भांगरभूंय | प्रतिनिधी
देशांतल्या स्मार्ट सिटीचो बुन्यादी वावर 2014 वर्सा सुरू जाल्लो. प्रधानमंत्री नरेंद्र मोदी हांच्या फुडारपणा खाला केंद्रांत सरकार
सत्तेर येतकूच आदले उपराष्ट्रपती व्यंकय्या नायडू हांचे वरी अणभवी खासदार, मंत्री जाले. तांणी आदले प्रधानमंत्री भारत रत्न अटलबिहारी वाजपेयी हांच्या सरकाराचें शार नवनिर्मणेचें सपन फुडें व्हरपा खातीर येत्न केले. त्या यत्नांतल्यान मध्य प्रदेशा वरी राज्यांचें रुपडेंच बदलपाक लागलां. राज्यांच्या राजधानी लागसार नवीं शारां, वसणुको जल्माक येवपाक लागल्यांत. गोंयची राजधानी पणजेचो स्मार्ट सिटींत दुसऱ्या पांवड्यार आस्पाव जालो. ते खातीर 2012 सावन केल्ल्या इमेजीन पणजी तशेंच हेर आराखड्यांचो उपेग जालो. तेन्नाचे पणजेचे म्हापौर, आयुक्त, सरकारा भितर एक बरें नातें आशिल्लें. आदले मुख्यमंत्री मनोहर पर्रीकार पणजेचे आमदार आशिल्ल्यान बारीकसाणेन शाराच्या वावराचेर ते नदर दवरताले. केंद्रांत मंत्री जावपाचें तांकां आपोवणें येतकूच पणजेकारां खातीर आपूण सदांच आसतलों अशें उतर तांणी दिल्लें. आयज पणजे इतलेंच ताळगांवाचे उदरगती कडेन चड लक्ष दवरपी म्हापौर, मंत्री आसात. पणजे लागसार रायबंदर वाठाराचे उदरगतीक धा वर्साआदीं आरंभ जाल्लो, नवें उपनगर थंय जालां.
पणजे स्मार्ट सिटीच्या वावराचो लाव ताळगांव, रायबंदराक मेळटलो. ओल्ड गोवाक जोडपी, फोंडें, मडगांव, सांखळी लागीं हाडपी पुलावरी मार्गाचें कामय जाता. वर्सभरांत पणजी म्हापालिका नवे सुवातींत वतली हे खातीर वावराक हात घाला. एकाच बराबर जावपी स्मार्ट सिटींतल्या वावराचो व्याप व्हड आसा. हायकोर्टाच्या न्यायमुर्तीनीं पणजे ते रायबंदरच्या कोनशा मेरेन भोंवडी केल्यार स्मार्ट सिटी खातीर शिस्त, वेवस्थापनाची येवजण तयार जातली. न्यायमुर्ती थळावे आशिल्ल्यान तांकां वाठाराची म्हायती आसा, तांचे कडल्यान फुडाराचे नदरेंतल्यान देख घालून दिल्यार देशाकय ती आदर्श थारची.
शारांतली येरादारी, येणावळ, महोत्सव, कसिनोच्या कचेऱ्यांनी आडायिल्ल्या रस्त्यांचो विचार न्यायमुर्ती स्मार्ट सिटी खातीरजावपी नवे मार्गदर्शक नेमावळी वेळार करतले हातूंत दुबाव ना. ही नेमावळ मडगांव, मुरगांव, वास्को शारां नवनिर्मणेत वतना उपेगाक पडपाक जाय.
शारांचे वा स्मार्ट सिटीचो वावर चालूच उरतलो हें आत्र्या पयऱ्यान सांगपी केंद्रीय मंत्री हरदीप पुरी फुडल्या सरकारांत आसतले? नायडू हांचे मागीर तांणी स्मार्ट सिटीच्या वावराक नेट दिलो हें खरें. स्मार्ट सिटी वेवस्थापना पासत बळिश्ट कायद्याची बांदावळ जावपाची गरज आसा, फुडारांतल्या केंद्र सरकारान तेपासत वावुरपाक जाय. पणजे न्यायमुर्तीनी केल्ले भोंवडेची म्हायती भारताच्या सरन्यायाधिशां कडेन कित्याक पावची न्हय? सरन्यायाधिशांनी केंद्र सरकारा कडल्यान कायद्यांत बदल घडोवन हाडपा खातीर व्हड पावल घालां. आतांचे सरन्यायाधीश अणभवी, एक सुदारक म्हणून देश तांचे कडेन पळयता. तांच्या विचारांतल्यान, मार्गदर्शनांतल्यान नवे कायदे करपाचें कामकाज जाता. देशाच्या राजकारणाक वेगळें मोडण दिवपाची तांक तांचे भितर आसा.
स्मार्ट सिटींत धुल्लाचें प्रदुशण जाता तें आधुनीक यंत्रांचो, जाळयेच्या पड्ड्यांचो उपेग करुन उणे करुंक येता. कामकाजाच्या वेगळ्यावेगळ्या वाठारांत इंग्लीश भाशेंतल्या तक्ट्यां बराबरीन देवनागरी कोंकणीत तक्टे लावपाक जाय. स्मार्ट दयानंद बांदोडकार मार्ग पयल्या इफ्फी वेळार जालो, वर्स दोन वर्सांनी रस्तो सुदारतात, राखणय मेळटा. स्मार्ट सिटी कंपनीत कामाचो नियाळ करपी, देखरेख दवरपी विभाग आसा? त्या विभागांत तज्ञ आसात? तेच कंत्राटां घेतात? ह्या प्रस्नाच्यो जापो न्यायालयान मेळोवपाचो, स्मार्ट सिटीच्या कामाचेर आशिल्ल्या कंत्राटदार आनी उप कंत्राटदारांची पुराय म्हसायती घेवची. एका वेळार एकूच रस्त्यार कामकाज करप, तेविशीं लोकांक म्हायती जायरातींतल्यान दिवप वेळार करतात? नगर विकास यंत्रणा, म्हापौर, म्हापालिका आयुक्तांक स्मार्ट सिटी कंपनी मंडळाचेर फक्त नांवाक सुवात आसा? स्मार्ट सिटी कंपनीची बांदावळ कशी जाल्या ? कंपनीक स्वतंत्र मुखेल कार्यकारी अधिकारी आसात? त्या अधिकाऱ्यां कडेन हेर सरकारी जापसालदारकी आसा? गिन्यांनी, अणभवी मनीसबळ कंपनी कडेन आसा? स्मार्ट सिटी खातीर केल्ल्या मुळाव्या नकाशा प्रमाण कामकाज जाता? ही म्हायती न्यायालयान घेवची. कंपनीची येणावळ, कामकाजाचे सुवातीचो नियाळ घेतल्यार कंपनी पासत नवीं मार्गदर्शक तत्वां घालून दिवप सोपें जातलें. स्मार्ट सिटी खाला येवपी पाटो प्लाझा वाठार न्यायमुर्तींनी पळोवचो. स्मार्ट सिटींतल्या कांपाल वाॅक वे चेर न्यायमुर्ती भोंवल्यात, थंय राखणे वेवस्था जावची. एके वटेन धुल्ल खावोवपी स्मार्ट सिटी दुसरे वटेन मांडवीदेगे वेल्या कांपाल वाॅक वे चेर थाकाय दिता.
फुडल्या स म्हयन्या भितर स्मार्ट सिटीचो सध्याचो वावर शंबर टक्के पुराय जावपाकच जाय ही मोख न्यायालयान इमेजीन पणजी स्मार्ट सिटी कंपनीक दिवची. सुरवेच्या तेंपार कंपनीन करून घेतिल्ल्या वावराचो दर्जो बरो आसा, आतां तो इबाडप कित्याक?
स्मार्ट सिटीचो सध्याच्या वावराक नेट दितना कला अकादमी, पणजी जिमखान्याच्या काँक्रीट दुरगाक, झाडा भोंवतणच्या चौकांक वेंरो आयल्यात, चौक तुटल्यात, फुटल्यात. पासयेर खणलां थंय कामकाज चालू आशिल्ल्याचे तकटेय ना. पावसा पयलीं तें कामय पूर्ण जावप गरजेचें. ते खातीर व्हड प्रमाणांत कामगारांक घालपाचे, ताकतीकेचे आदेश दिवचे. ज्या सांतीनेज रस्त्यां कडेन न्यायमुर्ती गंभीरतायेन पळयतात थंय लोकसभा वेंचणुकेचीं दोन तीन मतदान केंद्रां आसात. मतदान दिसा आदीं तो रस्तो धुल्ल मुक्त करपाची जापसालदारकी घेवची पडटली.
स्मार्ट सिटी वेवस्थापन अधिकारिणीची नवी मांडावळ, घडणावळ करपाचे नदरेन न्यायालयान विचार करचो. स्थापत्यशास्त्रांत कामकाजाचें वेवस्थापन, देखरेख ह्या शास्त्राचो आस्पाव जावपाक लागला. तरणाटे अभियंतेय सरकारांत आसात, तांचे कडेन स्मार्ट सिटी वेवस्थापन, येवजण, राखण कित्याक दिवची न्हय?
स्मार्ट सिटी खातीर 10 – 12 वर्सां आदीं केल्ल्या नकाशा प्रमाण पणजी आसा? बदल समजून घेवपाक न्यायालयान पणजेचे तटस्थ नागरीक, आदवोगादांची समिती करची. धुल्लाचे, वेवस्थेचे जांच फक्त दिव्यांगांक न्हय समेस्तांकय जातात, राबितो करतल्यांक आनी शारांत येवपी, वचपी आसात तांकांय. शाराच्या आवय बापूय भावाक स्मार्ट सिटी कंपनीच्या मंडळांत मुखेल जापसालदारकी कित्याक ना?
स्मार्ट सिटी कंपनीच्या चपक्यांत, भौशीक बांदकाम खात्या कडेन पणजी म्हापालिकेतलें मुखेल रस्ते आसात. स्मार्ट सिटीचो वावर पुराय जाता तशे वाॅर्डय कंपनीच्या चपक्यांतल्यान भायर काडपा खातीर नेमावळींत निर्देश दिवचे.
स्मार्ट सिटींत रस्ते रुंद करपाक झाडां मारतात थंय सावळी दिवपी नवीं झाडां लावचीं. कांपाल वाॅक वे वाठारांतल्या दर्या संगमाच्या लागसरच्या दयानंद बांदोडकर ग्रावंडार चारय वाटांनी झाडां लावचीं. कला अकादमीचो वाठार पांचवो ताल्ल जातना, लागसरच्या वाठारांत रखरख कित्याक? भगवान महावीर जार्दिनातल्या काँक्रिटीकरणाक, स्मार्ट सिटीच्या वावराक निमाणे शीम, मेरेची गरज आसा, न्यायालया कडल्यान तीच अपेक्षा.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
