भांगरभूंय | प्रतिनिधी
स्मार्ट सिटी पणजेंत चलत भोंवपी हालीं उणें जायतआसात. कांपाल ‘वाॅक वे’ चेर वाॅक करतल्यांचो आंकडो वाडत आसा. गाडयांची कोंयडी सोडोवपा पासत स्मार्ट सिटींत येवजण आशिल्ली ती चालीक लागली? फुलपाकुल्यांचें सुपुल्लें जार्दीन मळ्यांत जालें? मळ्यांतले तळें सोबीत केलें? कॅसिनो पणजे भायर दर्यांत सोडले? ह्या प्रस्नाच्यो जापो इमेजीन पणजीचे मुखेल कार्यकारी अधिकारी संजीत राॅड्रिग्ज हांणी सोदच्यो. संजीत फक्त पणजेंतल्या मुखेल वाठारांनी भोंवतले, मळ्यांतल्या तळ्याची सुवात आसा थंय वचपा खातीर वेळ तांकां काडचोच पडटलो. पावसाच्या तोंडार फेरीबोटी कडलें जार्दिन्य सुदारपाचो वावर करप कित्याक ? वर्क इन प्रोग्रेस दाखोवन पयशे मेळोवपाक?
सरकारान स्मार्ट सिटीच्या हालींच जाल्ल्या वावराचें आॅडीट करचें. बेगीन बेगीन वावर सोंपोवपाच्या बोवाळांत नवें अरिश्ट पणजेचेर येवचें ना हाची जतनाय घेवपाची गरज आसा. हालीं जो वावर केला तो बारीकसाणेन पळयल्यार ना खळयो, ना पासयो अशें चित्र आयनाॅक्स थिएटराच्या फाटल्यान आसा. खासा शिमिटाचे ब्लाॅक्स जोडून गाडयांचे पार्किंग करपाची वेवस्था केल्या, ते ब्लाॅक्स सारके बसयल्यात? सकाळीं भोंवल्यार नवे बस स्टाॅप लाॅजिंग, बोर्डिंग, स्लिपिंग पाॅयंट जाल्ले दिसतले.
स्मार्ट सिटीचे 90 टक्के प्रकल्प जाले जाल्यार उक्तावणां कितलीं जालीं? स्मार्ट सिटीच्या वावराचेर देखरेख दवरपाक, वेवस्थापन फांट्या पासत कर्मचारी भरती जाली? तंत्रीक तज्ञ मनीसबळ त्या फांट्यात आसा? बालभवना मुखार बांदिल्लो नवो प्रकल्प बेगीन उपेगांत हाडचो.
वीस वर्सां आदीं इफ्फीक येवकार दिवपाक बांदिल्ल्यो साधनसुविधा मोडपाचे वाटेर आसात, कट्टे तुटल्यात, फुटल्यात. कला अकादमीच्या मुखेल दारा भायर पडिल्लें फोंडकूल फाटले कांय म्हयने उत्सवांच्या दारांनी धांपलें. पावसा आदीं कला अकादमी ते मार्केट मेरेनेची पासय ताकतिकेन सारकी करपाची गरज उप्रासल्या. ती पासय रोमल्यार मुखेल रस्तो पावसांत बुडपाची शक्यताय आसा.
एकाच वेळार एक प्रकल्प पुरायपणान फुडें व्हरप पयल्या पांवड्यार बांदकामा वेळार मात्शें जालें. हालीं तीन चार म्हयने बांदकामां कसलेंच प्लॅनिंग नासतना जाल्यांत हें बारीकसाणेन पळयल्यार कळटा. व्हड अॅक्सिडेंटांक आपोवणे धाडपी हालींच्या बांदकामांचे आॅडीट सरकारान वेगळो इंजिनियर पंगड घडोवन करप समा जातलें. पणजी स्मार्ट सिटी खातीर केल्ल्या इमेजीन पणजी कंपनीच्या मंडळाची म्हयन्याक एक तरी बसका जाता? आमदार, म्हापौरांक ते बसकेक आपयतात? आपयल्यार तें वचनात, चालू आशिल्ल्या वावरा कडेन आडनदर करतात जाल्यार तांचे कडेन मुख्यमंत्र्यांनी उलोवचें पडटलें.
स्मार्ट सिटीच्या वावराच्या पयल्या पांवड्या वेल्या प्रकल्पांचो लाव ताळगांव मतदारसंघाक जाला हें सत. लाव जाला तो वाठार ताळगांव, पणजे दोनूय मतदारसंघांत येता. म्हापालिकेचे काय प्रभागूय ताळगांवां आसात. स्मार्ट सिटी पणजी मतदारसंघा पुरती आशिल्ली, म्हापालिकेच्या सगल्या प्रभागाचो आस्पाव पयल्या पांवड्यार जाल्लो ना हें खरें. ताचो अर्थ सगल्या प्रभागां खातीर प्रकल्प फुडें वच्चे न्हय अशें न्हय.
संजीत हांणी पाटो प्लाझा वाठारांत एकदां वचून पळोवचेंच. स्मार्ट सिटी प्रकल्पां खातीर हाडिल्ले डोझर्स, शाॅवेल्स, हेर मशिनां जाल्लीं बांदकामां इबाडायतात. जो पाटो प्लाझा काल आशिल्लो तो आयज ना, फाटल्या वर्सा भितर जाल्ले प्रकल्प पाटो प्लाझा अंदूं बुडयतले. शाराक चार दारां आसात, मुखेल दारा कडेन उदरगत चालू आसतना दुसऱ्या रस्त्यान येवपाक मेळटा. फुडल्या दोन तीन सप्तकांनी शाराच्या मुखेल दारा कडेन जो वावर सुरू आसा तो सोंपोवचो पडटलो.
शारांतल्या बायलेनींचे (मुखेल रस्त्याक लागून आशिल्ले ल्हान रस्ते) कितें? तांचे खातीर वेगळें प्लॅनिंग आशिल्लें, नकाशेय केल्ले ते प्रमाण तांची बांदावळ जाल्या? खंय पायपलायनी फुट्टात, खंय ड्रेनेजी बंद जाल्यात ताचो नियाळ करून म्हापौरांनी सरकाराक कळोवचेंच पडटलें. पावसा उपरांत पणजी फेरीबोट ते सांतामोनिका बोट धक्या मेरेन व्हड प्रमाणांत स्मार्ट सिटीचो वावर जावपाची शक्यताय आसा. फेरीबोटी कडल्या जार्दिन्याची पासय, दुरीग फोडप पावसा उपरांत जावंक येतालें. मूळ प्रकल्पांत नाशिल्लीं गरजे भायलीं बांदकामां स्मार्ट सिटीच्या 90 प्रकल्पा खाला जाल्यांत? रस्ते रुंद करतना पासयेचें मूळ रुपच शेणिल्लें दिसता, कांय कडेन रस्ते रोमिल्ले दिश्टी पडटात. रस्त्याच्या कोनशा कोनशाक बांदकामां अर्दकुटीं सोडिल्लीं दिसलीं आसुये. इमेजीन पणजेच्या सीईओंक.
इमेजीन पणजेच्या सीईओंचेर सरकाराच्या सचिवपदाची जापसालकी मागीर तांकां एके स्मार्ट सिटी पासत वेळ खंयचो मेळटलो? सचीव पदांतल्यान पुराय मेकळे जायत व्हय ते रोखडे? म्हापशें, मडगांव, मुरगांव केंद्राच्या शार सुदारप मिशन येवजणे खाला हाडपाक येवजणी बांदत? ते सिव्हील इंजिनियर नाशिल्ल्यान बांदकामाचें वेवसायीक पांवड्यार आॅडीट करूंक शकना.
पणजी म्हापालिका बिल्डिंग मात्शी मिशन स्मार्ट सिटी खाला हाडल्यार बरी जातली. म्हापालिकेची बिल्डिंग बेगीन जावपाकच जाय, म्हापालिका 25 वर्सां जातना. म्हापालिका तशी ल्हान, दुर्गावाडी ताळगांवांक लागीं हाडून पणजी म्हापालिका करतना कितें उतर दिल्लें पणजेचे पयले म्हापौर अशोक नायक हांकां? म्हापालिका वेंचणूक लागीं येता तेन्ना स्मार्ट सिटीची उदरगत आडावप शक्य ना. पावसा आदींचो अंदूंचो वावर सुरू जाला, झाडांच्यो खांदयो कापून रस्त्या कुशीक एकठांय करपाक, पानांची माती, शिमीट करपाक बालभवना कडल्या प्रकल्पांत यंत्रां आसात?
इमेजीन पणजे सिटी खाला जाल्ल्या स्मार्ट सिटीच्या वावरांत कितले कंत्राटदार आसात? मुळावी एक कंपनी आनी धा कंत्राटदार, तातूंत तंत्रीक नेमावळीची जाणविकाय नाशिल्ले कमीच स म्हणून स्मार्ट सिटीचें खणप परतून परतून चालूच दवरचें पडटा व्हय?
स्मार्ट बोर्डा वेल्यान स्मार्ट नकाशे जाल्ले आसतय पूण स्मार्ट सिटीची बांदावळ पुराय जातना ते बदलचे पडटले हें सत न्हयकारप शक्य ना. स्मार्ट सिटी पणजी गोंयचें राजपाटण, येणावळ जाॅयंटय जालां भोंवतणी रावपी सगल्यांक. कला अकादमी लागसरचो दयानंद बांदोडकार ग्रावंड क्रिकेट आनी हेर खेळां पासत कमी वेळ मेळटा, नाजाल्यार तो पार्किंग, फेस्तांचीच सुवात. कला अकादमीचे फाटले वाटेन चाफ्याचीं झाडां लायल्यांत तशींच कांपाल ग्रावंडार चारय कोनशांनी जुलय म्हयन्यांत लावचीं. वड, कोडुलिंबू, आंबो, काजवांचीं झाडां कांपाल ग्रावंडार लायल्यार नवो ग्रीन स्पेस तयार जातलो, उश्णताय उणी जातली. स्मार्ट सिटीचे मुळावे येवजणेंत तजवीज करपाची विनवणी पणजेकारांनी केल्ली, आॅडिटय तांकां जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
