भांगरभूंय | प्रतिनिधी
जी - 20 बसके पासत पणजी स्मार्ट सिटी प्रकल्पांत मांडवी न्हंयचेर कोस्टल रोड, दयानंद बांदोडकार मार्गा वयल्या विकासकामांची ताकतीक सरकाराक लागल्या. युथ हाॅस्टेल ते धेंपो हावसा मेरेन कोस्टल रोड – वाॅक वे पुराय जाला. मिरामार दर्यादेग वाठार सोबीत जाता, बांदोडकार मार्गा वेल्यो पासयो, रस्ते स्मार्ट जातना शारांतले लोक त्रास सोंसतात. ह्याच न्हय तर शारांतल्या हेर मुखेल मार्गार जावपी येरादारीची कोयंडी फोडपाक सरकाराक जैत मेळटलें, तेन्नाच पणजी खऱ्या अर्थान ‘स्मार्ट’ जाली, अशें गोंयकार म्हणटले. स्मार्ट सिटीच्या विकासकामांनी प्रयोग व्हडा प्रमाणात जातात तें बारीकसाण घेतल्यार कळटा. दयानंद बांदोडकार मार्ग स्मार्ट जातनाच केल्लो वावर उदकांत व्हांवन वचचो ना, हाची जतनाय घेवंक जाय. मार्गाचो स्मार्टनेस दोन वर्सां तरी उरपाक जाय. हेर विकासकामां बेगीन पूर्ण जावचीं. तांचेर नदर दवरप, राखप हे खातीर वेगळें मनीसबळ ‘इमेजिन पणजी’ कंपनीत आसचें.
पणजी एकल्याची न्हय, पणजेंत पणजेकारां परस चड बाकीचे गोंयकार रावतात, गोंयां भायल्यान येवन राविल्लेय हजारांनी आसात. शेंकड्यांनी हातांनी रातदीस स्मार्ट सिटीची ताकतिकेन बांदावळ करतल्यांक शार स्मार्ट करपाचें क्रेडिट दिवपाक जाय. पणजेक स्मार्ट सिटींत घालपा पासून निधी हाडपा मेरेनच न्ही जाल्यार येवजण तयार करून ती मुखार व्हरपाक आदले मुखेलमंत्री मनोहर पर्रीकार हांचो व्हड वांटो आसा, हें कोणच न्हयकारपाक शकचोना. मनोहर मोपा विमानतळा उपरांत पणजी स्मार्ट सिटीची व्हडवीकाय सांगपाची, दाखोवपाची संद गोंय सरकाराक मेळटा.
मुख्यमंत्री डाॅ. प्रमोद सावंत हांच्या फुडारपणांतूच स्मार्ट सिटीची बांदावळ नेटान जाता, तेन्ना शारांतल्या नागरिकांक मेळप तांची लागणूक आसा. इमेजिन पणजी कंपनीचें मुखेलीपणय मुख्यमंत्र्यां कडेनच आसा, शारांतले उदरगतीच्या वावराचो ते नियाळ हालीं घेवंक लागल्यात. जी- 20 परिशदेचे समन्वय अधिकारी संजित राॅड्रिग्ज हांकां वांगडा घेवन एकदां ते शाराची भोंवडी करत व्हय? जी 20 बसके मागीर पावसा आदीं तांणी साधन सुविधा म्हामंडळ, बांदकाम खात्या वांगडाच स्मार्ट सिटीचे येवजणेत वांटेकार आशिल्ल्या इंजिनियर, आर्किटेक्टांक घेवन विकासकामांचो नियाळ घेवचो. पंचवीस वर्सां जावंक नाशिल्ली उदरगत पणजे आतां जाता, अशें म्हणप समा न्हय. येरादारीचे कोयंडेतय पणजेचो स्मार्टनेस समेस्तांक दिसता, फुडल्या स म्हयन्यांनी जेन्ना राष्ट्रीय खेळां सर्ती जातल्यो तेन्ना पणजी नसाय जावपा इतली अती स्मार्ट जातली हातूंत दुबाव ना. स्मार्ट सिटी खातीर तिजोरेंत आशिल्लो पयसो खर्च करपाक सरकारान जैत मेळयलां. केल्ल्या खर्चाचीं फळां गोड आसतलीं, दुपेटीन निधी मेळोवपाक उपेगी थारतलीं.
स्मार्ट सिटी खातीर एकाच वेळार सगल्या रस्त्यांनी, प्रभागांनी विकासकामां कित्याक करतात, अशे प्रश्न समेस्त विचारतात, तेन्ना तांकां मुख्यमंत्र्यांनी जाप दिवपाक जाय. उदरगत मार्गाक लागल्या अशें केंद्र सरकाराक कळयतकीच आडायल्लो पयसो सरकारी तिजोरेंत कसो येता, हीं गणितां आदल्या मुख्यमंत्र्यांनी विधानसभेंत सोंप्या उतरांनी नकळटां मांडल्यांत. अर्थमंत्र्यांक ‘वर्क इन प्रोग्रेसा’चें गणित मांडपाचे अधिकार आसात.
स्मार्ट सिटीचें स्रय कोणा एकल्याचें न्हय. पणजेकारांचोय तातूंत वांटो आसा. ते रस्त्या रस्त्यांनी देंविल्ले जाल्यार पणजी स्मार्ट सिटी मार्गाक लागची नासली. संजीत राॅड्रिग्ज म्हापालिका आयुक्त आसतना पणजी स्मार्ट करपाक सुरू केल्ले येत्न सवकासायेन फळादीक जाल्यात. गोंयच्या हेर शारां परस पणजे कोयर वेवस्थापन बरें आसा, वर्सा भितर ते विशींची येवजण मार्गाक लागतली, अशी आस्त. संजित हे आदले मुख्यमंत्री पर्रीकार हांच्या कार्यालयांतल्यान व्हड जाल्ले अधिकारी. पणजे म्हापालिकेचे पयले आयुक्त, इफ्फी, साळगांव कोयर वेवस्थापन प्रकल्प, पणजी स्मार्ट सिटी ते जी 20 समन्वयकाच्या वावराचीं सुत्रां तांचे कडेन विश्वासांतल्यान आयल्यांत. आमदार दिगंबर कामत हे मुख्यमंत्री आसतनाय संजीत तांच्या कार्यालयांत आशिल्ले, तांच्याय विश्वासांतले. रातदीस सरकारी वावरांत बुडपाक तांकां पर्रीकार हांणीच शिकयल्लें. आयएएस अधिकारी म्हणून तांचेर म्हत्वाची जापसालदारकी डाॅ. सावंत हांणी घाल्या, लागणुकेक ते पाळो दितले, गोंयचें नांव बरे तरेन संवसारात पावयतलेच. स्मार्ट सिटींतल्या उदरगतीचो तांचो नियाळ सुदारपाक मजत करतलो. पणजे म्हापालिका आयुक्त आसतना संजीत आनी आमदार कोयर वेवस्थापनमंत्री आतानासियो ( बाबुश ) मोन्सेरात हांचें आशिल्लें वांकडेपण स्मार्ट सिटी वांगडा सोंपल्यार स्मार्ट कोयर वेवस्थापन, नवे स्मार्ट सिटीचो मार्ग मेकळो जातलो. संजीत हांकां तांची देसा कडली लागणूक गोंयां इतलीच व्हड हें खबर आसतलेंच. आडमेळीं मोडून काडपाची कळाशी तांचे कडेन आसा.
स्मार्ट सिटीचो वावर फुडें व्हरपाक आदले मुख्यमंत्री लक्ष्मीकांत पार्सेकार हेय एक वांटेकारच. तांचोय विश्वास संजित हांणी जोडिल्लो. आदले उपमुखेलमंत्री, नगर विकासमंत्री फ्रान्सिस डिसोझा हेय मोन्यांनी पणजे स्मार्ट सिटी करपाक हय म्हणपी.
मंत्री मोन्सेरात, महापौर रोहित मोन्सेरात, नगर विकासमंत्री विश्वजीत राणे हे स्मार्ट सिटीचे उदरगतींत थेट नासले तरी पणजे कडली तांची लागणूक म्हत्त्वाची. मोन्सेरात बापूय, पूत पणजे लागसारच रावपी, आमदार आनी महापौर म्हणून दोगांयकय पणजेची उदरगत जायच. मंत्री राणे हांचें भुरगेपण आनी राबितोय पणजे लागसार. पणजेत तांणीय भोंवप बरें. शार आनी नगर नियोजन खात्या परस नगर विकास मंत्रीपदाक भोव म्हत्व आसा. पयलींचे नगर विकासमंत्री मिलिंद नायक ते समजूंक शकले नात. श्री. राणे हांणी वेवस्थापन शास्त्राचे पदवेचो उपेग केल्यार खात्याक नवी वाट दिसतली. म्हापालिके सयत सगल्या नगरपालिकांचे भोंवडेर तांणी वच्चें. पेडणे स्मार्ट सिटी विशीं ते उलयल्यात, मुरगाव आनी मडगाव म्हापालिका करपा पासत तांणी लोकप्रतिनिधीं कडेन उलोवचें. शारां स्मार्ट करपाचे केंद्रीय येवजणेचो लाव ते घेतलेच, नियोजनातले बुदवंत तांचे बराबर आसात. आदल्यो साधनसुविधा मोडपाचे वाटेर आसतात, कावलाक वतात तेन्ना नवनिर्मणे बराबर पुनर्स्थापनेचे मार्गय आसात. स्मार्ट सिटी पणजी अटल शार पुननिर्मणेंतल्यान फुडें सरली. हेर शारांय मोडचे आदींच शार पुननिर्मणेची मोख पर्रीकार हांचे वरी श्री. राणे हांणी दवरची, तीय केंद्रीय निधींतल्यान.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
