भांगरभूंय | प्रतिनिधी
चिंतन – 25
आमी बरे आसात काय? आमचें चारित्र्य शुद्ध आसा काय? हाची खरी जाप भायलो कोणूच दिवंक शकना. तें आमच्या मनाच्या गाभाऱ्यांत — आमच्या चित्ताच्या आरशांत- सदांच दिसता. ताकाच लागून तुकोबा म्हणटात –
पात्र शुद्ध चित्त ग्वाही l
न लगे कांहीं सांगणें ll
1970 च्या दशकांत अमूल संघटना वाडीचे तेंगशेर आशिल्ली. लाखांनी शेतकार हे संस्थेचेर आदारून आशिल्ले. एक दीस अमुलाची व्हड विदेशी कबलात जावपाची शक्यताय आशिल्ली. ती जाल्ली जाल्यार हे संस्थेक व्हड फायदो जावपाचो, आनी देशांतल्या दुदाच्या उत्पादनांत इतिहासीक वाड जावपाची.
कबलातीचे चर्चे वेळार विदेशी प्रतिनिधीन अमूलाचे मुखेली डॉ. वर्गिस कुरियन हांकां खाजगी भेटीची विनवणी केली. हॉटेलाचे कुडींत त्या मनशान मेजाचेर एक फायल दवरली. फायलींत कबलातीच्यो अटी आशिल्ल्यो — आनी तातूंत एक “गुपीत” पान आशिल्लें, तातूंत व्हडली “कमिशन” रक्कम बरयिल्ली. अट आशिल्ली — ही रक्कम स्विकारात आनी कंत्राट तुमकां रोखडेंच मेळटलें.
त्या वेळार इतली व्हडली रक्कम स्विकारिल्ली जाल्यार डॉ. कुरियन हांची वैयक्तीक जीण सुरक्षीत जावपाची. घडये कोणाकूच हो वेव्हार कळचो नाशिल्लो. पूण तांणी तो कागद पळोवन शांतपणान फायल फाटीं धुकल्ली आनी सांगलें —
“ही रक्कम म्हजे खातीर न्हय. हांव म्हज्या देशांतल्या शेतकारांचो प्रतिनिधी, आनी हे पयशे तांचेच. हांव ताका हात लावचो ना.”
हो प्रस्ताव खरपणान न्हयकारलो. ही कबलात घडये उसरां जाल्ली आसूं येता, पूण ती पुराय पारदर्शक पद्दतीन जाली. उपरांत ताच्या वांगड्यांनी म्हणलें — “त्या दिसा आमकां कळ्ळें की अमूल ही फकत दूद विकपी कंपनी न्हय, पूण प्रामाणीकपणाचे प्रतीक.”
चित्ताची गवाय कित्याक म्हत्वाची? आमी चुकीचें वागल्यार संवसार घडये विसरूं शकता, पूण आमचें मन विसरना. उरफाटें जेन्ना आमी योग्य काम करतात तेन्ना मन शांत उरता, सुस्त न्हीद लागता आनी मुखार जियेवपाची उर्जा वाडटा.
भायली तोखणाय तात्पुरती आसता, पूण आमच्याच मनाची गवाय कायमस्वरूपी आसता. ती खात्रेन मेळोवपाक जाय जाल्यार केन्ना केन्ना फायदे सोडचे पडटात, वेळ वगडावचो पडटा आनी एकट्यान उबें रावचें पडटात.
पूण जेन्ना आमी रातच्या वेळार उशार तकलीचेर दवरून मना कडेन उलयतात आनी तें शांतपणान हांसता — मागीर आमकां कळटा की आमी खऱ्या अर्थान जिखल्यात.
– हभप देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
