भांगरभूंय | प्रतिनिधी
मुंबय, खबरां संस्था: भारतीय बायलां क्रिकेट पंगडाची उपकप्तान स्मृती मानधना आनी संगीतकार पलाश मुच्छल हांचें लग्न तुटलें. स्मृती आनी पलाश हांणी सोशल मिडियाचेर पोस्ट करून आपलें लग्न मोडिल्ल्याची अधिकृत घोशणा केल्या.
लग्न कित्याक मोडलें?
स्मृती आनी पलाश हांच्या लग्नाच्या एक दीस आदीं स्मृतीच्या बापायची भलायकी इबाडिल्ल्यान तांचें लग्न मुखार धुकलिल्लें. मात हाचे उपरांत सोशल मिडियाचेर जायत्यो गजाली पातळपाक लागल्यो. तशेंच सोशल मिडिया वरवीं स्मृति आनी पलाश हांचे मदीं झगडीं जाल्ल्याचोय दावो केल्लो. लग्न कित्याक मोडलें तें अधिकृतपणान सांगूंक नासलें तरी पलाश हांणी आपल्या दुसर्या अफेअराक लागून स्मृती कडेन लग्न मोडलें अशें म्हण्टात.
लग्नाच्या एका दिसा आदीं कितें जालें?
लग्नाचे आदले रातीं मेरेन सगळें बरें चलतालें. मदीं अचकीत स्मृतीच्या बापायक खर काळजाचो आताक आयलो. बापायक हॉस्पिटलांत दाखल करतकच स्मृतीन लग्न फुडें धुकलपाचें थारायलें. दुसर्या दिसा पलाश हांकांय ताण आयिल्ल्यान हॉस्पिटलांत दाखल केलो. दोनूय कुटुंबांचेर आयिल्ल्या ह्या संकश्टान लग्न फुडें धुकल्लें. ते उपरांत स्मृतीन सोशल मिडियाचेर लग्नाचे मेहंदी आनी संगीताचे सगळे फोटो आनी व्हिडियो डिलीट केले.
फाटल्या कांय सप्तकांत म्हज्या वैयक्तीक जिविताचेर खूब चर्चा आनी उलोवपां जाल्यांत, देखून आतां उलोवप गरजेचें अशें म्हाका दिसता. हांव एक सामको खाजगी मनीस, पूण एक गजाल स्पश्ट आसा ती म्हणल्यार लग्न रद्द जालां. हो विशय हांगा सोडपाक सोदता आनी तुमकां सगळ्यांकय तशें करचें अशी विनंती करतां. उपकार करून आतां खातीर दोनूय कुटुंबांची गुप्तताय दवरात आनी आमच्याच गतींत हें सोदून काडपाक आनी आमकां आमच्या वेगान हें सगळीं समजून घेवन मुखार सरपाची मेकळीक दिवची अशें स्मृति मांधनान एका पोस्टांत सांगलां. स्मृतीच्या पोस्टा उपरांत पलाशान सोशल मिडियाचेरूय पोस्ट केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
