ्या क्वॉर्टरांत बॅल्जियमांत पुनरागमन केलें. 33व्या मिनटाक स्टॉकब्रॉक्स थिबियू आनी 44व्या मिनटाक डोहमॅन जॉनान गोल करून बॅल्जियमाक 2-1 अशी आघाडी मेळोवन दिली. भारतान अखेर मेरेन बरोबरी करपाचो खर यत्न केलो. पूण, ताच्या वाट्याक अपेस आयलें. भारताची फुडली मॅच आयज ऑस्ट्रेलिया आड जातली.
चलपाचे सर्तींत भारताच्या पदरांत निरशेणी
दादल्यांच्या 20 किमी चलपाचे सर्तींत भारताच्या विकास सिंग (1ः22ः36 मि.), परमजीत सिंग बिस्त (1ः23ः48 मि.) हांकां वळेरेन 30वे आनी 37वे सुवातेर समाधान मानचें पडलें. आकाशदीप सिंगाक सर्त पूर्ण करपाक जमली ना. बायलांच्या 20 किमी चलपाचे सर्तींत प्रियांका 41वे सुवातेर उरली.
बॉक्सर निखत झरीन हारली
भारताची बॉक्सर निखत झरीन हिचें लेगीत आव्हान सोंपलें. तिका चीनाचे वू यू हिणें 0-5 अशा फरकान सहज हारयली. हे हारीक लागून निखत झरीनाचें पदक जिखपाचें सपन भंगलें.
सेलिगेंत विष्णू सरवान 10वे सुवातेर
भारताचो विष्णू सरवानाक पयले सर्तीचे 10वे सुवातेर समाधान मानचें पडलें. पूण, दुसरे सर्तींत तो 44 खेळगड्यां मदीं 34वे सुवातेर आयलो. पॅरीस ऑलिम्पिकांत भारताचें प्रतिनिधी करपी तो एकोडो नौकानयन खेळगडो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
