भांगरभूंय | प्रतिनिधी
पणजीः स्मार्ट सिटी खाला राजधानी पणजींत सुरू केल्ल्या कदंबाच्या ई-बशींचे लायव्ह लोकेशन आतां गुगल मॅपाचेर उपलब्ध आसा. हाका लागून बस कितल्या वेळार भायर सरली, बस नेमकी खंय आसा, ती त्या बस स्टॉपाचेर कितल्या वेळार पावतली, त्या मार्गाचेर हेर खंयची बस आसा आदी म्हायती प्रवाशांक मेळटली. हे सेवेक लागून प्रवासी बस स्टॉपाचेर वाट पळोवचे बदला वेळार थंय पावपाक शकतले.
स्मार्ट सिटी खाला तयार केल्ले सगळे बस स्टॉप गुगल मॅपाचेर रेकॉर्ड केल्यात. ह्या खंयच्याय बस स्टॉपाचेर क्लिक केल्यार त्या मार्गाचेर उपलब्ध आशिल्ल्या सगळ्या बशीं विशीं म्हायती दाखयतात. हाचे भायर पणजेंतल्या एका सुवातेर सावन दुसरे सुवातेर वचपा खातीर बस सेवा पर्याय निवडल्यार उपलब्ध आशिल्लीं ई-बसूय गुगल मॅपाचेर दाखयतात. सध्या हे ई-बस सेवेक बरो प्रतिसाद मेळटा. हे नवे सुविधेचो लाव चड प्रवासी घेतले अशी अास्त आसा.
स्मार्ट सिटी खाला पणजे कदंबाच्यो इलेक्ट्रीक बशी 1 जुलयाक सुरू जाल्ल्यो. शारांतल्या मुखेल सुवातींनी सावय दरान पावपाक मेळिल्ल्यान हे सेवेक प्रवाशांचो प्रतिसाद मेळपाक लागला. 1 जुलय ते 30 सप्टेंबर ह्या काळांत 4 लाखां परस चड प्रवासी हे बशींतल्यान प्रवास केला. जुलय म्हयन्याचे तुळेंत ऑगस्टाच्या निमाणे मेरेन प्रवाशांचो आंकडो दुपेटीन वाडला आनी सप्टेंबराच्या निमाणे मेरेन तिपेटीन वाडला. ही सेवा खासा करून विद्यार्थ्यां खातीर आनी कर्मचाऱ्यां खातीर उपेगी पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
