भांगरभूंय | प्रतिनिधी
-ट्रॅफीक मार्शल फक्त उच्च न्यायालयाच्या पळोवणी पुरतेच अाशिल्ले
पणजीः स्मार्ट सिटीचीं कामां सुरू आसतना येरादारी सुरळीत जावपा खातीर नेमिल्ले ट्रॅफीक मार्शल सध्या गायब जाल्यात. बंद आशिल्ले रस्ते, ट्रॅफीक पुलिसांचो उणाव आनी बेशिस्तपणान केल्ले पार्कींग हाका लागून राजधानी पणजे येरादारीची कोंयडी वाडल्या. बांदोडकार रस्त्याचेर वाहनांच्यो रांको लागतात. ते खातीर स्मार्ट सिटीचे ट्रॅफीक मार्शल फक्त उच्च न्यायालयाच्या पळोवणी पुरतेच अाशिल्ले काय, असो प्रस्न थळावे विचारतात.
हाचे पयलीं स्मार्ट सिटीच्या कामांक लागून जावपी धुल्ल प्रदुशण, बंद केल्ले रस्ते, येरादारी कोंयडी हे विशीं उच्च न्यायालयाच्या गोंय खंडपिठांत याचिका दाखल केल्ली. हाची दखल घेवन न्यायालयाचे न्यायमूर्ती हांणी प्रत्यक्ष रस्त्याचेर देंवन स्मार्ट सिटीच्या कामांची पळोवणी केल्ली. त्या वेळार स्मार्ट सिटीन येरादारीचेर नियंत्रण दवरपाक ट्रॅफीक मार्शल नेमिल्ल्याचे न्यायालयाक दाखोवन दिले. पूण हे मार्शल सध्या गायब जाल्यात.
सध्या पणजे बाजार वाठार, सांतइनेज, रायबंदरा स्मार्ट सिटीचीं कामां सुरू आसात. ताज विवांता ते सांतइनेज रस्त्याचींय कामां सुरू आशिल्ल्यान हो रस्तो एक म्हयन्या परस चड काळ बंद आसा. ताका लागून पणजेंतल्यान सांतइनेज, ताळगांव कडेन वचपा खातीर बांदोडकार रस्तो – कांपाल गणेश मंदीर, मधुवन सर्कल ह्या रस्त्यांचो वापर करचो पडटा. गणेश मंदीर वगळ्ळ्यार हेर खंयूच ट्रॅफीक पुलीस तैनात करूंक नात. तशेंच सध्या वाहनांची येरादारी वाडत आसा.
सकाळीं तशेंच सांजे वेळार कार्यालयां सुटपाच्या वेळांत कला अकादमी ते कांपाल गणेश मंदीर रस्त्यार वाहनांच्यो रांको लागून येरादारीची कोंयडी जाल्ली दिसून येता. तशेंच कला अकादमी – ईएसजी – पोरणें सचिवालय ह्या रस्त्यांचेर लेगीत वाहनांच्यो रांको लागतात. शारांतलो पणजी बाजार वाठार पयलींच वाहनांनी भरिल्लो आसता. आतां थंयूय स्मार्ट सिटीचीं कामां सुरू जाल्ल्यान पणजे येरादारीची कोंयडी जाता. असोच त्रास रायबंदर वाठारांत रावपी थळाव्यांक सोंसचो पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
