स्मार्ट सिटी रस्त्यांचें काम बाबत

भांगरभूंय | प्रतिनिधी

उदय मडकयकारः हजार कोटी रुपया उदकांत गेल्ल्याचो दावो

भांगरभूंय । प्रतिनिधी

पणजीः स्मार्ट सिटीचीं कामां गडबडीन चल्ल्यांत. हजार कोटी रुपया मोडून स्मार्ट सिटी खाला नव्या रस्त्यां खातीर वयल्या वयर डांबर घालतात. लोकांचो पयसो उदकांत घालपी ह्या कंत्राटदार आनी सल्लागाराचेर सरकारान एफआयआर नोंद करपाक जाय, अशें आदले महापौर उदय मडकयकार हांणी म्हणलां.

सुमार 1200 कोटी मोडून स्मार्ट सिटीचीं कामां चल्ल्यांत. तातूंत पणजी शारांत काँक्रीट आनी सिमेंटाच्या रस्त्यांचीं कामां चल्ल्यांत. पणजी मार्केट वाठारांत रस्ते आनी फूटपाथ बांदतना मातयेचेर सिमेंट घालपाचें काम चल्लां हें दोळ्यांनी पळयलां. कामगारांक विचारल्यार तांकां अशेंच काम करपाक सांगलां, अशें सांगतात, असो दावो मडकयकार हांणी केला.

नवे रस्ते खूब तेंप तिगचे हे खातीर कंत्राटदारान आदींचे रस्ते 15 इंच तरी खणपाक जाय आसले आनी उपरांतूच नवो रस्तो बांदपाक जाय आसलो. पूण वयले वयर डांबर घालपाचें काम चल्लां. हेरशी तीन- तीन वर्सांनी रस्त्यांचेर सादें डांबर घालतातूच. पूण इतले हजार कोटी रुपया मोडून सादें डांबर घालप ही गजाल पचना. हे रस्ते 50 वर्सां तरी तिगपाक जाय. पूण जे तरेन काम चल्लां तें पळयत जाल्यार कितलीं वर्सां तिगतले, आनी ताची गॅरंटी कितें असो प्रस्न मडकयकार हांणी उपस्थीत केला.

सल्लागार कोटी रुपयांचें शुल्क घेता. ताणें ह्या कामाचेर देखरेख दवरपाक जाय आसली, पूण तो गायब जाला. कंत्राटदार लेगीत कोणाक भियेना. सरकारान स्मार्ट सिटीच्या कामाचें अर्थीक ऑडीट करपाची गरज आसा. तेचवरी सल्लागार तशेंच कंत्राटदाराचेर एफआयआर नोंद करपाक जाय, अशी मागणी मडकयकार हांणी केल्या. आपूण जेन्ना पणजेचो महापौर आशिल्लो तेन्ना हीं कामां बाबत दर्ज्याचीं असो आरोप केल्लो. ते आरोप आतां सिद्ध जाववपाक लागल्यात. लोक खूब त्रास सोंसतात आनी 31 मे मेरेन हीं कामां पुराय जातली, अशी आस्त बाळगून बसल्यात, अशें मडकयकार हांणी सांगलें.

कंत्राटदार ‘स्मार्ट’ जाल्यातः मडकयकार

स्मार्ट सिटी खाला सध्या 12 कामां चालू आसात. पेडण्यां म्हामार्गाचें काम करपी कंत्राटदारांक हीं स्मार्ट सिटीचीं कामां दिल्यांत. तांणी आपल्या खाला आनीक कंत्राटदार नेमल्यात. स्मार्ट सिटींत हे कंत्राटदार स्मार्ट जाल्यात आनी तांची फक्त जोड चल्ला, अशें उदय मडकयकार हांणी सांगलें.