स्मार्ट सिटीच्या कामाक लागून पणजेचे स रस्ते बंद

भांगरभूंय | प्रतिनिधी

पणजी ः पणजे स्मार्ट सिटीच्या दुसऱ्या टप्प्यातले काम सुरू जालां. भाटले ते चार पिलार मेरेनचो रस्तो पयलींच बंद केला. आतां शारांतले आनीक स रस्ते बंद केल्यात. तांतूतले पांच रस्ते 18 जानेवारी ते 7 फेब्रुवारी मेरेन बंद आसतले. जाल्यार 18 जानेवारी ते 31 मार्च मेरेन आजून एक रस्तो बंद आसतलो. सध्या पणजी लोकोत्सव सुरु आसा. अशें परिस्थित हे रस्ते बंद केल्ल्यान शारांत येरादारीची कोंयडी जावपाची शक्यताय आसा.

मेळिल्ले म्हायती प्रमाण, महात्मा गांधी रस्त्यावेल्या डॉन बॉस्को ते यूको बँक मेरेनचो 354 मीटर लांबायेचे रस्तो बंद केला. डॉन बॉस्को वा पणजी बाजारांत वचपा खातीर यूको बँकेंकडल्यान पी शिरगांवकार रस्तो – आत्मराम बोरकर रस्तो – शिक्षण खात्याच्या पोरणें इमारतीं कडल्यान मार्ग घेवचो पडटलो. लिबर्टी शोरूम ते विनंती रेस्टॉरंट मेरेनचो रस्तो कांय प्रमाणांत बंद आसतलो. ह्या टप्प्यांतल्यान वाहनां यो – वच करुंक शकतलीं.
टी बी कुन्हा रस्त्यावेल्या कॅफे भोसले ते दयानंद बांदोडकर रस्तो जंक्शन मेरेन 230 मीटराच्या टप्पात ड्रेन लायन घालपाचे आनी हेर कामां जातली. ताका लागून हो रस्तो पुराय बंद आसतलो. कॅफे भोसले वटेन वचपी गाडयांक मिनेझिज ब्रागांझा रस्त्याचो वापर करचो पडटलो. 18 जून रस्त्यावेल्या एनजीपीडीए ते काकुलो आयलंड मेरेनचो 140 मीटर लांबायेचो रस्तो पुराय बंद आसतलो.
कुन्हा रिव्हेरा रस्त्यावेल्या विनंती रेस्टॉरंट ते दयानंद बांदोडकर रस्तो जंक्शन मेरेनचो 40 मीटरचो रस्तो बंद आसतलो. थंयच्यान दयानंद बांदोडकर रस्त्याकडेन वचपी गाडयांनी हॉटेल मांडवी – स्वामी विवेकानंद रस्तो अशा पर्यायी रस्त्यांचो वापर करचो. हें सगळे मार्ग 18 जानेवारी ते 7 फेब्रुवारी मेरेन बंद आसतले. तशेंच ताड माड देवूळ ते एसटीपी पुला मेरेनचो रस्तो 18 जानेवारी ते 31 मार्च मेरेन बंद आसतलो.

https://www.facebook.com/share/r/15sxhSFBhj

2 फेब्रुवारी मेरेन मुखेल कामां पुराय जातली…
वयल्या रस्त्यांची सगळी मुखेल कामां 2 फेब्रुवारी मेरेन पुराय जातली. हातूंत जमनी पोंदच्यान सेवा लायनी घालप आनी ड्रेन घालप हांचो आस्पाव आसा. वीज खांबे उबारप, रंगोवप, झाडां लावप अशी कामां 2 ते 7 फेब्रुवारी ह्या काळांत जातली.