भांगरभूंय | प्रतिनिधी
भांगरभूंय । प्रतिनिधी
पणजीः पणजी शारांतली स्मार्ट सिटी प्रकल्पाची कामां करपाक कळाव जाल्ले खातीर मंत्री आनी थळावो आमदार बाबूश मोन्सेरात हांणे आयतारा पणजेकारांची माफी मागली. शिवाय पाशेंक काडल्ले खातीर तांचे उपकार लेगीत मागल्यात.
लोकसभा वेंचणुकेंतले भाजपाचे उत्तर गोंयचे उमेदवार श्रीपाद नायक आनी मोन्सेरात हांणी भाजप पदाधिकारी आनी वावुरप्यां वागडा पणजेच्या वेगेवगळ्या वाठारांत वचून प्रचार केलो. ह्या वेळार पत्रकारांनी बाबूश हांका स्मार्ट सिटीच्या कामां विशीं विचारले तेन्ना कामाक कळाव जाल्ले खातीर हांव पणजेकारांची माफी मागता अशें सागून 31 मे मेरेने स्मार्ट सिटीचीं सगळीं कामा कसलेय परिस्थितींत पुराय करपाचें उतर दिलें. पणजेकारांक जे त्रास काडचे पडटात ते खातीर आपूण खंती आसा अशेंय तांणी सांगलें.
मजगतीं, स्मार्ट सिटी प्रकल्पा खाला राजधानी पणजी शारांत फाटल्या सुमार देड वर्सां सावन रस्ते, मल निस्सारणाची पायपलायन घालपाची काम चल्ल्यांत. वचत थंय रस्ते फोडून ते येरादारी खातीर बंद केल्यात. ताचो फटको वाहन चालकांक सोसचो पडटा. स्मार्ट सिटीच्या कंत्राटदारांच्या घाळपणाक लागून पणजी शारांत धूल्लाच्या प्रदुशणांत वाड जाल्या. ताचो फटको थळाव्या लोकांक बसता. ताका लागून कांय लोकांनी उच्च न्यायालयांत केल्ल्या जनहित यायिकांची दखल घेवन उच्च न्यायालयाच्या न्यायमूर्तींनी फाटल्या सप्तकांत पणजे चलिल्ल्या कामांची प्रत्यक्ष पळोवणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
