भांगरभूंय | प्रतिनिधी
स्मार्ट सिटीच्या वावराची ताकतीक जाय हो लेख 15 दिसां आदीं बरयिल्लो. लोकसभा वेंचणुकेचें मतदान सोंपतकीच सवकासायेन जावपी पणजेंतल्या वावरांत चड मनीसबळ आयिल्लें. वेंचणुकेक घरा गेल्ल्या कामगार, कंत्राटदारां बदला दुसऱ्या कामगारांचो आसपाव करुन काल मेरेन खणून दवरिल्ल्या रस्त्याचें, पायप लायनीचें काम रातींय चालू आशिल्लें. नियोजन, वेळाची दिसपट्टी नाशिल्ल्यान वावराक निमाणे कडेन ताकतीक करची पडटा. अशा ताकतिकेन केल्ल्या वावराची परीक्षा पावसांत आसतली. पावस खूब पडल्यार पणजेंतलो हालींतेंपार बुडपी वाठार बुडचो ना, आदल्यो बिल्डिंगो, बिल्डिंगेची पाखीं, वणटी पडच्यो नात, पत्रे हुबून वच्चे नात हाची जतनाय घेवची पडटली. शिटकावणी दिवपी राजभासेंतल्यान देवनागरी तकटे लावचे पडटले.
न्हिदपाचो सुवातो
पडिंग बिल्डिंगो, स्मार्ट सिटीचे रस्ते, बसस्टाॅप, वाॅक वे आतां सुशेगाद न्हिदपाच्यो, खावपा- जेवपाच्यो सुवाती जाल्यात. त्या सुवातींचेर तशेच स्मार्ट वावराचेर नदर दवरपी समित्यो, खासा पंगड करचेच पडटले. सगल्या खात्यांच्या कामगारांचो आसपाव आशिल्ल्या पंगडांक ‘जागते रहो’ अशी शिटकावणी मोबायलावेल्यान दिवपी यंत्रणा बांदपाक जाय. पणजे वरीच हेर नगरपालिकांनी तशा पंगडाची बांदावळ जाल्या काय ना हाचो नियाळ नगरविकास मंत्री घेवंक लागल्यात. एकदां तांणी शारांची भोंवडी अधिकाऱ्यांक घेवन करचीच.
पाटो पणजी, जिल्लोधिकारी कचेरी, १८ जून मार्गा वयलीं दुकानां, बगलेंतले रस्ते, मळ्यांतलो वाठार, कला अकादमी राखण्यांक उदकाचो विलो लावपाक शिकोवपाक जाय. शारदा मंदिरा कडलो लोखणाचो पूल ताकतिकेन गुठलावचो नाजाल्यार मोटारींचेर पडून अपघात जातलो ही शिटकावणी बारीकसाणेन पळोवपी नागरिकांनी दिल्या. तकटे लायले म्हणून जावचें ना, शिटकावपी नागरीक शिकिल्ले आसात, हें लक्षांत घेवचें आनी फुडें जावपी घडणुके विशीं चितचें आनी पूल काडचो. समित्यो नेमतकीच तांकां वेळाचे बंधन घालचें पडटा. वेळेर वावर जालो ना जाल्यार अपघात जातलेच, त्याभायर लोकांक टेन्शन जाता, भलायकेक धोको उपरासता.
ताडपत्री वाऱ्यांत तिगतली?
कला अकादमीच्या फाटल्या वर्सा कोसळिल्ल्या पांख्याचे काँक्रिट काडपाक एक वर्स कित्याक लागप? गळटी लागतकीच कला अकादमींतल्या मुखेल थिएटराचेर घाल्ली प्लास्टिक ताडपत्री रों रों वाऱ्यांत तिगतली? दिव्यांग, समाज कल्याण खातें आशिल्ली इमारत, उत्तर जिल्लोधिकारी बिल्डिंग, आदिलशहाचो राजवाडो, फार्मासी म्हाविद्यालयाक ताडपत्रेचो आलाशिरो कितलो तेंप घालतले? त्या वाठारांची, खोपींची पळोवणी पावसाआदीं मंत्री, थळावे आमदार करतले? हजारांनी विद्यार्थी, शेंकड्यांनी येवपी- वचपी लोकांचो कर्मचाऱ्यांचो विचार जातलो?
स्मार्ट सिटींतल्या मुखेल वेवसायीक आस्थापनां आशिल्ल्या 18 जून मार्गाच्या जोडरस्त्यांचो वावर जाला. सांतिनेज पीएनजी ज्युवेलर्स ते सिमेट्री मेरेनचो रस्तोय जायत आयला, काकुलो माॅल ते टोंका मेरेनचे रस्तेय नवें रुप घेतात. नव्या रुपांतल्यान रस्ते रुंद जाल्ले दिश्टी पडटात. गुजरात लाॅज ते सालसेत फार्मासी मेरेनचे रस्ते सुदारप, पाटो प्लाझांत नव्यो साधनसुविधा उबारप, कोयराच्यो राशी काडपाचें आव्हान आसा. पणजेचो होच वाठार बुडटा, रुआ द ओवरेंम नाल्यांत खांबे घालून केल्ल्या बांदकामांतल्यान भोंवतणी बुडटी येतली. कोयर वेवस्थापनमंत्री आतानासियो मोन्सेरात, अधिकारी संजित राॅड्रिग्ज हांणी एकदां पाटो प्लाझाची पळोवणी करची. दोन वर्सां भितर नाशिल्लीं बांदकामां जाल्ल्यान साधनसुविधांचेर चेपण पडलां. परशुराम पुतळ्या कडेन जावपी गर्दी, वाॅक वे चेर अजूनय सुरु आशिल्लें बांदकाम, नव्यो जेटी, मजगती महावीर भुरग्यांच्या जार्दिन्यातले टाॅयलेट ब्लाॅक्स भोंवतणच्या पर्यावरणाक म्हारग पडटले?
उदकाक वाट मेळना
काँक्रिटीकरण जातनाच कांपाल वाॅक वे फाटल्यान पाचवोताल्ल वाठारय वाडला. नवीं दारां, नव्या वाटेंतल्यान त्याय वाठारांत पावसाच्या उदकाक वाट मेळना. पाचव्यो सुवाती पाटो प्लाझार जावच्यो, एका तेंपार तसो वावर श्री. राॅड्रिग्ज हांणी खासगी कंपनींच्या सांगातान केल्लो. तें कामकाज, ते येरादारी जुंवे उरल्यात? दिवजां सर्कलाक नवें रुप कित्याक मेळचें न्हय? नवरत्न दिवे अजून पेट्टात? नियाळ करचो. आंबेडकर गार्डना कडेन दर पावसांत कित्याक बुडटी येता? मात्सो अभ्यास जावचोच. 18 जून मार्गार वेपारी वेवस्थापन वाठारांतल्यान पासयांचेर जाल्लीं आक्रमणां पावसा आदीं उखलचीं पडटलीं. येरादारी खातीर हाडिल्ल्यो ल्हान, व्हड गाडयो सुदारिल्ल्या जोड रस्त्यांचेर (बायलेन्स) दवरल्यार उदक भरप उणे जातलें. त्या वाठारांतल्या खळयांनी कोयर उडोवचो न्हय हे खातीर वेवस्था जाय. दुकानदार, वेपारी, वेवसाय करतल्यांनी आपल्या दुकानांच्या वण्टींचेर शिटकावणी दिवपी हातपत्रक कित्याक दसवचें न्हय? रस्त्यार, रस्त्याचे देगेक कोयर उडोवचो न्हय हे खातीर पणजी म्हापालिकेन सप्तकभर जागृताय करची. वेंचणुकेंतल्यान पयलीं पणजी म्हापालिका स्थापनेचें अंदू विसावें वर्स. म्हापालिका कायद्याचेर भासाभास खासा बसकेंत जावची.
खाणांच्यो सुविधा तयार जावच्यो
बुडटे पणजेंत येणावळ पाॅयंटस तयार जातात ताचो लाव सायकलीर खाणां विकपी घेतात. परशुराम क्षेत्र सेल्फी पाॅयंट जाता, थंय लागसार भोंवपी गाड्यार खाणा- जेवणाच्यो सुविधा आतां तयार जावच्यो. युथ हाॅस्टेला लागीं एका पाॅयंटार खाणा जेवणांचो ल्हान ट्रक सांजवेळा येता. पणजी बुडल्यार रोखड्या रोखडी उदका मेकळी करपा पासत यंत्रणा म्हापालिका, उजो पालोवपी दळ, पुलीस करतात. यंत्रणेक जागोवपी नगरसेवक, महापौर, उप महापौरही आसात. नगरसेवकांची नवी पिळगी पणजेंत फुडले वेंचणुकेतल्यान पणजेकारांक मेळटली हे खातीर वावर जाता.
परतून एकदां पणजी चिखलांतल्यान, न्हंयचेर शिस्तीन माती, काँक्रीट घालून तयार जाल्ली, म्हेळ्या उदकाक मेकळ्यो वाटो दवरिल्ल्यो हाची याद करुन दितां. पणजेच्या सगल्या प्रवेशदारां कडलो वाठार बांदकाममुक्त करपाचो उलो मारतना मिठागरां, शेतांतल्यान येणावळ मेळोवपाची येवजण चालीक लावपाक येता. आदिलशहाच्या राजवाड्यांत सुदारणा करुन, पांखे बदलून थंय म्युझियम जल्माक घालचो. कोट्ट्यांनी रुपये खर्च करुन केल्ली येवजण कुलपांनी कित्याक बंद करुन दवरल्या?
सुचोवण्यांचेर कार्यवाही जाय
पणजी स्मार्ट सिटी पणजे ते बांबोळी, ताळगांव, ओल्ड गोवा मेरेन जोडिल्ली आसा, पर्वरेकय ताचो लाव मेळपाक जाय. पर्वरे पठारार उदका वेवस्थापन पणजेंतल्यान करपाची येवजण आशिल्ली ती चालीक लागची. मूळ सांताक्रूज (कालापूर) वाठारांत राबितो करपी डाॅ.नंदकुमार कामत म्हापशां पावल्यात. तांणी पणजेच्या जीवसंपदेचो, उदका तळ्यांचो अभ्यास करुन केल्ल्यो सुचोवण्यो स्मार्ट सिटी कंपनी वेवस्थापनाक दिल्ल्यो. त्या सुचोवण्याचेर कार्यवाही जाल्यार पणजी बुडपा पासून वाटावतली. त्यो सुचोवण्यो विज्ञानिक नदरेंतल्यान अभ्यास करुन केल्ल्यो आसात.
पणजी आतां म्हातारी जाल्या ह्या अ. ना. म्हाम्ब्रेंच्या पुस्तकांतले पणजेक पळयतना देस विदेसांतले पणजेकार ही तीच पणजी अशें म्हणपी आसतले. भौशीक साधनसुविधा सुदारतना पोरण्या बिल्डिंगांचे प्रस्न थंयच पडून आसात. स्मार्ट पणजेचेर नदर दवरतना पणजेच्या आमदारांनी पडिंग बिल्डिंगांचो प्रस्न सुटावो करपाक जाय. मनार घेतल्यार, इत्साशक्त आसल्यार वर्सा भितर पणजे म्हापालिकेच्या मोडिल्ल्या बिल्डिंगेचो एक पाॅयंट पळोवंक मेळटलो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
