भांगरभूंय | प्रतिनिधी
स्मार्ट सिटीचे खूबशे प्रकल्प पुराय जाल्यात अशें कळीत करपी पत्रकार परिशद गोंय सरकाराचे सचीव, इमेजीन पणजी कंपनीचे मुखेल कार्यकारी अधिकारी संजीत राॅड्रिग्ज हांणी घेतली. तांच्या मुखामळार एक वेगळीच खोस आशिल्ली. संजीत पणजी स्मार्ट सिटीची येवजण बांदावळ करप, ते ती चकाचक करपा मेरेनच्या प्रकल्पांत घुस्पल्ले अधिकारी. पयल्या इफ्फी वेळार रात दीस वावरांत बुडिल्ले, उण्यांत उणी म्हायती दिवपी पणजीचे पयले आयुक्त संजीत पत्रकारांचे वळखीचे. पणजी म्हापालिकेचो जल्म तांणी पळयला. शार पाचवें ताल्ल उरचें, सोबीत जावचें हेखातीर खासगी कंपनींचो आधार घेवपी, दिवजां सर्कल जल्माक घालपी, आदल्यो राज्यपाल मृदुला सिन्हा हांच्या नितळसाणीच्या पर्वांत सान्न हातांत घेवन पणजेच्या रस्त्यार देंवपी, टी शर्ट घालून पाॅटर्स फेस्तांत तिनसांजच्या वगतार भोंवपी संजीत आपल्या कामा कडेन लागणूक आशिल्ले अधिकारी.
तीन म्हयन्यां भितर पणजे बाजारांत नुस्त्याचें मार्केट आनी बराबरीन बेस बरो चकचकीत टाॅयलेट प्रकल्प मेळटलो. आदले मुख्यमंत्री मनोहर पर्रीकार हांणी घालून दिल्लो सकारात्मकतेचो मंत्र नकारात्मक वातावरणात केळोवपी संजीत आमदार दिगंबर कामत हांकांय भावपी. धा सरकारी खात्यांची जापसालदारकी आंगार पडली तरी संकश्टांच्या वगतार पणजेच्या रस्त्यार देंवपाची तांक तांचे लागीं आसा. इंजिनियररींग शिक्षण नासलें तरी स्मार्ट सिटीच्या ध्यास पर्वांतल्यान फुडारांत मेट्रो राज्यांत हाडपाचें सपन पुराय करतलेच हातूंत दुबाव ना. स्मार्ट सिटी वावर सोंपचो ना, तो सुरूच उरतलो हें सत कित्याक लिपोवप?
कार्नावलाच्या वगतार पणजे सांबा स्केवर चौकांत नाच, गीतांच्यो सर्ती घडोवन हाडटना शाराक नितळसाणीत पयलो नंबर मेळोवन दिवपाक तांचो व्हड वांटो. आवय सरकारी अधिकारी आशिल्ल्यान तांकांय अधिकारी जावपा पासत उमेद मेळ्ळी आसुये. एका तेंपार मुंबय म्हापालिकेचे अधिकारी अशोक खैरनारांचो कारभार पळोवन पणजे म्हापालिकेचे पयले आयुक्त म्हणून तांची नेमणूक जाल्ली तेन्ना संजीता कडल्यान तीच अपेक्षा दवरपी मुख्यमंत्री पर्रीकारांचे फेवरेट अधिकारी. दक्षीण गोंय जिल्होधिकारी म्हणून तांणी केल्लो वावर तितलोच तोखणायेचो.
राजपाटण पणजी स्मार्ट सिटी करपा पासत पयली येवजण केंद्र सरकारान भायर मारली तेन्ना संजीत निर्शेणेंत गेले ना. नेटान स्मार्ट सिटी खातीर दुसरी येवजण बांदून आदल्या संरक्षण मंत्र्यांच्या आधारान येवजणेचेर म्होर मारून हाडटकच ती पणजेच्या लोकां मुखार मांडपाक, पणजे मार्केटांतली बेकायदो बांदकामां मोडून काडपाक ते वावुरल्यात. स्मार्ट पणजेचे देखरेखे खातीर पंगड बांदचे आदीं मांडवी न्हंयचे देगे कडल्या पासयेर भोंवल्यार संजीत हांकां मांडवीची पाॅमनेड चेपतना दिसतली.
पणजेंतल्या आदिलशहाच्या राजवाड्या खातीर नवी येवजण तांकां बांदची पडटली, शारांतल्या हेर वाॅर्डा मेरेन स्मार्ट सिटी येवजणेचो लाव पावोवपा पासत तयारी करतात व्हय? मडगांव, मोपा, मुरगांव स्मार्ट सिटी खातीर वावराक तांकां लागचें पडटलें. चुको जातकीच त्यो सुदारपाक तांचे कडेन आयडीया आसतात, लोक संपर्कय बरो आशिल्ल्यान मुख्यमंत्र्यांचे कचेरेंतले मुखेल अधिकारी म्हणून कामकाज फुडें व्हरप तांकां शक्य जालें. सरकाराचे जोड सचीव, पणजेचे आयुक्त, मनरिजवण सोसायटी अधिकारी ते आयएएस अधिकारी मेरेन पाविल्ले संजीत रस्त्यार देंवपाक केन्ना फाटीं रावले नात. टिका केल्यार टिकाकारांक जापो तितलेच तांकीन दिवपी अधिकारी म्हणून तांची देख घेवपा सारकी.
इंग्लीश भाशे बराबरीन कोंकणी भाशेंतल्यान मंत्री, समेस्तां वांगडा, अधिकाऱ्यां वांगडा भासाभास करपी संजीत हांणी इमेजीन पणजी नकशे जल्माक घाल्यात, पणजे पासत खासा दायज येवजण तांचीच.
पणजे शारांत घराघरांनी ओलो, सुको कोयराचें वेवस्थापन जावचें म्हूण संजीत नगरसेवक, मंत्र्यां कडेन झगडपीय. झगडीं झुजांतल्यान पणजे स्मार्ट सिटी खातीरआशिल्ले चडशे प्रकल्प पुराय जाल्यात अशें सांगतात. ओल्ड गोवा कोयर वेवस्थापन प्रकल्प जाग्यार घालपाक सरकाराक तांचीच मजत म्हत्वाची. साळगांव कोयर वेवस्थापन प्रकल्प मार्गाक लावपाक ते मुखेल वांटेकार आशिल्ले. दोन कौशल्यां तांचे कडेन आसात जीं अधिकाऱ्यां कडेन आसपाक जाय, पयलें उलोवपाचें, राजभास कोंकणीतल्यान उलोवपांतल्यान आपले विचार दुसऱ्यां कडेन पावोवपाचें. दुसरें तेच विचार सरकारी कामकाजांतल्या उतरांनी कागदार, कंप्युटर, लॅपटाॅपार घालपाचे. सोंशीकपण तांचे कडेन आसा आनी त्या गुणांचेर ते व्हड जाल्यात. माध्यमां पसून कुशीक रावन वस्तुस्थिती कितें आसा ताचो अभ्यास करून प्रकल्प फुडें व्हरपाचें गिन्यान तांकां आसा.
स्मार्ट सिटींतलो वास्तववाद तांकां खबर आसा. एक रस्तो बांदता म्हणसर दुसरो रस्तो रोमता हाची जाणविकाय तांकां आसची ना अशें न्हय. स्मार्ट सिटी खाला पुर्तुगेज तेंपा वयल्यो पायपलायनी बदलपाचो व्हड वावर जाला. नव्यो घाणयाऱ्या, म्हेळ्या उदकाच्यो पायपलायनी बदलतात. पायप्ड गॅस हाडपा पासत तयारी खणिल्ल्या फोंडकुलांतल्यांन जाल्या. सुरवेक बरींच आडमेळीं आयलीं, उपरांत जाल्ल्या सुदारपांतल्यान स्मार्ट सिटी बळिश्ट जावंक पावल्या. येता त्या पावसांत हुंवार येवचो ना हाची जतनाय घेवपाची गरज आसा. पणजी म्हापालिका ते पासत वावुरता, नवे अरिश्ट वेवस्थापन वेवस्थेची
बांदावळ जाता.
स्मार्ट सिटीच्या प्रकल्पांची देखरेख आनी सांबाळ वेवस्था बांदतना इमेजीन पणजी कंपनीक गरजे प्रमाण दोन तीन पंगडय आसचे हेखातीर पावल मारचें पडटलें. कांपाल वाॅक वे शारांतलो एक मुखेल पाॅयंट जाला. त्याच वाॅक वेचेर आशिल्लो परशुराम, बसपा चलपाची वेवस्था पर्यटकांक भावपाक लागल्या. म्हापालिका नितळसाणीत आसा, तो पाॅयंट सेल्फी पाॅयंट म्हणून थारावन चोब्यांनी येवपी भोंवडेकारां खातीर तिकेट लावपा पासत कंपनीन विचार करचो. सुणीं, माजरां घेवन वाॅक वे चेर येवपी देशी विदेशी आसात, तांचे खातीर टायमींग दिल्यार समेस्तांक त्रास जावचो ना.
तकटे लावपाचो म्हत्वाचो वावरूय जावचो. वाॅक वे थिरावता, फातरीचेर जाण्टे उबे रावन फोटो घेतात, भुरगीं बसतात तेन्ना तांचे पासत कितें बरें, वायट तें समजावन दिवपी तकटे जाय. वाॅक वे, कसिनोतल्यान मांडवी न्हंय रुंद जाता? मिरामार दर्यादेग ल्हान जाता? हाचो बेगोबेग अभ्यास जावचो. वाॅक वेन पणजेंतलो हुंवार आडायला, वाॅक वे नाशिल्लो जाल्यार चेन्नय, केरळवरी पणजेंत मुखेल करून कांपाल, मिरामार बुडटी येवपाची. स्मार्ट सिटींतल्यान खळयो जातात, पावसाचें उदक वचपा पासत जाल्ली वेवस्था सारकी आसा काय चुकल्या तें अंदूं पावसाच्या दिसांनी कळटलें. सांतिनेज नाल्याचेर व्हड फातरी घालून थंय गाडेकारां खातीर रोजगाराच्यो सुविधा निर्मणेची येवजण आशिल्ली. स्मार्ट सिटीच्या फुडल्या पावंड्यार सांतीनेज नाल्याच्या नवनिर्मणेक प्रायोरिटी
मेळची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
