भांगरभूंय | प्रतिनिधी
पणजीः पणजेच्या दायज आनी इतिहासीक वाठारांचें स्मार्ट सिटी येवजणे खाला उदरगत आनी तांचे पुनरुज्जीवन जातलें. हे खातीर इमॅजीन पणजी स्मार्ट सिटी उदरगत महामंडळान सल्लागाराची नेमणूक करपाची प्रक्रिया सुरू केल्या. ही प्रक्रिया पुराय जाले उपरांत केंद्रा कडल्यान निधी मंजूर जातलो.
स्मार्ट सिटीन मध्यवर्ती वेवसाय जिल्लो/ इतिहासीक केंद्राच्या पुनरूज्जीवन ह्या उप्रकमा खाला येवजणेचो आरखडो तयार करपा खातीर सल्लागाराची नेमणूक करपा खातीर निविदा जारी केल्या.
हे विशीं अदीक म्हायती दितना स्मार्ट सिटीच्या वरीश्ठ अधिकार्यान सांगलें, भांडवल गुंतवणूकी खातीर राज्यांक विशेश सहाय्य २०२५-२६ हे केंद्रीय शार वेव्हार आनी गृह निर्माण मंत्रालयाचे येवजणे खाला पणजे शारांतल्या दायज आनी इतिहासीक वाठारांचे पुनरूज्जीवन जावपाचें आसा.
स्मार्ट सिटी येवजणेच्या घटकांचो हे येवजणेंत आस्पाव केला आनी तिचे खाला इतिहासीक आनी दायज थळांचे पुनरूज्जीवन करपा खातीर केंद्रान १७ सप्टेंबर २०२५त पणजी शारांक मान्यताय दिल्या. हातूंत ह्या वाठारांतलीं दायज थळां आसा तांची उदरगत करून ती पुनरूज्जीवीत करपाचो आमचो विचार आसा, अशें अधिकार्यान म्हणलें.
हे खातीर आमकां कोन्सेप्ट आराखडो केंद्राक सादर करचो पडटलो आनी ते उपरांतच हे येवजणे खातीरचो निधी मंजूर जातलो. ही प्रक्रीया करपा खातीर आमी सल्लागाराची नेमणूक करपाची थारयलां. येता त्या स्मार्ट सिटी मंडळाचे बसकेंत हे विशींची प्रक्रीया करतले. आमी फोन्तेन्हास, आल्तीन आनी हेर दायज वाठारांचेर चर्चा करून खंयचोय एक वाठार कन्सेप्ट आराखड्यात घालपा विशींचो निर्णय घेवन तो केंद्राक धाडटतले, अशीं म्हायती अधिकार्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
