भांगरभूंय | प्रतिनिधी
म्हापशें, प्रतिनिधी ः स्वताचेच पांच म्हयन्यांचे धुवेचो आवयेन खून केल्लो. ह्या प्रकरणांत बाल न्यायालयान आवय आर्मिंदा डोरा फर्नांडिस हिका जल्मठेप आनी 1.10 लाख रुपया दंडाची ख्यास्त फर्मायल्या. हे संबंदीचो आदेश बाल न्यायालयाचे अध्यक्ष सई प्रभुदेसाय हांणी दिला.
नेमकें प्रकरण कितें?
कोलवाळे पुलिसांनी 14 ऑगस्ट 2022 दिसा गुन्यांव नोंद केल्लो. ते प्रमाण कपेलवाडो- सिरसयच्या पांच म्हयन्यांच्या भुरग्याचो बापूय सुदन गोंडलेकार हे 14 ऑगस्ट 2022 दिसा फांतोडेर सुमार 3.30 वरांचेर भुरग्याक रगतांन भरिल्ल्या एका बास्केटांत घालून कोलवाळे पुलीस स्टेशनांत आयिल्ले. पुलिसांनी रोखडेच ल्हान चलयेक म्हापशें जिल्लो हॉस्पिटलांत व्हेलें, पूण दोतोरांनी तिका पयलींच मरण आयिल्ल्याचें जाहीर केलें. उपरांत हो खूनाचो प्रकार उक्तो जालो. ते उपरांत तेन्नाचे पुलीस उपनिरिक्षक मंदार परब हांणी कागाळ दाखल केल्ली.
ते प्रमाण तेन्नाचे पुलीस निरिक्षक सोमनाथ माजिक हांणी चलयेच्या खून प्रकरणांत आवय-बापायक ताब्यांत घेतले. उपरांत पुलिसांनी आवय आर्मिंदा डोरा फर्नांडिस आनी बापूय सुदन गोंडलेकार हांचे आड भारतीय दंड संहितेच्या कलम 302 आनी गोंय किशोर कायद्याच्या कलम 8 खाला गुन्यांव नोंद केलो. उपरांत पुलिसांनी दोगांयची चवकशी केली तेन्ना तांणी परत- परत आपलो जबाब बदलपाचो यत्न केलो. पुलिसांनी खोलायेन चवकशी केली तेन्ना आर्मिंदा डोरा फर्नांडिस हे आवयन रागान आपले चलयेक लाटणीन मारिल्ले, अशें कळ्ळें. तेन्ना तिका मरण आयिल्ल्याचें कळ्ळें. ही घडणूक उजवाडाक आयले उपरांत पुलिसांनी बापायक सोडलो आनी आवयक अटक केली.
ह्या प्रकरणाचो तपास पुराय जाले उपरांत पुलिसांनी आवय आड 30 साक्षीदारांची साक्ष नोंद करून म्हापशेंच्या पयल्या वर्ग न्यायालयांत 200 पानांचें आरोपपत्र दाखल केलें. हें प्रकरण बाल न्यायालयाच्या अधिकार क्षेत्रांत आशिल्ल्यान ती थंयच हस्तांतरीत जाली. न्यायालयांत सरकारी वकील मिलैना पिंटो आनी थेमा नार्वेकार ह्या दोगांयनी बाजू मांडून पुरावे सादर केले. उपरांत बाल न्यायालयान भुरग्याची आवय आर्मिंदा डोरा फर्नांडिस हिका दोशी थारायली.
ह्या प्रकरणांत बाल न्यायालयान आवय आर्मिंदा डोरा फर्नांडिस हिका भारतीय दंड संहितेच्या कलम 302 (खून) खाला जन्मठेप आनी 10 हजार रुपया दंडाची ख्यास्त फर्मायली. दंड भरूंक ना जाल्यार एक वर्स बंदखण. जाल्यार गोंय बाल कायद्याच्या कलम 8 खाला तीन वर्सां सश्रम कारावास आनी 1 लाख रुपया दंड. दंड भरूंक ना जाल्यार दोन वर्सां सादी बंदखण अशी ख्यास्त फर्मायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
