भांगरभूंय | प्रतिनिधी
पणजीः स्मार्ट सिटीचीं कामां ३१ मार्च पयलीं पुराय जातलीं अशें सांगून १ एप्रिलाक स्मार्ट सिटीन आनी भाजप सरकारान पणजेकारांक एप्रील फुल केलां. जीं कामां पुराय जाल्यांत म्हूण सांगल्यांत तांचेर वयल्या वयर लेप लावन तीं तशींच अर्दकुटीं दवरल्यांत, असो गंभीर आरोप आम आदमी पक्षाचे गोंय संयोजक अमित पालेकार हांणी केलो.
३१ मार्च ही डेडलायन सोंपली तरी लेगीत हीं कामां पुराय जावंक नाशिल्ल्यान सांतइनेज ताड-माड रस्त्यार स्मार्ट सिटीच्या नांवान चलिल्लें घाळपणां पालेकार हांणी उक्ताडार हाडलीं. ह्या वेळार आप पक्षाचे फुडारी वाल्मिकी नायक, सलमान खान आनी हेर हजर आशिल्ले.
डेडलायन सोंपल्या आनी कामां पुराय जाल्यांत तीं दाखोवपाक पणजेच्या अर्दवट रस्त्यांचेर डांबर ओतलां. लोकांक फटोवपा खातीर काल मेरेन फोडून उडयल्लें, धुल्ल, माती आशिल्ल्या रस्त्यांचेर डांबर घातला, अशें पालेकार हांणी सांगलें.
ताडमाड वाठारांत जी परिस्थिती स्मार्ट सिटीच्या कामांक लागून जाल्या ताचे वेल्यान दिसून येता की स्मार्ट सिटीच्या नांवान भाजपान १०४ कोटीचो घोटाळो चलयला. स्मार्ट सिटीच्या कामाची परिस्थिती पळयल्यार कळटा की भाजप लोकांक फटयत आसा आनी हें लोकां मुखार दाखोवपा खातीर एप्रिल फुल दिसा सारको आनी दुसरो दिसा ना, असो थोमणो पालेकार हांणी मारलो.
जे कामां पुराय जाल्यांत म्हण सांगतात ते फटींग. तांणी फक्त वयल्या वयर लिपस्टीक लायलां. हे सुवातेर शिमीटाचे रस्ते जावपाक जाय आशिल्ले आनी शिमिटाच्या रस्त्याचें कंत्राट काडिल्लें. मात ते सुवातेर डांबराचे रस्ते केल्यात. जर तुमकां रस्त्यार डांबर घालपाचे आसलें जाल्यार हें काम पयलीं करूं येतालें. रस्ते फोडून लोकांक त्रास दिवपाची कसली गरज आसली, असो प्रस्न पालेकार हांणी केलो.
ताडमाड रस्तो वर्सा भितर पुराय जावचो ना. जर ह्या वर्सा भितर पुराय करपाचो यत्न करतले जाल्यार ते कामाच्या दर्ज्याकडे खेळटले. सद्या काम इतलें बाबत दर्जाचें चल्लां, बांधकामांक बोट लायल्यार तातुंतल्यान शिमीट भायर सरता, असो आरोप पालेकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
