स्वदेशी म्हालाक प्राधान्य दिवचें

भांगरभूंय | प्रतिनिधी

मुख्यमंत्र्या हस्तुकीं सेवा पखवाडा कार्यावळीचें उक्तावण

पणजी : प्रधानमंत्री नरेंद्र मोदी हांणी मध्यप्रदेशांत जाल्ल्या भाशणांत स्वदेशीचो नारो दिला. गोंयचे वेपारी तशेंच गिरायकांनीय स्वदेशी म्हालाक प्राधान्य दिवचें, असो उलो मुख्यमंत्री डॉ. प्रमोद सावंत हांणी मारलो. बुधवारा पणजे आयोजीत केल्ले पत्रकार परिशदेंत ते उलयताले. त्यान पयलीं सेवा पखवाडा कार्यावळीचें उक्तावण जालें. हे कार्यावळीक विवीध बायलां स्वयं सहाय्यता गटांचो भोवमान केलो.
प्रधानमंत्री मोदी हांणी भाशणांत सांगिल्ले प्रमाण आत्मनिर्भर तशेंच स्वयंपूर्ण भारत करपा खातीर स्वदेशीचो पुरस्कार करप गरजेचें. गोंयच्या वेपार्‍यांनी आपूण स्वदेशी मालाची विक्री करता हें अभिमानान सांगपाक जाय. सदच्या वापरपाच्या वस्तू पसून ते लक्झरी वस्तूं मेरेन सगल्यो स्वदेशी आसच्यो. स्वदेशी वस्तूंत लोकांचे कश्ट आसतात. गिरायकांनीय स्वदेशी वस्तू विकत्यो घेतल्यार हाचो फायदो देशांतल्याच लोकांक जातलो, अशें मुख्यमंत्र्यान मुखार म्हणलें.
तशेंच आयज मोदींनी बायलां खातीर विवीध येवजण्यांचें उक्तावण केलां. हातुंतली ‘स्वस्थ नारी सशक्त परिवार योजना’ खाला राज्यभरच्या मुळाव्या भलायकी केंद्रांत बायलां खातीर फुकट भलायकी तपसणी शिबिरां आयोजीत करतलीं. तशेंच फुकट उपचार आनी वखदांय दितले. ‘मातृ वंदना’ येवजणे प्रमाण पयलीं चलयेक जल्म दिवपी आवयक 5, जाल्यार दुसरेंय चलयेक जल्म दिवपी आवयक 6 हजार रुपया दितले. गोंयच्या बायलांक हाचो लाव मेळिल्ल्याचें तांणी मुखार सांगलें.

बायलांक 62 कोटींचीं रिणां वाटलीं
मुख्यमंत्र्यांनी सांगलें, ग्रामीण विकास खात्या वतीन आयज बायलां स्वयं सहाय्यता गटांक 62 कोटी रुपयांचें रीण वाटलां. आयज मेरेन राज्यांतल्या 50 हजार बायलांक 350 कोटींचें रीण दिलें. तशेंच गाडी विकत घेवपा खातीर 2.1 कोटी आनी हेर निधीच्या स्वरूपांत 6 कोटी रुपया दिले.

डबल इंजिनाक लागूनच गोंयची उदरगत
मुख्यमंत्र्यान मुखार म्हणलें, फाटल्या कांय वर्सांनी गोंयांत म्हत्वाच्या सुविधां सयत हेर मळांचेर उदरगत जाल्या. गोंयांत ह्यान पयलीं जावंक नाशिल्ली इतली उदरगत फाटल्या 11 वर्सांनी जाल्या. केंद्र आनी राज्यांत भाजपाचें डबल इंजिन सरकार आशिल्ल्यानूच ही उदरगत शक्य जाल्या.