भांगरभूंय | प्रतिनिधी
बेथ मुनी (138) हिचो शेंकडो, जॉर्जिया वॉल (81) आनी एलिस पेरी (68) हांची आकर्शक बॅटिंग आनी ते उपरांत बॉलरांनी केल्ल्या उत्कृश्ट प्रदर्शना नेटार ऑस्ट्रेलिया पंगडान तिसरे आनी निर्णायक वन डे मॅचींत येजमान भारताक 43 धांवड्यांनी हारायलो. तशेंच ऑस्ट्रेलियान बायलांची तीन मॅचींची माळ 2-1 फरकान जिखली.
ऑस्ट्रेलिया पंगडान दिल्ले 413 धांवड्यांचे मोखीचो फाटलाव करपी भारताची सुरवात बरी जाली ना. चवथेच ओव्हरींत प्रतिका रावल (10) बाद जाली. ते उपरांत बॅटिंगेक आयिल्ले हर्लिन देओलान स्मृती मंधाना वांगडा मेळून डाव सांबाळपाचो यत्न केलो. णववे ओव्हरींत मेगन शूट हिणें हर्लिनाक (11) बाद करून भारताक दुसरो धपको दिलो. ते उपरांत बॅटिंगेक आयिल्ली मुखेली हरमनप्रीत कौर हिणें मंधाना वांगडा मेळून तिसरे विकेटी खातीर ताबडतोड 121 धांवड्यांची भागिदारी केली. पूण, किथ गार्थ हिणें 21वे ओव्हरींत हरमनप्रीत हिका बाद करून भारताक खर धपको दिलो. हरमनप्रीत हिणें 35 बॉलांनी 52 धांवड्यो केल्यो. फुडले ओव्हरींत ग्रेस हॅरिस हिणें मंधानाक बाद करून भारताक जबरदस्त धपको दिलो. स्मृती मंधानान 63 बॉलांनी 17 चवके आनी पांच सक्यांचे मजतीन 125 धांवड्यांची आकर्शक खेळी केली. रिचा घोष (6), राधा यादव (18) आनी अरुंधती रेड्डी (10) सवाय भितर बाद जाल्ल्यान भारताचें जैत जोडपाचे आशेक ब्रेक लागलो. तरी आसतना दिप्ती शर्मान एक बाजू सांबाळून धरिल्ली. ती खेळपट्टीचेर आस मेरेन भारताची आस्त कायम दिसताली. पूण, 43वे ओव्हरींत तालिया मॅक्ग्रान दिप्तीक बाद करून भारताची उरिल्ली सुरिल्ली आस्त सोंपयली. दिप्तीन 58 बॉलांनी पांच चवके आनी दोन सक्यांचे मजतीन 72 धांवड्यो केल्यो. स्नेह राणान 35 धांवड्यो केल्यो. 47वे ओव्हरीच्या निमाण्या बॉलाचेर किम पार्थ हिणें रेणुका सिंग (2) हिका बाद करून भारताचो डाव 369चेर सोंपयलो.
मंधानान कोहलीचो विक्रम मोडलो
स्मृती मंधानान विराट कोहलीचो विक्रम मोडलो. भारताचो दादल्यांचो आनी बायलांचो गट एकठांय केलो जाल्यार, वन डे क्रिकेटींत जलद शेंकडो मारपाचो भारतीय विक्रम विराट कोहलीच्या नांवार आशिल्लो. ताणें 2013त ऑस्ट्रेलिया आड 52 बॉलांनी शेंकडो मारिल्लो. मंधानान 50 बॉलांनी शेंकडो पूर्ण केलो. बायलांचे संवसारीक विक्रमांतलो हो दुसऱ्या क्रमांकाचो जलद शेंकडो आसा. संवसारीक विक्रम ऑस्ट्रेलियेचे मेग लॅनिंग हिच्या नांवार आसा. तिणें 45 बॉलांनी शेंकडो नोंदयला.
भारतीय बायलांचे वन डे क्रिकेटींत जलद शेंकडो मारपाचो विक्रम मंधानाच्याच नांवार आशिल्लो. ताणें ऑस्ट्रेलिये आड खेळटना 70 बॉलांनी शेंकडो पूर्ण केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
