भांगरभूंय | प्रतिनिधी
पणजी: गोंयांत स्मार्ट वीज मिटर बसोवपा खातीर केंद्र सरकारा कडल्यान स्वतंत्र निधी मेळटलो. तशेंच हे खातीर केंद्रा कडल्यान कळंतर नाशिल्लें रीण लेगीत मेळटलें अशें मुख्यमंत्री डॉ. प्रमोद सावंत हांणी सांगलें.
सोमारा विधानसभेंत विरोधी पक्ष फुडारी युरी आलेमांव आनी हेर आमदारांनी मांडिल्ल्या लक्ष ओडपी सुचोवणेचेर ते उलयताले.
ताचे पयलीं विरोधी आमदारां सयत निलेश काब्राल हांणी वीज दरवाड, स्मार्ट वीज मिटर, खात्याची थकीत बी मुद्द्यां वेल्यान वीज मंत्री सुदिन ढवळीकार हांकां प्रस्न विचारले.
युरी आलेमांव हांणी म्हणलें, खात्यान फुडल्या तीन वर्सां खातीर सुमार पांच टक्के दरवाड प्रस्तावीत केल्या. हाका लागून पयलींच म्हारगायेन बेजारिल्ल्या सामान्यांचेर आनीक वजें वाडटलें. दरवाडीतल्यान खात्याक 200 कोटी रुपया महसूल अपेक्षीत आसा. पूण ताचे पयलीं खात्यान 600 कोटी रुपयांची थकबाकी वसूल करप गरजेचें आसा. खूबशा सरकारी खात्यांनी लेगीत वीज बिलां थकयल्यांत. दरवाडी खातीर सरकार जेईआरसीचे नांव मुखार करीत आसा. पूण 2022 वर्सा जेईआरसीन दिल्ली दरवाड मंजुरी सरकारान आडायिल्ली.
आलेमांव हांणी म्हणलें, सरकार सांगता स्मार्ट मिटरा खातीर 890 कोटी रुपया खर्च जातलो. हातूंत केंद्र सरकार फक्त 20 कोटी रुपया खर्च दितलें. उरिल्ले 870 कोटी रुपया गोंय सरकाराक खर्च करचे पडटले. वीज खात्याक वर्साक पयशे मेळत आसले तरी मिटर बसोवपा खातीर सामान्य लोकांचेर कितलें वजें घालतले हाची म्हायती दिवप गरजेची आसा. तशेंच सरकारान सुमार 39 हजार वीज गिरायकांक तांच्या मिटराची सुवात बदलपाक सांगल्या. हाका लागून लेगीत लोकांक तालांव पडटलो.
मंत्री सुदिन ढवळीकार हांणी म्हणलें, स्मार्ट मिटर ही येवजण केंद्र सरकाराची आसून ती सगल्या राज्यांनी सुरू केल्या. हे खातीर आमकां केंद्रा कडल्यान निधी मेळटलो. गोंयांत वीज खात्यांतल्या मुळाव्या सुविधां खातीर खर्च जायत आसा. दरेक मतदारसंघांत वेगळीं वेगळीं कामां करतात. हे खातीर दरवाड करप गरजेची आसा. अशें आसलें तरी हेर राज्यांचे तुळेन गोंयांतलो वीज दर उणोच आसा. वीज मिटर हालोवपाची सुचोवणी लेगीत केंद्राच्या नेमा प्रमाणूच दिल्या.
5 हजाराच्या मिटरा खातीर 11 हजार रुपया कित्याक दिवचे
खात्यान आदीं बील न भरपी लोकांक स्मार्ट प्रिपेड मिटर दिवचे. तांकां लागून सामान्य लोकांक लेगीत दरवाडीचो फटको बसता. बाजारांत स्मार्ट मिटर पांच हजार रुपयांक मेळटा. अशें आसतना ते खातीर 11 हजार रुपया कित्याक दिवचे असो प्रस्न आमदार निलेश काब्राल हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
