भांगरभूंय | प्रतिनिधी
संजीत रॉड्रिग्सः स्मार्ट कार्ड आनी ट्युमोक अॅपाचें लॉचींग
भांगरभूंय । प्रतिनिधी
पणजीः पणजी शारांत ईव्ही बशीं खातीर तिकेट बूक करपा खातीर स्मार्ट कार्ड आनी ट्युमोक अॅप लाँच केला. स्मार्ट बशींनी प्रत्यक्षांत तिकेट दिवपा खातीर आतां कंडक्टर आसचे नात. ही प्रक्रिया आतां डिजिटायज जाल्या, अशें स्मार्ट सिटीचे एमडी संजीत रॉड्रिग्स हांणी सांगलें.
स्मार्ट सिटीच्या स्मार्ट बशीचें तिकेट बूक करपा खातीर स्मार्ट कार्ड आनी ट्युमोक अॅपाचें लॉचींग पणजे आल्तीन कर भवनांत जालें. ह्या वेळार स्मार्ट सिटीचे एमडी संजीत रॉड्रिग्स आनी कदंब येरादारी महामंडळाचे एमडी डेरीक नॅटो हांचे वांगडा ट्युमोक कंपनीचे पदाधिकारी आनी हेर अधिकारी हजर आसले.
हें कार्ड पुराय आयुश्यभर चलतलें. फक्त हातूंत 150 रुपयांचो रिचार्ज करचो पडटलो आनी 75 रुपयांच्यो रिचार्डाची तातूंत स्मार्ट सिटी भर घालतली. ह्या कार्डा वरवीं 10 रुपयांनी साडेसात मार्गांचेर प्रवास फुकट जाता. जर कार्ड वापरची इत्सा नासत जाल्यार ट्युमोक हो अॅप आसा. तो डावनलोड करून ताचेर तिकेट बूक करची. तिकेट बूक केले उपरांत क्यूआर कोड येतलो आनी ताचेर पेमेंट करचो, अशी म्हायती रॉड्रिग्स हांणी दिली.
पणजी बस स्टेंड, पणजी फेरी धक्को, पणजी मार्केट, मिरामार दर्यादेग आनी गोंय वैजकी हॉस्पिटल बांबोळे हीं कार्डां करपा खातीर आनी रिजार्ज करपा खातीर सुविधा उबारल्यात. तशेंच ह्या अॅपा वरवीं हें कार्ड रिजार्ज करपाक मेळटा. सामान्य आनी वरिश्ठ नागरिकां खातीर सवलती प्रमाण वेगवेगळीं कार्डां आसात. ते भायर ह्या कार्डा वरवीं विद्यार्थ्यांक 50 टक्के सूट मेळटली, अशें रॉड्रिग्स हांणी सांगलें.
शारांत 10 रुपया भितर जाल्यार शारा भायर 20 रुपया हे तिकेटीचे दर आसात. बशींत भितर सरचे पयलीं दारार, कावंटरांचेर हें कार्ड नाजाल्यार मोबायल फोन स्केन करचो आनी भायर सरचे पयली ही प्रक्रिया परत करची. भायर सरतना स्केन करूंक विसरले जाल्यार 5 रुपयांचे सुवातेर. 20 रुपयांची तिकेट लागतली. प्रवाशांक मजत करपा खातीर 20 स्वयंसेवकाची निवड केल्या, अशेंय रॉड्रिग्स हांणी सांगलें.
हे कार्ड हेर कदंब बशींचेर चलतले. पणजी शारा भायर ज्यो कदंब बशी डिझॅलाचेर चलतात त्या बशींच्यो तिकेटी ह्या कार्डा वरवी बूक करपाक मेळटात. कडंक्टरां कडेन पीओएस माक्न आसतलें ताचेर हें कार्ड स्कॅन करचें तशेंच शटल बशींच्या कावंटराचेर हें कार्ड वापरपाक शकतात, अशें कदंब महामंडळाचे एमडी डेरीक नॅटो हांणी सांगलें. पणजी शारांत 7 मार्गांचेर 48 बसी धांवतल्यो. पुण सध्या सातांतले तीन मार्ग बंद आसात आनी 21 बशी ह्या मार्गांचेर चलतात. 31 ऑगस्ट मेरेन ह्यो सगळ्यो 48 बशी चालीक लागतल्यो अशें नॅटो हांणी सांगलें.
दर्जा कडेन कसलीच तडजोड नाः संजीत रॉड्रिग्स
रस्त्यांचीं कामां पुराय करतना दर्ज्या कडेन कसलीच तडजोड करूंक ना. ह्या रस्त्यांक 10 वर्सांची वॉरंटी आसा. पणजी शारांत फुटपाथींचे काम उरलां. लोकांक विस्वासांत घेवन हें काम फुडें व्हरतात. ताडमाड रस्त्यार 9 मिटर खोल सिवेजीचें पायप घालपा खातीर कंत्राटदार आनी सल्लागारांनी दोन आराखडे तयार केल्यात. हे खातीर आमकां तंत्रज्ञानाची गरज आसा. अजून मेरेन तें आमकां मेळूंक ना, अशें संजीत रॉड्रिग्स हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
