भांगरभूंय | प्रतिनिधी
स्मार्ट सीटीच्या कामा विशीं बोवाळ घालून राजकारणी उत्पल पर्रीकार हांणी सरकाराक, स्मार्ट सीटी कंपनीकय जागे केलें. ताचो लाव महसूल मंत्री बाबूश मोंसेरात हांकांय जाला. स्मार्ट सीटीचेर मुख्यमंत्र्यांनी बसका घेतिल्ल्यान. पणजेची नवनिर्मणी जातना खणिल्ले रस्ते पावसा आदीं स्मार्ट जातले अशी आस्त बाळगुया. स्मार्ट सीटीची दुसरी मोख स्मार्ट येरादारी वेवस्थापन आशिल्ली, ती पुराय करपाक बेगोबेग पावलां उखलचीं. लोकप्रतिनिधी लोकसभा वेंचणुकेच्या प्रचारांत घुस्पल्ले आसतना अधिकारी पणजेच्या स्मार्ट वेवस्थापनाचेर बसका घेवंक शकतात. पुलिशेंतलो येरादारी फांटो, नगरसेवक आनी शारांतल्या नागरिकांक, वेवसायिकांक तेखातीर विस्वासांत घेवचें पडटलें. पणजेंत भितर सरतना तशेंच ज्या रस्त्यार येरादारीची कोंयडी जाता तेन्ना त्या वाठारांत भोंवल्यार, नागरिकां कडल्यान सुचोवण्यो मागयल्यार स्मार्ट सीटीक स्मार्ट येरादारी वेवस्थापन मेळटलें. पणजी म्हापालिका, भौशीक बांदकाम खात्याच्या अधिकाऱ्यांच्यो बसका स्मार्ट सीटीच्या मुख्य कार्यकारी अधिकाऱ्यांनी घेवप समा जातलें. राजभाशे सयत दोन भासांनी नागरिकांक, शारा भायल्यान येतल्यांक वाचपाक येता अशे तकटे लावप गरजेचे. कुरवांची भास सगल्यांक कळना, उतरांची भास 90 टक्के परस चड गोंयकारांक कळटा हें मतींत दवरून येरादारी वेवस्थापनाचेर जायराती उजवाडावच्यो.
नवनिर्मणेंतली पणजी बुडची न्हय हो फाटल्या सप्तकांतलो लेख बरयतना चुकोय जाल्ल्यो आसत. मोख एकच आसा पावसा आदींच्या म्हापालिका, नगरपालिकांच्या वावराक लोकसभा वेंचणुकेच्या प्रचारा वेळार आडमेळीं येवंक जायना. भौशीक बांदकाम खात्यान चालू केल्लो रस्त्यांचो वावरय प्रचार सुरू आसतना थांबूक जायना. पावसा पयलीं फोंडकुलां विरयत रस्ते पुराय गोंयाक मेळचेच, स्मार्ट सीटींतलीं कामांय पावसांत थांबचीं.
पणजेंतल्यो उदकाच्यो पायपलायनी, पुर्तुगेझ तेंपा वयल्यो त्यो बदलतना जंय खणलां थंय उदक मेळ्ळां. सुरवेक पायपलायनी बदलतना त्यो फुटल्यो, बदलपय वेंगी जालें. जंय खणिल्लें थंय रस्ते सारके जावंक ना, डांबरय घालूंक ना, वयले वयर माती सरकोवप जाल्ल्यान येरादारी त्रासाची जाता. भितरल्या रस्त्यां वयलीं फोंडकुलां चुकोवपाक दयानंद बांदोडकार मार्गा वयल्यान वचपी वाहनां चड, तातूंत फेस्तां एका फाटल्यान एक जाल्यार सदांच कोंयडी जाता. येरादारी पुलीस, सिग्नल आसल्यार शिस्तीन वाहनां येतात-वतात, रस्तो क्राॅस करपाकय पुलिसांचो आदार मेळटा. येरादारी पुलीस मुखेल मार्गांचेर सदांच आसचे पडटले.
भौशीक वाहनांचो उपेग चडांत चड करप, शारांत भायल्यान येवपी गाडयो सांतामोनिका जेटी लागसारचे पार्कींग प्लाजार दवरपाची येवजण स्मार्ट सीटींच्या बसकांनी आदले मुख्यमंत्री मनोहर पर्रीकार हांणी मांडिल्ली. शारांतल्या घरांनी चार चार गाड्यो, स्कुटरी आसात तें विधानसभेंत सांगपी आनी शारांत येवपी जड वाहनांच्या येवपा वचपाचें वेळापत्रक थारावन दिवपी आदले मुख्यमंत्री आयज नात. तांचे विचार, केल्ली नेमावळ आयजय उपेगाची? ती सारकी चालीक लागता? हाचो अभ्यास बेगीन करचो. 18 जून रस्तो, त्या रस्त्या वयलीं जंक्शनां रुंद करपाची येवजण स्मार्ट सीटींत आसली, ते दिकेन पावलां पडटा आसत जाल्यार ते विशींची म्हायती नागरिकांक दिवची. दोना पावल वचपा खातीर दुसरो रस्तो जाला तोवूय आतां पावना. स्मार्ट सीटी बशी, रींग रोड आयकुपाक बऱ्यो पूण तें शक्य आसा? हेवूय प्रश्न भासाभासे वेळार उप्राशिल्ले. पर्पल फेस्ता वेळार खासा बशी आशिल्ल्यो, तसल्यो बशी विद्यार्थ्यां खातीर मेळत व्हय? अस्तुरे खातीर खासा सीटी बशी जाय, आसा ते सिटय चलयांक, स्त्रीशक्तीक मेळपाक जांच जातात. अस्तुरे खातीर खासा बशी लेडीज स्पेशल राज्यांत सगल्या मार्गांचेर रातीं उसरां मेरेन जाय. कसिनोच्या कार्यालयांची सुवात शारा भायर व्हरपाक जाय, कसिनोंनी वावरांत आशिल्ल्या चलया, बायलांची संख्या कितली आसा ती म्हायती सरकारान मेळोवन, तांकां व्हर हाड करपा पासत बशी दवरपाक येतात. दयानंद बांदोडकार मार्गा वयल्यो पासयो कसिनो कार्यालयांतल्यान मेकळ्यो करच्योच पडटल्यो, कसिनोच्यो लायटी खांब्या वयल्यो जायराती, जायरातींचे बॅरिकेड्स कित्याक जाय? येरादारी खातें अधिकारी आनी पुलीस खात्याचो येरादारी विभाग हांचे भितर नातें जोडपी यंत्रणा आसा?
म्हापालिकेक पे पार्किंगेंतल्यान बरी येणावळ येता आनी तीच पद्दत आतां हेर शारांनी चालीक लावपाची तयारी चल्ल्या. शारांत रावतल्यांक पे पार्किंगेंत सवलत मेळची ही येवजण जैतिवंत जाल्या? पे पार्किंग सगल्या रस्त्यांनी फुडें व्हरचीच पडटली, सकाळीं आठ वरां सावन ती उपेगांत हाडची. येरादारी पुलीस जाय तितले आसात? वेपारी वाहनां नदर चुकोवन येतात? शाराच्या प्रवेशदारांत सांजवेळा अवस्था कशी आसता? एक नियाळ मुख्यमंत्र्यांनी, नगरविकास मंत्र्यांनी, महसूल मंत्र्यांनी घेवचो.
नव्या वर्साच्या पयल्याच दिसा जाल्लो अपघात कितें शिकयता? अपघात जावपी ब्लॅकस्पाॅट शारांत खंय आसात? शारांतल्या खंयच्या मार्गांर खंयच्या वेळार वाहनां यो-वच करतात? खंयचे रस्ते एकमार्गी जावंक शकतात? हो अभ्यास जाल्यार स्मार्ट येरादारी वेवस्थापन पणजेक मेळटलें.
पणजे फेरीबोट ते मिरामार मेरेनची पासय अदीं मदीं सारकी करतात, खळयो सारक्यो करच्यो पडटल्यो. फेस्ताची फेरी डिसेंबरांत ते पासयेर हाचे फुडें आसची न्हय हो निर्णय घेवचो पडटलो. लोकोत्सव लेगीत मडगांव, फोंड्यां, पणजे, म्हापश्यां, वास्को वरीं व्हड शारांनी विखुरपाक येत व्हय? शारा भायर इडीसी ग्रावंड आसा, एका तेंपार भौशीक बसका थंयच जाताल्यो. थंय फेरी डिसेंबरांत जावंक शकता? शारांतली येरादारी स्मार्ट करपाक “बायलेन्स” उपेगांत हाडपाचो विचार फुडें हाडिल्लो, तो आतां चालीक लागत?
शारांतलें तुळशी, यादस्तिकांचें दायज दुसरे कडेन व्हरपाक येत? पर्याय दियात, ही मनोहर पर्रीकारांची उतरां याद करात.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
