भांगरभूंय | प्रतिनिधी
एखादो मनीस विचारांनी तटस्थ आसलो जाल्यार तो आपूण पळयिल्लें सपन साकार करपाक शकता. अमूक अश्या वेवसायांत आशिल्लो मनीस जेन्ना ताच्या वेवसाया भायर पावल दवरून हेर दुसरें कितें करपाचें येवजीता तेन्ना हें कशें काय शक्य आसा, असो लोकांच्या मनांत जायत्या फावटी विचार येता. पूण, आपल्या नोकरी, वेवसायांतल्यान भायर सरून सपन पुराय करप हो दरेकट्याचो हेतू आसता.
शिक्षणीक मळार वावर करपी म्हणलें उपरांत आमच्या दोळ्यां सामकार पयलो मनीस येता तो शिक्षक. आयज जर हांवें तुमकां सांगलें एका शिक्षकाचे सपन फॅशन मॉडेल जावपाचें आशिल्लें आनी ताणें तें पुराय लेगीत केलां जाल्यार तुमची प्रतिक्रिया कितें आसतली? घडये तुमी विस्वास दवरीत वा ना दवरीत. पूण हें सत्य. पणजेच्या पीपल्स हायस्कूलांत दिव्यांग भुरग्यांचे शिक्षक म्हणून काम करपी रूपेश गडेकार हांणी हालींच गोंयांत जाल्ल्या ग्लेम आनी एलीगन्स आयोजीत ‘मिस्टर इंडिया’ सर्तींत जैत जोडलें. तांचे पयली तांणी 2022 वर्सा ‘मिस्टर गोवा’ ही सर्त लेगीत जिखून ट्रॉफी आपल्या नांवार केल्ल्या.
आपूण एक शिक्षक जातलों हाचो हांवें केन्ना विचारूंच करूंक नासलो. म्हाविद्यालयांत आसतना म्हजी रूची कलेच्या क्षेत्रांत चड आशिल्ली. धावे उपरांत हांव फायन आर्ट करतलो हाचो विचार हांवें पयलींच केल्लो, पूण अर्थीक नदरेतल्यान खूब अडचणी येताल्यो. बारावे उपरांत हांवें म्हज्या बापायक सांगलें म्हाका पदवी घेवपाची आसा. पूण पदवेचें शिक्षण घेतना म्हज्या माथ्यार घरची जापसालदारकी सांबाळपाचो वेळ आयलो. हांव खेळां क्षेत्रांत खूब बरो आशिल्लों. पदवी उपरांत हांव खेळान बरो आसा अशें म्हाका खूब जाणांनी सांगलें. ते खातीर हांवे रोखडेंच बीपीएड केलें. सुमार 4 वर्सां उपरांत हांव कामाक लागलों.
म्हाविद्यालयांतल्यान म्हाका मॉडेलिंगाची आवड आशिल्ली. म्हजें सदचें रुटीन सुरू आसता. ताच्या वांगडाच हांव स्वताचेर लक्ष दवरतां. पयलेंच फावटीं जेन्ना हांव ‘मिस्टर’ गोवा सर्तींत वांटेकार जाल्लों तेन्ना म्हाका थंय प्रसाद पानकार हे गोंयचे फामाद फोटोग्राफर मेळ्ळें आनी तांणी म्हाका ‘आपल्याक तुज्या भितर एक मॉडल दिश्टी पडटा’ अशें सांगलें, पूण म्हजे तकलेंत मॉडलिंगे विशी कांयच विचार नासलो. उपरांत हांव तांकां परत एके पार्टेंत मेळ्ळो आनी थंय तांणी परत म्हजी तोखणाय केली. उपरांत ‘हांव फुडल्या वर्सा वांटेकार जातलो आनी जिखून दाखयतलो अशें हांवे तांकां स्वता जावन सांगलें.’ म्हाका ते वेळार 6- 7 म्हयने वेळ आशिल्लो. ह्या काळांत हांवें 73 वयल्यान म्हजें वजन 61 किला मेरेन देवयलें. हांवे म्हजे कुडीचेर खूब कश्ट घेतलें जेन्ना हांव मिस्टर गोवा सर्तींत वांटेकार जावन जैतिवंत जालो, तो म्हजो टर्निंग पाँयट आसलो. थंयच्यान जर हांव मिस्टर गोवा जावपाक शकता जाल्यार मिस्टर इंडिया कित्याक ना, असो विचार करून फुडलें लक्ष्य दवरलें…. आनी म्हजो प्रवास परतून सुरू जालो. ह्या काळार हांव स्वता डायट प्लेन करतालो.
हांवें म्हजी शाळा न्यू गोवा हायस्कूल, म्हापशें उपरांत सरस्वत विद्यालय, सेंट झेव्हयर आनी डाॅन बॉस्को हांगा बी.एडाची पदवी मेळयली. शाळेतल्यान हांवें चित्रकला, नाच आनी अभिनय अशें साबार सर्तींनी वांटेकार जावन इनाम मेळयलां. म्हाका स्वताक हांव आवडटा. मनांत, म्हजें कडेन बरें व्यक्तिमत्व आसा जाल्यार हांव मॉडेलींग कित्याक करपाक शकना अशें आशिल्लें. हांव जे कितें करता तातूंत हांव म्हजे 100 टक्के दितां म्हजे केन्नाच 99.9 टक्के नासता हो म्हज्यातलो एक बरो गूण म्हणूं येता. स्वताचेर विस्वास दवरप हें भोव गरजेचें. हातूंतल्यान म्हजी सुरवात जाली आनी आयज हांव येसस्वी जावंक पावलां. फॅशनी बाबतींत न्हय, पूण म्हाका याद जाता आमच्या शाळेंत सुतार आडनांवाचे शिक्षक आशिल्ले, जे खूब बरें रेखाटण करताले. तांणी म्हाका खूब मार्गदर्शन केलां. जर म्हाका फुडाराक शाळेंत वचपाची संद मेळ्ळी जाल्यार नक्कीच हांव म्हजे शाळेक भेट दितलो.
मिस्टर इंडिया खातीर जेन्ना म्हजें नांव जाहीर जालें, तेन्ना जी खोस आशिल्ली ती उतरांनी उक्तावप कठीण. म्हाका इनाम मेळ्ळे उपरांत हांवें सगळ्यांत पयलीं म्हज्या आवयक फोन करून कळयलें. कारण तिच्या मुखा वयलो हांसो पळोवप हे म्हजे खातीर खरें जैत आशिल्लें. आमच्या आवय- बापायन साबार त्रास सोंसून आमकां ल्हानांतल्यान व्हड केलां आनी हें रीण आमी केन्नाच फेडपाक शकना. मिस्टर गोवा जाले उपरांत हांवें ‘सुरय्या 42’ ह्या द. भारतीय चित्रपटांत ल्हानसो रोल केला, ‘डियर जिंदगी’ सारकें फिल्म करपी फिरोज खान हांच्या एका संगीत आल्बमात लेगीत हांवें काम केलां.
हांव म्हजो ‘वेळ वेवस्थापना’चो पुराय उपेग आनी वापर करतां. सांगचें म्हळ्यार सकाळी एक ग्लास उदक आनी एक ब्लॅक कॉफी हातूंत म्हजो दीस सुरू जाता, स्वता जेवण करप, शाळेंत वचप, दनपरां घरा आयले उपरांत कसलो शुट आसल्यार थंय वचप. सांजवेळा जीम आनी डान्स क्लास, त्या भायर योगा मेडीटेशन, गीतां आयकप, प्रेरणादायी व्हिडियो पळोवप… कारण शेवटाक भायल्यान कितलीय प्रेरणा मेळ्ळी जाल्यार लेगीत तुमच्या भितरलो आत्मविस्वास आसप गरजेचो आसता.
ऋतिक रोशन हो म्हजो आदर्श. आपले भितरली इत्सा वेवसायात रुपांतरीत करात. तुमचें जिवीत फुकट घालूं नाकात. स्वताचेर विस्वास दवरात आनी सगळ्यांत पयली तुमका जिवीतांत कितें करपाक आवडटा, ताका वेवसायेचे नदरेन पळयात. अशें केल्यार तुमी येसस्वी जावंक पावतले. आपल्यो इत्सा पुराय करपाक जाय जाल्यार स्वताचेर विस्वास दवरात, स्वताच स्वताक शिस्त लायात, अशें मिस्टर इंडिया जैतिवंत रूपेश गडेकार हांणी सांगलें. तांकां फुडले वाटचाली खातीर शुभेत्सा.
विष्णू नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
