स्मार्ट सिटीच्या वावराची ताकतीक जाय

भांगरभूंय | प्रतिनिधी

नगरसेवकांनी फुडारांतल्या राजकारणाचें सपन तांच्या दोन ते तीन वर्सांच्या वावरांतल्यान फुलपाक शकता हें समजून घेवचें.

स्मार्ट सिटी जावपी राजधानी पणजी बुडटे खातीर संवसारांत पावल्या. शारांतले कांय वाठार एके दडकेन उदका खाला वतात हें सत. 18 जून रस्तो, पाटो प्लाझा, मळ्यांतले चडशे कोनशे, रस्ते, आदिलशहा पालासी लागसाल्लो रस्तो हे तातुंतले मुखेल. स्मार्ट सिटीच्या वावरांत रस्त्यांचो आसपाव नाशिल्लो. पुर्तुगेझांच्या तेंपा वयल्यो पायपलायनी बदलप, शाराक येरादारीचे कोयंडेतल्यान सोडोवप, कसिनोंचीं कार्यालयां शारा भायर व्हरप, मेकळ्यो सुवाती तिगोवन दवरप हो मूळ रोडमॅप. आदले मुखेलमंत्री मनोहर पर्रीकार हाणीं लोकांक विश्वासांत घेवन स्मार्ट सिटीची दिका थारायिल्ली.
स्मार्ट सिटीच्या वावराची बुन्याद घालतकीच पयलींचो फातरांचो कांपाल वाॅक वे काँक्रिटाचो जालो, न्हंयेचेर खासा फातरांची राखणे वणत जाल्या. परशुराम पुतळ्या सयत तपोकुल योग क्षेत्र जालां. श्यामाप्रसाद मुखर्जी स्टेडियम ते मिरामार मेरनचो बरो रस्तोय जाला. कांपाला वयलो परेड ग्रावंड इतिहासांत पावला, त्या ग्रावंडार भोवउपेगी खेळां वाठार, जाॅगिंग सुवात जाल्या. खेळां प्राधिकरणाची नवी बिल्डिंग, स्विमींग पूल, हेर खेळाच्यो सुविधा आशिल्लो प्रकल्पय मार्गाक लागला. 18 जून मार्गा वयल्यान सांतिनेज सावन ताळगांव वचपाक सांकव, रस्तो, बालभवना मुखावयल्या रस्त्याचें बांदकायम पुराय जालां. विशाल मेगा मार्ट ते अर्थीक विकास म्हामंडळ, गंगा निवास ते महालक्ष्मी देऊळ, दयानंद बांदोडकर मार्ग तशेंच हेर कांय रस्तेय जाल्यात. शारांतल्यो 60 टक्क्यां वयर उदकाच्यो पायपलायनी बदलतकीच खळयो, गटारां बांदप कित्याक जालें? स्मार्ट सिटीच्या वावरांत आशिल्ल्या इमेजिन पणजी कंपनी आनी हेर यंत्रणांनी एकचार नाशिल्ल्यान? मदले मदीं नवीं बांदकामा करचीं पडिल्ल्यान?
आतामेरेन जाल्ल्या बांदकामाचो भोंवतणीचेर परिणाम जाला आसतलोच, ताकतिकेन ताचो नियाळ करपाक जाय, अभ्यास करुन फुडल्या वावराक आरंभ करचो. काकुलो माॅल ते टोंक वाठारांक जोडपी रस्त्याचो वावर सुरु जाल्यार एक वर्स जालें अजून तें कित्याक सोंपना? दिसाळ्यांनी खबरो, फोटे छापून हाडप चालू दवरिल्ल्यान सांतिनेज चर्च मेरेनचो रस्तो जालो. रस्त्याच्या आशीकुशीचो वावर बेगीन जाल्यार पावसांत येरादारीक आडमेळीं येवचीं ना. एक गजाल खरी फाटल्यान लागल्यार, राजकी इत्साशक्त आसल्यार रातयां भुयारी मार्ग, म्हयन्या भितर काँक्रीट रॅम्प बांदपी कंत्राटदार, कामगार आसात. पावस सुरु जावचे पयलीं काकुलो माॅल ते टोंक मेरेनचो रस्तो पुराय जातलो अशी आस्त. वर्सा आदीं सुदारिल्लो दयानंद बांदोडकार मार्ग येरादारीचे कोयंडेत चेंपचो न्ही हे खातीर जतनाय घेवची पडटली. स्मार्ट सिटीच्या वावराची ताकतीक जायच. त्या भायर येणावळ दिवपी राजधानीक बदनाम करतल्यांक जाप दिवपी, वाॅक वे, दोनापावल मिरामार दर्यादेगेर, अदींमदीं स्मार्ट सिटींच्या वावरांतल्यान जाल्ल्या रस्त्यांचेर देखरेख दवरपी राखणे जाय. मांडवी न्हंय तापता तिचेरय नदर जाय.
गोंयचे आदले अधिकारी, सैममोगी, नखेत्रां, मळब, गिराणांचो अभ्यास करपी पर्सवियल नोरोन्हा हांचें पुस्तक वाचल्यार पणजेची निर्मणी कशी जाल्ली तें कळटा. पाटो प्लाझा आतां आदल्या मुखेलमंत्र्यांच्या सपनांतलो नरिमन पाॅयंट जाला, थंयच्यो मळबाक तेंकपी बिल्डिंगो आनी तातूंत लिपिल्लें संस्कृती भवन. वाठारांत व्हड बुडटी हाडपी हें कळटा. पाचव्याचार झाडांच्यो सुवाती पाटो प्लाझार तयार करच्यो आनी बांदकामाचेर बंदी तज्ञां कडेन भासाभास करुन घालची. थंय नव्या साधनसुविधांची निर्मणी करपाक सुरवात जाल्या, पाट्याची मुळां खणिल्ले कडेन दिसतात. आंबेडकार जार्दिन्याचो वाठार पन्नास टक्क्यां वयर खणल्या उपरांतच बुडटी एकादरे थांबतली. शारांतली बांदकामां थांबोवन आॅक्टोबरांत पाटो प्लाझाच्या साधनसुविधांचे नवनिर्मणे खातीर पावलां मारप गरजेचें.
अटल सेतू जोड रस्ते, पुलाच्या सुरु जाल्ल्या वावरांतल्यान जावपी येरादारीची कोयंडी थांबोवपाक बसका जाय. बायंगिणी कोयर वेवस्थापन प्रकल्पाचो बुन्यादी वावरय करचो. मुख्यमंत्र्यांन बसका घेतकीच स्मार्ट सिटीच्या कामकाजाच्यो फायली हालतात, नाशिल्ले कामगारय हाजीर जातात तें कित्याक ताचें कुवाडें पडटा. पणजेतल्या मतदानाचेर स्मार्ट सिटीच्या वावराचो परिणाम जाला. रायबंदर, सांतीनेज वाठारांतल्या सात- आठ मतदान केंद्रांर वचपाच्या वाठारांत वेंचणुकेच्या दिसांनी कामकाज ताकतिकेन चलिल्लें. रस्त्यार पडिल्ले फातर, चिरे, माती, व्हांवपी उदक, फोंडकुलांतल्यान वाट काडत मतदान केंद्रांर वचपाक भिरांत दिसल्यार अजाप न्हय.
पणजी महापालिकेची नवी बिल्डिंग केन्ना जातली? साठ सत्तर वर्सां आदल्यो, उत्तर जिल्हाधिकारी इमारती वरी इमारती इतिहासांत घालच्योच पडटल्यो. जी धिटाय परेड ग्रावंडाचें रुपांतर करपांत दाखयल्ली तसोच निर्णय पोरणो पाटो पूल, इमारतीं खातीर घेवचो पडटलो. दायजाच्यो कुरवो सांबाळून जें सुदारप कोट्ट्यांनी रुपया खर्च करून आयजवेर जालां तें आतां थांबोवप समा जातलें. दायज इमारत आसा जाल्यार तशीच परतून बांदप शक्य आसा, बदल आनी आधुनिक तंत्रज्ञानाचो आसपाव करुन. गोवा बोर्डाचे इमारतीचो नमुनो मुखार दवरुन प्रशासन प्रकल्प जाल्यार तो चड तेंप तिगतलो. जीं बांदकामां जातात, जातलीं तीं चारशें पाचशें वर्सां नाका साठ- सत्तर वर्सां तिगपी आसचीं. पोरण्या पाटो पुलाचें, जुन्ता हावसाचें स्ट्रक्चरल आॅडिट करचें. पाटो प्लाझा भुयंकापाच्या एका धपक्यान मातये भरवण जावचोना हे खातीर येवजण जाय.
स्मार्ट सिटी मिशन शारां नवनिर्मणेची एक मोख. त्या वावरांत शारांतले नागरीक वांटेकार आसतले अशें नेमावळींत सांगलां. मुख्यमंत्र्यांनी नगर विकासमंत्र्यांक म्हापालिका, नगरपालिकांच्या कामकाजांत लक्ष घालपाक गोंयभर धाडचें पडटलें. शार आनी नगर नियोजन खातें सवकासायेन गेल्यार जाता पूण नगर विकास खात्याची नवी बांदावळ जावची. मंत्र्यांक तांक आसा, भासाभासेंतल्यान नगरपालिका, म्हापालिकेचो, भलायकी खात्याचो कारभार ते जाग्यार घालूंक शकतात. पणजेंतली भलायकी खात्याची इमारत, मासान द आमोरी शाळा, शाळे लागींचे शार भलायकी केंद्र, समाजकल्याण खात्याची बिल्डिंग मुख्यमंत्र्यांनी एकदां पळोवची. फकत वयलेचाराक सुदारप, फर्निशिंग नाका, नवनिर्मणी जाय. स्मार्ट सिटी मिशनाची आनीक एक मोख म्हळ्ळ्यार नागरी सुविधा सोंपेपणान दिवप. येरादारीच्यो नव्यो वाटो, साधनांचो वावर हातांत घेतना रोजगाराची निर्मणी करप. पावसांत इमेजिन पणजी कंपनीचे अधिकारी ते खातीर नकाशाची बांदावळ करुंक शकतात.
साधनसुविधा विकास म्हामंडळ, म्हेळ नितळसाण म्हामंडळांत कर्मचारी आसात? वेवस्थापकी संचालक, मुखेल कार्यकारी अधिकाऱ्यांक बांदावळीचो अणभव न्ही ज्ञान आसा? पयलीं गिन्यान, मागीर गिन्यानाक अणभवाची जोड ही नीती हाचे फुडें नोकरभरती करतना सरकारान शिस्तीन आपणावची. नोकरभरते पासत नेमावळ बदलतना ती न्यायालयाच्या चपक्यांत शिरकून उरपाक जायना अशी पद्धत आपणावप बरें. मुखेल विशयांतल्या गिन्यानाची मोलावणी करपी मोलादिक आसचे. पणजी स्मार्ट सिटीच्या वावराचे ताकतिकेंतल्यान फुडारांतल्या, मडगांव, मुरगांव, म्हापशें, मांद्रें स्मार्ट सिटीच्या सपनांचे बीं किल्लतलें. लोकप्रतिनिधी, नगरपालिकांक विश्वासांत घेवन तेपासत तयारी करची पडटली. पावस लागीं येतकीच नगरपालिका कित्याक जाग्यो जावच्यो? नगरसेवकांनी फुडारांतल्या राजकारणाचें सपन तांच्या दोन ते तीन वर्सांच्या वावरांतल्यान फुलपाक शकता हें समजून घेवचें. आमदार जावपाची मोख दवरतना आडमेळीं येतात, जय पराजयाचीं गणितां चुकतात, पूण तळागाळांत क्रियाशिल रावल्यार कालचो पराजय फाल्यां जैता कडेन व्हरता ताच्यो देखी आसात.

सुहासिनी प्रभुगावकर
9881099260