स्मार्ट सीईओ

भांगरभूंय | प्रतिनिधी

पणजेचें, स्मार्ट सिटीचें काम म्हणल्यार म्हाभानगड, अशें कांय जाण म्हणटाले. ते सरकार विरोधक म्हूण टिका करतात, अशें सगल्यांकूच दिसतालें. मात, आतां स्मार्ट सिटीच्यो एकेक करामती आयकूंक येवपाक लागल्यात. पणजी स्मार्ट सिटीचो आदलो एमडी आनी सीईओ स्वयंदिप्ता पाल चौधरी हाका लागून 82 लाख 87 हजार रुपयांचें सरकाराक लुकसाण जालां, ह्या आरोपा खाला इमॅजीन पणजी स्मार्ट सिटी डिव्हेलपमेंट लिमिटेडाची (आयपीएससीडीएल) तेन्नाची वेवस्थापकी संचालक मामू हागे हांणी कागाळ केल्ली. ते प्रमाण दक्षता खात्याच्या भ्रश्टाचार विरोधी विभागान (एसीबी) गुन्यांव दाखल केला.
ही अफरातफरीची म्हायती मेळटकच पाल चौधरी हाका 2020 त पदा वयल्यान काडिल्लो. ताची चवकशी आनी उपरांत पुलीस कागाळ केल्ली. आतां एसीबीन गुन्यांव दाखल केला. चौधरीन क्रेडीट कार्डा वरवीं 27 लाख 50 हजार रुपया स्वता खातीर मेळटा तशे खर्च केले. तशेंच आनिकूय 1 लाख रुपया खर्च केले. एकाच कामा खातीर वेगळे वेगळे सल्लागार नेमले. ते खातीर बोगस बिलां तयार करून पयशे उखल्ले. आयपीएससीडीएल कर्मचाऱ्यांची बनावट सय, दस्तावेज तयार करून पगारवाड करून घेतली. केंद्र सरकाराक चुकीचो अहवाल सादर केलो. 200 कोटींच्या इंटरगार्टेड कमांड आनी कंट्रोल सेंटर्स प्रकल्पाक चौधरीक लागून उशीर जालो. ह्या सगल्यांक लागून सरकाराचें 82 लाख 87 हजार रुपयांचें लुकसाण जालें, अशें कागाळेंत म्हणलां.
स्वयंदीप्ता म्हणजे स्वताचो उजवाड आशिल्लो. खास करून काजुल्याक ह्या नांवान वळखतात. मात, हो काजुलो लोकांच्या घामा- कश्टाच्या (सरकार खर्च करता तो लोकांच्या करांतल्यान वसुल केल्लो पयसो) पयश्यांचो धूप करून गेलो. 1 एप्रील 2018 ते 30 सप्टेंबर 2020 मेरेन तो आयपीएससीडीएलचो एमडी आशिल्लो. त्या काळांत इंटरनॅट बँकींग सुविधेचो स्वताच्या फायद्या खातीर अनधिकृत वापर करपाचो ताचेर आरोप आसा. स्वयंदीप्तान एकल्यानूच हें कर्तूब केलें काय ताचे वांगडा आनीक कोण आशिल्ले, ताचोय सोद आतां एसीबी घेतलीच. कारण सहसा असलीं कामां एकलोच करिना. भितर दुसरो कोण तरी वांटेकार आसताच. मुळांत केंद्र सरकारा कडल्यान आयिल्लो पयसो परत वता ही खबर कळ्ळे उपरांत स्मार्ट सिटीच्या कामांक रातयां धडाधड सुरवात जाल्ली. नाजाल्यार हें काम बरीच वर्सां कांसवा गतीन चलतालें.
देश पांवड्याचेर स्मार्ट सिटीची ही येवजण 25 जून 2015 दिसा चालीक लागिल्ली. ते खातीर 73 हजार कोटी रुपया निधी जाहीर जाल्लो. पणजी शाराची निवड जाल्ली ती मे 2016 त. पणजेच्या कामाची गाडी धांवपाक लागली ती 2022 त. कारण मदीं कोरोनाचो काळ आशिल्लो. कामां पद्दतशीर पणान चालीक लागिल्लीं जाल्यार तीं पुराय जावपाचीं. मात एकाच वेळा वेगळेवेगळे कडेन तीं चालू जालीं. सगली पणजीच खणिल्लें शार जाल्ली. सध्याची परिस्थिती पळयल्यार हीं कामां आनीक वर्सभर तरीं चलतलीं अशें दिसता. सध्या जे रस्ते जाल्यात तातूंतले कांय बाबत जाल्यात. मदींच स्पीड ब्रेकरा सारको उंच भाग, मदींच ल्हारां कसो रस्तो…. आलिशान मोटारींत बशिल्लो बसून हालता, ताचे वयल्यान कामाचो दर्जो कितें आसतलो, तें कळटा. मेळटा थंय फुटपाथ रुंद केल्ल्यान पार्किंगाचे जागे अशीर जाल्यात. तरीय लोक आदले सारकेच दोनूय वटेन गाडयो पार्क करतात. परिणाम ट्रॅफीक जाम. ही सगल्यांत व्हडली समस्या. कारण पणजे पार्किंगाक जागो मेळना. शारा भायर एक वेवस्था केल्या. पूण चडश्यांक तिचो उपेग ना. चवथीच्या दिसांनी पणजी रिकामी जाल्ली. आतां सोमाराच्यान गाडयांनी परत भरून ओत्तली.
गाडेकार, हॉटेलकार, हेर वेवसायिकांक स्मार्ट सिटीच्या कामांक लागून धपको बशिल्लो. अजून कांय कडेन गाडे सुरू जावंक नात. उदरगती खातीर लोकांक त्याग करचो पडटा, त्रास काडचे पडटात, ही गजाल खरी. पूण कितलो तेंप? स्मार्ट सिटीचें काम चलतना कांय लोकांक मरण आयलां. तर थोडे जखमीय जाल्यात. कोणाची तरी चूक भलत्याकूच भोगची पडल्या. स्मार्ट सिटीच्या ह्या आदल्या स्मार्ट सीईओचेर कारवाय सुरू जातली. दोशी सांपडल्यार ख्यास्तूच जातली. पूण त्या 82 लाख 87 हजारांचें कितें? सरकाराक जाल्लें हें लुकसाण ताचे कडल्यान वसूल करतले? कोट्यांनी रुपया खावप्यांक कांय वेळार स म्हयन्यांचीच बंदखण जाता. तशें हांगा जावचें न्हय.