भांगरभूंय | प्रतिनिधी
नोकर भरती एजंटां कडेन वेव्हार करतना सादूर रावात, पुलिसांचो सल्लो
पणजी ः सायबर स्लेवरी जॉब स्कॅम प्रकरणांत अटक केल्ल्या तिगां दुबावितां कडल्यान नवी नवी म्हायती मेळटा म्हणून पुलीस परदेशांत नोकर भरती करपी एजन्सीची चवकशी करतले. परदेशांत नोकर भरती करपी गोंयांत फकत 9 मान्यताय मेळिल्लीं एजन्सी आसात. कंबोडिया आनी थायलंडांत एजंटां वरवीं रोजगार सोदपी लोकांनी वेव्हार करचे पयलीं सादूर रावचें आनी आपली कागदपत्रां तपासची असो सल्लो पुलिसांनी दिला.
पुलीस महासंचालक आलोक कुमार आनी सायबर विभागाचे पुलीस अधीक्षक राहुल गुप्ता हांणी पत्रकार परिशद घेतली. हे पत्रकार परिशदेंत सायबर स्लेवरी जॉब स्कॅम प्रकरणांत गोंय पुलिसांनी केल्ले कामगिरीची म्हायती दिली. अटक केल्ल्या दुबावितां कडल्यान नवी नवी म्हायती मेळटा. ह्या प्रकरणां संबंदी कांय गाजलीं गोंयांत आसात काय? तशेंच हे खातीर दुबावितांनी गोंयांतल्या कांय जाणां कडल्यान मदत घेतल्या काय? ताचीय चवकशी चालू आसा असो संकेत पुलीस अधीक्षक राहुल गुप्तान दिलो. बँक खातीं आनी सिम कार्ड भाड्यान घेवन लोकांक नोकरी दिवपाचें उतर दिवन फटोवपी हे एक आंतरराष्ट्रीय रॅकेट आसा. तपास जाले उपरांत कितल्या जाणांक फटयलां. रॅकेटांत कितले लोक आसात तें उक्तें जातलें अशें तांणी सांगलें.
कोणेंय परदेशांत नोकरी करपा खातीर बँक खातें आनी सिम कार्ड मागलें आनी व्ह प्रमाणांत पगार दिवपाचें उतर दिल्यार तो एक स्कॅम आसूं येता हें लक्षांत दवरपाचो सल्लो पुलीस अधीक्षकान नागरिकांक दिलो.
कांय दिसां आदीं फेब्रुवारींत म्यानमारांतल्यान चेतन मुरगांवकार (बांबोळे) ह्या तरणाट्याची सुटका केल्ली. दुबावीत एजंटान ताका थायलंडांत व्हेलो. थंयच्यान ताका बोटीन म्यानमाराक व्हरून बंद कॉल सेंटरांत दवरलो. तरणाटी आसा अशें सांगून ताका हनी ट्रॅपमांत ओडपाचो यत्न जालो. सुटका करून गोंयांत पावतकच ताणें एक दुबावीत तमिळनाडूचो आशिल्ल्याची म्हायती पुलिसांक दिली. हाचेर आदारून पुलिसांनी आदित्य रविचंदन (तमिळनाडू) ह्या दुबाविताक अटक केली. आदित्य रविचंदन हाचे कडल्यान मेळिल्ले म्हायती वयल्यान रुपनारायण गुप्ता (मुंबय) हाका अटक केली. रुपनारायण गुप्ता मुंबयंत इवांका नांवाची भरती एजन्सी चलयतालो. ही एजन्सी नोंदणी केल्ली ना. रूपनारायण गुप्ताच्या चवकशीचेर आदारुन पुलीस चीनीच्या तलानिती नुलाक्शी हाचे कडेन पावलें. ताका दिल्लींत धरलो. नुलाक्शी व्हॉट्सअॅप आनी टेलिग्राम वापरून अर्थीक फटवणूक करतालो. ह्या तिगूय जाणांच्यो झूमाचेर बसका जाताल्यो. नोकरी मुलाखत घेवप ते पयशे मेळोवपा मेरेनची प्रक्रिया हे बसकेंत थारायतालें अशें चवकशेंतल्यान स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
