भांगरभूंय | प्रतिनिधी
म्हयनो भर चडच जातलो. कामाक येता वतना कदंबाच्यो पुराय निळ्या रंगाच्यो इ- बशी (विजेच्या प्रवाहाचेर चार्ज जावपी बॅटरी आशिल्ली बस) रस्त्यार धांवताना दिसतात. पळोवपाक म्हाका खोसूय भोगली. कालापूरा सावन पणजे कामाक वतना एक दीस तर मनांत एका खिणांक दिसलेंय बी स्कूटर अशी कुशीक थाबोंवन हे बशीर चडचें आनी पासयेक वच्चें म्हण मागीर म्हाकाच दिसलें हें आनी कितें भुरगेंपणाशी म्हजी आनी विचार सोडून दिलो. पूण मागीर परत निर्धारुच केलो, एक दीस तरी हे इ– बशीचो अणभव घेवप. मडगांव, म्हापशें , पेडण्या इ-बशी घाल्यात म्हूण आयकल्लें, पूण अणभव केन्ना घेयन सो दिसलो ना. पूण ह्यो दोळ्या मुखांवेल्यान धांवतल्यो सुबक बशी मनाक भावल्यो. पणजे बस स्टँडावेल्यान ताळगांव, दोनपावल, गोंय विद्यापीठ, पणजे शारांत भितरल्या रस्त्यांचेर, भाटल्यांत,आल्तीन, ताळगांवच्यान कालापूर आनी परत अश्यो ह्यो बशी फावटी घालतात. पाटो प्लाजा ते बसस्टँड आनी फुडें अशीय एक इ बस आसा. बशी फाटोफाट आशिल्ल्यान एक चुकली म्हूण पिकासांव जायना. लागिंच्या प्रवासाच्या मळार सरकारान घडोवन हाडिल्ली ही एक क्रांती.
पणजे बस स्टँडार सावन दोनापावल, ताळगांव जांव, बांबोळे प्रवास करतल्या प्रवाशांक बरोचसो अणभव आसा. पंदरा मिनटांचे वाटेक कशे बशीकार फाटीं वच, फुडें वच करताले. बशी नंबरार आसून लेगीत कशे हांव पयलीं वयता काय तूं पयलीं वयता, अश्यो हांच्यो सर्ती चालू आसताल्यो. ह्या कारणांक लागून बशींनी भोंवतल्या लोकांचे मात हाल जाताले. ते भायर बशी चिकार भरून आसताल्यो. मूय लेगीत रिगतली जाल्यार जागो आसनासलो. शिकपी भुरगीं बाबडीं चिड्डून मुड्डून प्रवास करतालीं. बाजारांत जांव पणजे शारांत भितर कामां निमतान वतल्या लोकांची पसून हीच गत. बांबोळे हाॅस्पिटलांत वचपी दुयेंत लोकांचे तर सारके हाल जाताले. एक तर कालापुरच्यान बांबोळे वचपी बस धर नाजाल्यार वास्को मडगांव वचपी लोकल बस धर. कसलोच फरक पडनासलो. पूण ह्या इवी बशींक लागून बांबोळे आनी पणजे लागशिल्या गांवानी वचपाचें खुबशें सोंपें जालां.
पणजेंत आनी पणजे भायर येरादारी करतल्या बशिंचेर G-1 G- 2 Y-1 Y-2 B-1 B-2 I- 1 I -2 हे ठळक नजरेक पडटालें म्हण कदंब मंडळाच्या संकेत थळाचेर म्हायती मेळयली.
सद्याक पणजे आनी लागशिऱ्या वाठारांतल्या तीन तरांनी रस्त्यांचे वांटे केल्यात. Green Yellow आनी Blue. G-1 G- 2 Y-1 Y-2 B-1 B-2 अशें कळ्ळें. म्हजी चवथ ताळगांव आशिल्ल्यान ह्या दिसांनी ताळगांवा वचप जातालें आनी ह्या अक्षराच्यो I- 1 I -2 बशी म्हाका ताळगांवां येरादारी करताना दिश्टी पडल्यो.
G-1 वाठारांत येरादारी करपी इवी बशी पणजे बस स्टँडावेल्यान सुटून पणजे इगर्जे कडल्यान आल्तीन वचून, सांत इनेज रस्तो घेवन पणजे बाजार, पुलीस चौकी, फेरी धक्को दिवजां भोंवतड काडून परत बस स्टँडार येता.
G- 2 पणजे बस स्टँड, पोस्ट आॅफीस, फेरी धक्को, बाजार, कला अकादेमी, सांत इनेज थावन आल्तीन वचून पणजे इगर्जेकडल्यान, मळ्यांत सावन पोरण्या पाटो पुलावेल्यान पर्यटन भवन, मध्यवर्ती वाचपाघर काडून परत पणजे बस स्टँडार येता.
Y-1 पणजे सावन मळ्यांतल्यान कालापूरा वचून, जीएमसी कडल्यान, गोंय विद्यापिठा कडल्यान, दोना पावला सर्कल, आंतराष्ट्रीय विज्ञान केंद्र, पणजे बाजार, दिवजां भोंवतड काडून परत पणजे बस स्टँडार येता. (कांय वाठारांचो हांगा उल्लेख हांगा करुंक ना.)
Y-2 पणजे बस स्टँडार सावन पोस्ट आॅफीस, कला अकादेमी, कांपाल, आंतराष्ट्रीय विज्ञान केंद्र, गोंय विद्यापीठ, जीएमसी कडल्यान, कालापूरच्यान परत पणजे बस स्टँडार येता.
B-1 बशी पणजे शारांतच येरादारी करतात. बस स्टँडावेल्यान सुटून पाटो प्लाजा सावन पणजे शारांत फेरी धक्को आझान मैदान, दोन बाॅस्को, फार्मासी काॅलेज,सांत इनेज जंक्शन रस्तो, उजो पालोवपी दळ, सांत इनेज इगर्जेचो रस्तो धरीत परत परत स्टँडार येता.
I- 1 हें अक्षर आशिल्ल्यो इवी बशी पणजे शारांतल्यान ताळगांवच्यान कालापूर ताळगांव जोडपी बांदावेल्यान वचून कालापुरच्यान परत पणजे बस स्टँडार येरादारी करताना दिश्टी पडटा. वयलीं अक्षरां सोडून V अक्षर आशिल्ल्यो इवी बशी येरादारी करताना दिश्टी पडटात. इवी बशीर आसपी इंग्लिशिंतले अक्षर आनी आखून दिल्लो वठार हांचो संबंध आसा काय म्हण समजलें ना. ताळगांव आनी कालापुरा जोडपी हो बांद फक्त स्वताची गाडी आसलेलेच लोक वा कोणाचोय फावर मागून प्रवास करताले. ह्या सारकिल्या गांवगिऱ्या वाठारांनी असल्यो इवी बशी येरादारी करता ही खरेंच खोशयेची गजाल. कुजिरा शाळा संकुला कडेन कदंब म्हामंडळाची इवी बस येरादारी करताना दिश्टी पडता. हांगा आशिल्ल्या शाळांनी वचपी भुरग्यांक कांय कारणांक लागून शाळेंत दरपारां उपरांत रावचें पडल्या ही इवी बस तांकां आतां खूब फायद्याची जाल्या. पणजेंतले रस्ते जरी बाबत जाल्यात पूण ह्यो इवी बशी मात ह्या रस्त्यांचेर व्हडा उमेदीन येरादारी करतात. स्मार्ट सिटींतले रस्ते जरी आजून स्मार्ट जांवक ना तरी ह्यो स्मार्ट बशी स्मार्ट जावन येरादारी करतात.
पुराय तरेन विजेचेर चलतल्या ह्या बशींक लागून पर्यावरणांक कांय धोको ना. पूण ह्यो तयार करपाक वापरिल्ल्या लिथियमा लागून धर्तेरेक धोको निर्माण जांव शकता.
प्रीता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
