भांगरभूंय | प्रतिनिधी
रेवा, खबरां संस्था: मध्य प्रदेशांतल्या भोपाळांत रक्ताच्या नात्याचेर प्रस्न निर्माण करपी घडणूक घडल्या. हांगा एका १३ वर्सां पिरायेच्या भुरग्यान स्वताचेच भयणीचेर बलात्कार करून तिका मारून उडयली. धक्को दिवपी गजाल म्हळ्यार मेल्ली चली फकत ९ वर्सां पिरायेची आसली आनी तिच्याच कुटुंबान तिका मारपी तिच्या भावाक वाचवपाचो यत्न केलो. ही विचित्र घडणूक मध्य प्रदेशांतल्या रेवा हांगा घडली. ह्या प्रकरणांत फाटल्या तीन म्हयन्यांत ५० परस चड डीएनए नमुने घेतल्यात. मरण आयिल्ले चलयेचेर तिच्या व्हडल्या भावानूच बलात्कार केला हें वैजकी अहवालांतल्यान स्पश्ट जालां.
तीन म्हयने लिपोवन दवरिल्लो गुन्यांव
ह्या १३ वर्सां पिरायेच्या भुरग्याचे कृती विशीं ताची आवय आनी दोन व्हडल्या भयणींक सगळें खबर आशिल्लें. पूण तीं तिगांय ताका वाचवपाचो यत्न करतालीं. पुलिसांनी भुरग्याक ताचे आवय आनी दोन व्हडल्या भयणीं सयत ताब्यांत घेतला.
मोबायलाचेर अश्लील व्हिडियो पळयतालो
चलयेचेर बलात्कार करून जिवेशीं मारली ते राती कडेन आरोपी चलो म्हळ्यार तिचो भाव मोबायलाचेर अश्लील व्हिडियो (पोर्न) पळयतालोे. उपरांत ताणें कुशीक न्हिदिल्ले भयणीचेर बलात्कार केलो. उपरांत तिका मारून उडयली.
अशे सांपडले आरोपी
पुलिसांनी ह्या प्रकरणाची चवकशी सुरू केल्या उपरांत मरण आयिल्ले चलयेक वळखपी ५५ जाणांचे डीएनए नमुने घेतले. पूण मरण आयिल्ले चलयेचे कुडीचेर आशिल्ल्या शुक्राणूं कडेन कोणाचेच डीएनए जुळना जाले. उपरांत पुलिसांचेर आरोपींचो सोद घेवंक जायना असो आरोप कुटुंबांनी केलो. दुबाव येवन पुलिसांनी मरण आयिल्ले चलयेच्या भावाचे डीएनए नमुने घेतले आनी हे नमुने डीएनए कडेन जुळ्ळे. तिच्या भावानूच मरण आयिल्ले चलये वांगडा ही घाणयारी कृती केल्या अशें वैजकी अहवालांतल्यान कळ्ळें. उपरांत ताणें गुन्यांव कबूल केलो. तिणें बापायक सगळें सांगपाची धमकी दिल्ल्यान आपणें भियेवन तिका मारून उडयिल्ल्याचें ताणें सांगलें.
आवय आनी दोनूय भयणींक अटक
चवकशे वेळार आरोपीन आपणें केल्ली कृती आपले आवय आनी दोन व्हडल्या भयणींक सांगिल्ल्याची म्हायती पुलिसांक दिली. ह्या तिगांयनी मेळून आरोपीक लिपोवपाचे कट रचून भावाक बापाय कडल्यान आनी पुलिसां कडल्यान वाटावपा खातीर तीन म्हयने चवकशेक आडमेळीं हाडलीं. ह्या प्रकरणांत पुलिसांनी बलात्कार, खून, पुरावे नश्ट करप ह्या कलमा खाला केस नोंद केल्या. पुलिसांनी चार आरोपींक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
