भांगरभूंय | प्रतिनिधी
गोंय हें पर्यटन थळ. हांगा कोण येतात आनी कोण वतात, ताका धरबंद ना. तांचेर कोणाचेंच नियंत्रण ना. कोणेंय येवचें, आपल्याक जाय तें करचें. मेळना करपाक जाल्यार कदेलकारांचें हात ओले करचें. मागीर सगलें रान जाता मेकळें…. दर्यादेगांचेर शिंदळकी, घुंवळे वखदां, सोरो, खंडणी, मारामारी…. चलता हें सगल्यांक खबर आसा. मात, तातूंत नव्या- नव्या गजालींची भर पडत आसा. हालींच बलात्काराची कागाळ नोंद करपाची धमकी दिवन खंडणी मागपी एके टोळयेक धरल्या. ही टोळी गुजराताची. गोंयांत शेंकड्यांनी वर्सां पयलीं वेपारा निमतान गुजरातांतल्यान पातमारी येताल्यो. हालींच्या काळा विशीं सांगपाचें जाल्यार, फाटल्या 40- 45 वर्सां सावन गुजराती गोंयांत येवन स्थायीक जायत आसात. ताचेय पयलीं आशिल्ले. तांणी फटवणूक, गुन्यांव केल्लो कोणे केन्नाच आयकूंक ना. मात, हालींसराक कांय ठकसेनांक धरल्यात. तांकां लागून कारण नासतना गुजराती समाजाक लज जावपाक लागल्या.
कळंगूटचो हो खंडणीचो प्रकार ब्लॅकमेल करपाचो. डेटींग अॅपा वयल्यान रंगेल दादल्यां कडेन संपर्क करून तांकां आपोवन आनी बलात्काराची कागाळ दिवपाची धमकी दिवन लाखांनी रुपयांची खंडणी मागप, ही तांची गुन्यांव करपाची पद्दत. ही कागाळ करपी आनी अटक जाल्यात त्यो चलयो, दादले गुजरातांतले. खरें म्हणल्यार असले प्रकार पुरायपणान बंद करप पुलिसांच्या हातांत आसा. मात, तांकां ताचेर नियंत्रण दवरपाक कित्याक जमना तें कळना. तांच्या तपासांत कोण आडमेळीं हाडटात काय आनीक कितें……?? ही टोळी डेटींग अॅपाचो वापर करून दादल्यां कडेन चॅटींग करी. मागीर तांचे कडल्यान सगली म्हायती घेवप. तातूंत गिरेस्त कोण आसा ताका डेटीर आपोवप आनी मागीर 2 ते 10 लाखां मेरेन रक्कम मागप. जर पयशे दिले नात, तर पुलिशेंत बलात्काराची कागाळ नोंद करता अशें सांगप. उपरांत भियेवन, चारित्र्याचेर दाग लागत म्हूण ते दादले खंडणी दिताले. ह्यो चलयो पुलीस स्टेशनाचेर आयिल्ल्यो. संबंदीत तरणाट्यान दोन लाख दितकूच हें प्रकरण मिटलें. मात, ताका कांय दिसांनी ह्यो चलयो आनीक कोणाक तरी जाळांत ओडटा, हें कळ्ळें. ताणें मागीर पुलिशेक सगली म्हायती दिली आनी ही टोळी सांपडली. तांणी गोंयांतूच न्हय, तर गुजरातांतूय असले प्रकार केल्यात अशें उक्ताडार आयलां.
गोंयांत सायबर पुलीस विभाग आसा. तांणी रातदीस वॅबसायटी सोदून, त्यो धवळून नेमकें कितें चल्लां, ताचो नियाळ घेवप राज्याचे नदरेन बरें. ह्यो वॅबसायटी, अॅप्स बंद करपाचो यत्न करपाक जाय. गोंयांत येवन कांय गुन्यांवकार अशें – अशें करतात, हाची म्हायती पर्यटकांक मेळपाक जाय. गोंयांत पर्यटक म्हणून येतकूच कितें नेम पाळचे, कशें वागचें, कशें भोंवचे, संभाव्य धोके…. हाची म्हायती पर्यटकांक आसपाक जाय. रातीं 7 उपरांत देशांतल्या कांय शारांनी भोंवप धोक्याचें आसता. आमच्या गोंयांत नायट टुरिझम आसा. पूण एकट्या दुकट्या, हेडपी चलयांक गोंय जायते फावटीं जिवघेणें थारलां. हीं प्रकरणां राष्ट्रीय, आंतरराष्ट्रीय पांवड्यार गाजल्यांत. गोंयांतल्या मसाज पार्लरांनी नेमकें कितें चलता, ताचो तपास जावंक जाय. दर्यादेगां वयल्यो कांय गजाली कोणा खातीर बेकायदेशीर येणावळीचीं केंद्रां जावंक फावना. प्रत्येक गजाल कायद्यान चलतली, हें पळोवप पुलिसांची लागणूक. पूण, हांगां पुलिसूच चोरां वांगडा भागिदारी
करतना सांपडल्यात.
पर्यटकांच्यो गाडयो हेंवूय राज्या फुडलें संकश्ट. भाड्यान गाडयो घेवप आनी त्यो मनाक येता तश्यो चलोवप हें आनीक कितलो तेंप चलतलें. दर्यावेळेर परवानगी नासतना गाडयो दर्यांत घालपी पर्यटक आसात. सोऱ्याच्यो बाटल्यो आशिल्ल्यो कितल्योशोच गाडयो सांपडल्यात. कांय धरल्यात. कांय सोडल्यातूय आसतल्यो. व्हिस्कीचो सीप घेत- घेत गाडयो चलोवन अपघात करपी पर्यटक आसात. गोंयकारूय हे बाबतींत उणें नात. पुलिसांनी अल्कोमिटरांचो वापर करपाची गरज आसा. करून पळयात, तालांवाचीं पाश्तां भरून ओत्तलीं!! स्वच्छ भारत, नितळ गोंय ही सुंदर घोशणा. स्वच्छ पर्यटन, नितळ वेळो ही संकल्पना सरकारान चालीक लावपाचो आयज वेळ आयला. खूब- खूब कठीण आनी लागीं – लागीं अशक्य अशें हें काम. तरी पूण यत्न करपाक कितें हरकत आसा?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
