भांगरभूंय | प्रतिनिधी
पणजी ः पणजी स्मार्ट सिटीच्या 51 प्रकल्पां खातीर वट्ट 1051 कोटी रुपया मंजूर केल्यात. तातूंतले 849 कोटी रुपया खर्चाचे 42 प्रकल्प पुराय जाल्यात. ही आंकडेवारी 4 मार्च 2025 मेरेनची आसा. केंद्रीय नगर विकास राज्यमंत्री तोखान साहू हांणी राज्यसभेंत दिल्ल्या लेखी जापांतल्यान ही म्हायती मेळ्ळ्या. खासदार सदानंद शेट तानावडे हांणी हे संबंदी प्रस्न विचारिल्लो.
जापेंत दिल्ले म्हायती प्रमाण, केंद्र सरकारा कडल्यान पणजी स्मार्ट सिटीक 51 प्रकल्पां खातीर 1051 कोटी रुपया मंजूर जाल्यात. तातूंतले 849 कोटी रुपयांचे 42 प्रकल्प पुराय जाल्यात. जाल्यार 202 कोटी रुपयांचें 9 प्रकल्पांचें काम सुरू आसा. वेगवेगळ्या राज्य सरकारांनी आनी केंद्रशासित प्रदेशांनी केल्ल्या विनंतींक लागून केंद्रान स्मार्ट सिटी प्रकल्पांची मुजत 31 मार्च 2025 मेरेन वाडयल्या.
पणजी स्मार्ट सिटीन दिल्ले म्हायती प्रमाण, प्रकल्प चालीक लावपा खातीर वेगवेगळ्या खात्यां कडल्यान मान्यताय मेळोवपाक जावपी कळाव, भूसंपादन, भूजल समस्या, हंगामी पावस, साधनसुविधा उपलब्धताय, बांदकाम सामानाची खरेदी अशी आव्हानां आशिल्ली. हे खातीर स्मार्ट सिटीन काम बेगीन करपा खातीर वेगवेगळीं पावलां उबारल्यांत, तातूंत अतिरिक्त मनीसबळ तैनात करप, तीन शिफ्टांनी काम करप, संबंदीत खात्या कडल्यान बारीक नदर दवरप हांचो आस्पाव आसा.
केंद्रा कडेन कसलीच कागाळी आयली ना….
पणजी स्मार्ट सिटीन दिल्ले म्हायती प्रमाण, गोंयांतल्या सध्याच्या तंत्रीक आनी अर्थीक नेमा प्रमाण हांगाच्या कामां खातीर कंत्राटदार वा एजन्सी वेंचून काडल्या अशें दिल्ले जापेंत म्हळां. हातूंत कसलेंच उल्लंघन जालां अशी कागाळ केंद्र सरकारा कडेन आजून आयली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
