स्मृती मंधाना थारली सगल्यांत म्हारगी खेळगडी

भांगरभूंय | प्रतिनिधी

संवसारांतले मोठे बायलांचे टी-20 लीग वुमन प्रिमीयर लिगेच्या पयल्या हंगामा खातीर काल मेगा पावणी जाली.

कालचे पावणेचें आकर्शणाचें केंद्र थारली ती ती स्मृती मंधाना. रॉयल चॅलेंजर बंगळुरून तिका 3.4 कोटी ही सर्वोच्च बोली लायत आपल्या पंगडांत घेतली. विशेश म्हणल्यार ह्या इतिहासीक पावणेची बोली इतिहासीक थारली. भारता वतीन दिप्ती शर्मा 2.6 कोटी, हरमनप्रीत कौर 1.8, पुजा वस्त्रकर 1.9 कोटी, जेमिमाह रॉड्रिग्स 2.2 जाल्यार शेफाली वर्मा हाचेर 2 कोटी रुपयांची बोली लायली.

हे पावणेंत सगल्यांत स्टार खेळगडे रॉयल चॅलेंजर्स बंगळुरून एका धपक्यांत उखल्ले. जाल्यार दिल्लीन उसरा सुरवात केली. पूण, स्मार्टपणान निधी शिल्लक दवरीत आपल्या 18 खेळगड्यांचो कोटा पुर्ण केलो. जाल्यार दुसरे वटेन मुंबय इंडियन्सान आपलो किमान 15 खेळगड्यांचो कोटा हो अखेरच्या विशेश रावण्डांत पुर्ण केलो. तांणी संपुर्ण फंड सोंपयत 17 खेळगडे घेतले.

दिल्ली, गुजरात, बंगळुरू हांणी आपलो कमान 18 खेळगड्यांचो कोटा पुर्ण केलो. जाल्यार मुंबयन 17 आनी युपीन 16 खेळगडेच घेतले. ह्या दोनूय पंगडांक निधी पावंक ना. दुसरे वटेन रॉयल चॅलेंजर्स बंगळुरूचे 10 लाख जाल्यार गुजराताचे 5 लाख शिल्लक उरले.

अंदूंच्या बायलांचे प्रिमीयर लिगे खातीर वट्ट 90 खेळगड्यांचो स्लॉट आशिल्लो. हातूंत एक पंगड 15 जाल्यार कमाल 18 खेळगडे घेवपाक शकता.

दरेक पंगडांच चडांतचड 6 विदेशी खेळगडे वेंचपाची मेकळीक आसतली. पयल्या हंगामा खातीर वट्ट विदेशी खेळगड्यांची संख्या ही चडांचड 30 आसतली आनी भारतीय खेळगड्यांची संख्या 60 आसतली.

हे पावणेंत 400 परस चड खेळगड्यांचेर बोली लागली. हातूंतले 90 खेळगडे विवीध पंगडांत दाखल जाले.

स्मृती मंधाना पांचूय फ्रॅंचायजींच्या रडाराचेर आशिल्ली. हाचें फाटलें मुखेल कारण म्हणल्यार ती साबार भुमिका वठोवपाक शकता. ती बॅटिंगे खेरीत मुखेलपद लेगीत सांबाळपाक शकता. तशेंच संवसारांतल्या साबार बायलांचे क्रिकेट लिगेंत खेळटा. हातूंत बीग बॅश आनी वुमन हण्ड्रेड हाचो आस्पाव आसा.

जाल्यार भारताच्या पंगडाची मुखेली हरमनप्रीत कौराचेर 1.80 कोटी रुपयांची बोली लायत मुंबयन विकत घेतली. शेफाली वर्माक दिल्ली कॅपिटल्सान 2 कोटी रुपयांनी विकत घेतली. शेफाली सध्या उत्कृश्ट फॉर्मांत आसा. तिणें हालीच अण्डर 19 संवसारीक क्रिकेट सर्तींत भारताचें प्रतिनिधित्व केल्लें.