स्वतंत्र दिव्यांग खातें जातना…

भांगरभूंय | प्रतिनिधी

दिव्यांगांक समेस्तां बराबरीन मुखेल प्रवाहांत हाडपाक मनीसबळ जाय, दिव्यांग चलयो, अस्तुरे पासत खासा विभागय स्थापन करपा खातीर तजवीज करची.

गोंय सरकारान जे उमेदीन राष्ट्रीय खेळां सर्ती 2023 वर्सा घडोवन हाडल्यो, तीच उमेद 2024 वर्साच्या आंतरराष्ट्रीय
पर्पल फेस्तांत दिसली. सरकारांतले मंत्री सुभाष फळदेसाय, दिव्यांगा खातीरचे आयुक्त गुरुप्रसाद पावसकार आनी हेरांनी दिव्यांगांक मोलादीक वेळ दिलो. मुख्यमंत्री डाॅ. प्रमोद सावंत, पर्यटन मंत्री रोहन खवंटे, आमदार डाॅ. चंद्रकांत शेट्ये, केंद्रीय मंत्री श्रीपाद नायक तशेंच हेरांक दिव्यांग फेस्तांतल्यान राष्ट्रीय, आंतरराष्ट्रीय पांवड्यार जाल्ली उदरगत पळोवपाक मेळ्ळी. सरकारान दिव्यांगां खातीर स्वतंत्र खात्याच्या बांदावळीची घोशणा केल्या, रोखडीच ती चालीक लावची. ते आदीं नवनिर्मणेंत वचपी पणजेंतल्या समाज कल्याण संचालनालयाचेर एक नदर मारल्यार बरें जातलें. माथ्या वयलें रिणाचें वजें वाडटना दिव्यांग फेस्त कोट्यांनी पयशे व्हगडावन मनयता म्हणून विरोधी पक्ष फुडारी युरी आलेमांव हांणी सरकाराक खेपलें. दिव्यांग फेस्ताक आयिल्ल्या दिव्यांगां वांगडा कांय खीण ते आशिल्ले? पणजेची, गोंयची भोंवडी केली जाल्यार सरकार खंय उणे पडटा तें अदमासपत्रकी अधिवेशनांत सांगपाक तांकां मेळटलें.
स्मार्ट सीटी जावपा खातीर पणजी तुट्टना, फुट्टना आंतरराष्ट्रीय दिव्यांग फेस्ताचें आयोजन करप सोंपें न्हय. त्या फेस्तांत एक दीस सांजवेळा दोन वरां बशिल्लें, भोंवलें. दिव्यांगांनी घडोवन हाडिल्ली नाच, गितांची कार्यावळ पळयली तेन्ना तें कळ्ळें. नामनेचे गीतकार सुदेश भोसले हांणी कार्यावळींत गितां म्हणलींच ते भायर दिव्यांगांच्या कुशळटायेची तोखणाय केली.
दिव्यांग फेस्तांतल्यान सरकाराक कितें मेळ्ळें ती म्हायती अदमासपत्रकी अधिवेशनांत मेळटलीच, ते म्हायती बराेबरीन दिव्यांगां खातीर कार्यालय खंय, केन्ना सुरू जातलें तेंवूय अचूक कळ्ळ्यार बरें.
दिव्यांगांक वेगळी दिका दाखोवपाचो व्हड वावर प्रधानमंत्री नरेंद्र मोदी हांणी सुरू केल्लो. गोंयांतय त्या वावरांत गुरुप्रसाद पावसकार हांचे वरी भाजपा कार्यकर्ते मना काळजा थावन आसात. दिव्यांगांक लागसारच्यान पळोवपाक, तांचे म्हऱ्यांत बसपाक, तांचे पासत वावुरपाक तांकां अॅड. सतीश सोनक हांणी वाट दाखयिल्ली. गुरुप्रसाद हांची भयणय, घराब्यांतले हेर दिव्यांग शिक्षण, तांकां स्वयंपूर्णते कडेन व्हरपा खातीर रात दीस ओंपून घेवपी.
पर्पल फेस्तांत मंद उजवाडांत दृश्टी नाशिल्ले, उंचायेन मोटवे जल्मतना दोश नाशिल्ले पूण उपरांत भलायकेन शरिरान दिव्यांग जाल्ल्यांची कार्यावळ पळयली. हीं तर आमचे परस बळिश्ट, काळखाकय उजवाड दाखोवपी अशीं उतरां आपसूक ओंठार आयलीं.
अॅड. सतीश सोनक वर्साक एक दोनदां शेजारच्या राज्यांतल्या दिव्यांग संस्थाच्या आलाशिऱ्यान दिव्यांगां खातीर कार्यावळ आयोजीत करताले, कार्यावळींत मंत्री, पत्रकारांकय घुस्पायताले. सतीशा वरी कार्यकर्त्यांनी दिव्यांगां पासत जें कार्य आयजवेर केलां त्या कार्याचो भोवमान फुडारांत जावपाक जाय. आंतरराष्ट्रीय पांवड्या वेल्या पर्पल फेस्तांत शरिरान, मनान दुर्बळ आशिल्ल्यांक शिक्षणाच्या मुखेल प्रवाहांत सगले कडेन हाडपाचें उतर सरकारान दिलां. ते खातीर पर्पल फेस्तांतल्यान पुस्तकांचो एक स्टाॅल आशिल्लो, राजभास कोंकणींतलीं चडशीं अणकारीत पुस्तकां नॅशनल बुक ट्रस्टा वतीन दवरिल्लीं. दिव्यांग आपल्या कुशळटायेंतल्यान, म्हायती तंत्रज्ञान, अभियांत्रिकी, वेवस्थापन, उद्देग, भलायकेच्या तशेंच हेर मळांनी व्हड प्रमाणांत पावल्यात ह्या पर्पल फेस्तांतल्यान कळ्ळें.
दिव्यांगां पासत नव्या साधनांची बांदावळ करपी कंपनींचे स्टाॅलय आशिल्ले. फेस्त केंद्र सरकार तशेंच प्रायोजकांच्या आदारान जालां तेंवूय होलमलें. पर्पल टी शर्टस, पर्पलकॅप्स (तोपयो), खाशेल्या साधनां सयत शारिरीक दिव्यांग नव्या कांपाल वाॅक वे चेर एकलेच भोंवताले, सेल्फीय घेताले. पाणीपुरी, भेळपुरी, पावभाजी, बर्गर्स तशेंच हेर खाणां जेवणाच्या स्टाॅल्सांचेर दिव्यांग जे पद्दतीन वताले, वेव्हार करताले तें पळोवन पर्पल फेस्त हें दिव्यांगांचे न्हयच अशें दिसलें.
पर्पल फेस्तांत आॅफलायन, आॅनलायन पद्दतीन वांटेकार जावपीय आशिल्ले. योग्य मार्गदर्शन वेळार मेळिल्ल्यान सक्षम जाल्ले दिव्यांग, दोळ्यांनी दिसनाशिल्ले देश पांवड्या वेल्या पदांचे सर्तींतले चॅम्पियन्स, मोटव्यांच्या फिल्मस्टायल नाचान पर्पल फेस्त जैतिवंत जालें हें शिंयाळ्या, अदमासपत्रकी अधिवेशनांत मंत्री सांगतले. ह्या फेस्तांतल्यान तांकां मेळिल्ली आत्मीक धादोसकाय तांच्या उतरांतल्यान हेरांक कळची.
पर्पल फेस्तांत दिव्यांगां वांगडा तांचे आवय बापूय, सोयरेय आयिल्ले, तातूंतल्यान पर्यटनय जालें.
पर्पल फेस्त मनोवपी सरकारान वर्सा भितर समाज कल्याण खात्याक आडमेळ्यां विरयत सुवात मेळोवन दिवची. खात्याची मुखेल कचेरी जाण्टी जाल्या, दायज इमारतींतले हे कचेरेचें नवनिर्मणी जावंक शकता? इमारतीच्या लागसारच्या वाठाराचें कितें जातलें? कोण त्या वाठाराचो धनी? विधानसभा अधिवेशनांत जापो मेळत?
दिव्यांगांक समेस्तां बराबरीन मुखेल प्रवाहांत हाडपाक मनीसबळ जाय, दिव्यांग चलयो, अस्तुरे पासत खासा विभागय स्थापन करपा खातीर तजवीज करची. पर्पल फेस्ता वरी आंतरराष्ट्रीय कुशळटाय जात्रेच्या आयोजनाक गोंय तयार आसा अशें अदमासपत्रकी अधिवेशन सांगतलें?
संवसारीक पर्पल फेस्ताची जापसालदारकी घेतना सरकारान आपणाक कितें मेळटलें हें येवजूंकय नासतलें. गोंय हें शांतिकाय, सरबराय सवस्तकायेचें राज्य हें पर्पल फेस्तांतल्यान पर्यटकां मेरेन पावलां. प्रधानमंत्र्या मेरेन तें पावोवन चडांत चड निधीय मेळोवपाची जापसालदारकी मुख्यमंत्री, मंत्र्यांनी घेवची. स्वतंत्र भुरगीं उदरत खातें जावपाक जाय, कांय राज्यांनी तें आसा मागीर गोंय फाटीं कित्याक?
भुरग्यांक राजभाशेंतल्यान, मायभाशेंतल्यान शिक्षण मेळपाचो हावेस सरकारान दवरचो, पालकां मदीं जागृताय करची. मायभाशेंतल्यान शिकून भुरगीं उंचेल्या कुशळटायेचें शिक्षण घेवंक शकतात पूण उंचेली कुशळटायां गोंयांत खंयचीं ताचो सोद घेवचो पडटलो.
गोंयांत दिव्यांग कितले आसात? कमी दिसता तांचो दिव्यांगां भितर आस्पाव जाता ही म्हायती पर्पल फेस्तांत मेळ्ळी, एकल्या एकसुऱ्याचीच. अशे हजारांनी आसात? गोंयांत रावपी कितल्या दिव्यांगांची सोयरीक जाली? दिव्यांगांचीं भुरगीं दिव्यांग जल्मतात काय? हाचें संशोधन पर्पल फेस्ताच्या अणभवांतल्यान करपाक येवंक जाय.
पर्पल फेस्तांतले ताजमहाल, आयफेलटावर, कुतूब मिनार, मंगेशीचें देवूळ आनी हेर दायजांचें नमुने पळोवपाक मेळ्ळे. ते विकते घेवन सरकारान म्युझियमांत दवरचे. फेस्तांतल्या कला, कुशळटायांच्या वस्तींच्या स्टाॅलांतल्यान दिव्यांगांच्या सक्षमीकरणाचे ध्येय सरकारान दवरचें.
गोंय ल्हान पूण कितल्याशाच घडणुकांतल्यान सरबरायेंतल्यान, राजभास आंदोलनांतल्यान देशा मुखार व्हरपी देश पांवड्या वेले वरिश्ठ पत्रकार पर्पल फेस्ताक आयिल्ले? गोंयांतच तांणी राबितो करपाचें थारायलां? एनडीटीव्हीचे आदले संचालक प्रणव राॅय, तांची घरकान्न कांपाल वाॅकवेचेर अंदूंय सांजवेळा दिसतात. मांडवी न्हंय तांकांय भावता आसतलीच, पर्पल फेस्ताक आयिल्ल्या आंतरराष्ट्रीय प्रतिनिधीं कडेन तांची उलोवणीं जालीं? स्मार्ट सीटींत नवे सोबीत पासयेर चलत भोंवपी इंडिया टुडेचे राजदीप सरदेसाय कितें सांगतात?

सुहासिनी प्रभुगांवकार
9881099260