भांगरभूंय | प्रतिनिधी
-प्रक्रियेक ना सुरवात, ना त्या जाग्याचो सोद; अर्थसंकल्पांत मुख्यमंत्र्यांनी केल्ली घोशणापणजीः पुर्तुगेजांनी हजारां परस चड देवळां नश्ट केल्यात. ताचे सुवातेर एकूच यादस्तीक देवूळ बांदपाची शिफारस करपी समितीन सरकाराक सादर केल्ल्या अहवालाक एक वर्स जालें, पूण सरकारी पांवड्यार कसलीच प्रक्रिया सुरू जावंक ना. तशेंच स्मारक देवूळ बांदपाची सुवात सरकारान अजून थारावंक ना हें उजवाडाक आयलां.
नश्ट जाल्ल्या देवळांच्या पुनर्बांदणी खातीर सरकारान स्थापन केल्ले समितीन त्या त्या सुवातींची भौतीक तपासणी करून आनी अवशेशांची तपासणी करून हजारां परस चड देवळां पोर्तुगेजांनी नश्ट केल्यात असो अहवाल सादर केलो. इतलेंच न्हय जाल्यार ह्या सगळ्या देवळांचें एकूच स्मारक देवूळ बांदपाचीय शिफारस सरकाराक केल्ली. समितीच्या शिफारशीचेर राज्य सरकार बेगिनूच निर्णय घेतलें अशें पुरातत्व आनी अभिलेख मंत्री सुभाष फळदेसाय हांणी स्पश्ट केलें. एक वर्स जालें तरी सरकारी पांवड्या वयल्यान हे बाबतींत कसलीच कारवाय जावंक ना.
तिसवाडी, बार्देश आनी साश्ट ह्या तीन तालुक्यांनी चडशीं देवळां पोर्तुगेजांनी नश्ट केलीं. ते खातीर समितीन तीन तालुक्यांतल्या एका तालुक्यांत स्मारक देवूळ बांदपाचीय शिफारस केली. ते उपरांत सरकारान हे खातीर वेर्णा वाठारांत सरकारी सुवात सोदपाक सुरवात केली. पूण, आतां सोद थांबला अशें सरकारी सुत्रांनी सांगलें, मजगतीं सुमार साडे चारशें वर्सां गोंयचेर राज्य करपी पोर्तुगेजांनी गोंयची संस्कृताय नश्ट करपाचो यत्न केलो. ते खातीर ताणें हिंदू देवांचीं जायतीं देवळां नश्ट करून थंय इगर्जी बांदल्यो. देखून हिंदूंक आपले देव घेवन आपली मूळ सुवात सोडची पडली. थळाव्या लोकांचें व्हडलें स्थलांतर जालें. पुर्तुगेजांनी नश्ट केल्लीं देवळां भाजप सरकार परतून बांदतले अशें मुख्यमंत्र्यांनी जाहीर केलें. मुख्यमंत्री डॉ. प्रमोद सावंत हांणी फाटल्या अर्थसंकल्पीय अधिवेशनांत हे विशीं घोशणाय केली. इतलेंच न्हय जाल्यार ते खातीर कोट्यांनी निधीचीय तजवीज केल्या. पूण स्मारक देवळाची प्रक्रिया अजून सुरू जावंक ना अशेंय सूत्रांनी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
