भांगरभूंय | प्रतिनिधी
वेगळ्यावेगळ्या राष्ट्रीय आनी आंतरराष्ट्रीय खेळां सर्तीचें आयोजन राज्यांत करप चालू आसा. खेळां सर्तीच्या आयोजनाक लागून खेळां सुविधांत वाड तशेंच अर्थीक वाडींत लेगीत दिसपाक लागलां. हातूंतल्यान रोजगाराची संद वाडत आसा. स्पोर्ट्स डॅस्टिनेशन म्हणून गोंयची नवी वळख जावपाक लागल्या अशें मुख्यमंत्री डॉ. प्रमोद सावंत हांणी मत उक्तायलें.
37वे राष्ट्रीय खेळां सर्तीच्या उक्तावण सुवाळ्या निमतान मुख्यमंत्री उलयताले.
राष्ट्रीय खेळां सर्तीच्या निमतान मुख्यमंत्री डॉ. प्रमोद सावंत हांणी माचयेर प्रधानमंत्री नरेंद्र मोदी आसतना राज्यांतल्या उदरगत कामाची म्हायती दिली आनी केंद्राच्या सहकार्यांतल्यान गोंयची उदरगत जायत आसा हें स्पश्ट केलें.
फुटबॉल खेळा खातीर गोंय प्रसिद्ध आसा. ब्रुनो कुतिन्हो, ब्रह्मानंद शंखवाळकार, भक्ती कुलकर्णी, कात्या कुएलो हांकां अर्जुन पुरस्कार फावो जाला. योगासन, मल्लखांब, लगोरी खेळां प्रकार हे राष्ट्रीय सर्तींत आसात.
राष्ट्रीय म्हामार्ग, अटलसेतू, झुआरी पूल, मोपा विमानतळ, कुंकळ्ळी एनआयटी, धारगळींतलें आयुष म्हाविद्यालय अशीं वेगळींवेगळीं उदरगत कामां केंद्राचे मजतीन जाल्यात. जी-20चे बसकेक लागून राज्याक पर्यटन क्षेत्रांत आंतरराष्ट्रीय पांवड्यार आनीक वाव मेळ्ळो. स्वयंपूर्ण ई बाजाराक लागून थळाव्या उत्पादनांक आंतरराष्ट्रीय बाजारपेठ मेळटली. अंत्योदर, ग्रामोदय आनी सर्वोदयची गजाल करिनात ती प्रत्यक्ष हाडल्या. खेळां युनिव्हर्सिटी सुरू करपा खायीर यत्न चालू आसात. हातूंतल्यान खेळां खातीर गरजेची मनीस बळगें उपलब्ध जातलें. कुशळटाय उदरगतींतल्यान खेळगडे, फिटनेस ट्रेनर, प्रशिक्षक, फिजिओथेरपिस्ट, न्युट्रिशियन तयार करतले. ‘सब लढेंगे, सब खेलेंगे आनी भारत जितेगा’ अशी घोशणा मुख्यमंत्री डॉ. प्रमोद सावंत हांणी केली.
ह्या खेळांक लागून राज्यांत खेळां संस्कृती वाडटलीः गावडे
इव्हेंट मॅनेजमॅण्ट म्हणून न्हय जाल्यार दूरदृश्टी दवरून राज्यांत राष्ट्रीय खेळां सर्त आयोजीत केल्या. फुडारांत आशियायी सर्त, ऑलिम्पीक सर्ती खातीर खेळगड्यांक गोंयांत लेगीत गरजेच्यो साधनसुविधा मेळची हें मतींत दवरून काम केलां. पालकांनी आपल्या भुरग्यां मदीं आशिल्ले गूण वळखून तांकां उर्बा दिवची. गोंया कडेन राष्ट्रीय खेळां सर्त आयोजीत करपाची ताक ना म्हणून टिका करप्यांक गोंयान दाखोवन दिलां.
गोंयांतल्या भुरग्यांक खेळां संदर्भांत साधनसुविधा उपलब्ध करून दितले. इफ्फीक लागून गोंयांत फिल्म संस्कृती रुजली तशेच तरेन राष्ट्रीय खेळां सर्तीक लागून राज्यांत खेळां संस्कृती रुजतली अशें खेळां मंत्री गोविंद गावडे हांणी सांगलें.
सावण्ड सिस्टमाक लागून मैदानाचेर फ्लॉप शो, प्रेक्षक बेजार
फातोड्डें स्टेडियमा वयल्या उक्तावण सुवाळ्या खातीर हाडिल्ल्या सावण्ड सिस्टमाक लागून उपस्थीत प्रेक्षक बेजार जाले. माचये वयल्यान मानेस्त जें कितें उलयताले ते प्रेक्षकां मेरेन पावना नाशिल्लें. मानेस्तांची भाशणां मैदानाच्या खंयच्याच भागांत आयकपाक येना असी चर्चा मैदानांत चालू आशिल्ली. हाचे खेरीत प्रेक्षकांक पिल्लुको दिल्ल्यो. ताचोच आवाज मैदाना भर येतालो.
मैदाना भायले रस्ते बंद, वचप्यांची कोंयडी
उक्तावण सुवाळ्या खातीर दनपारां एक वरा सावन साबार जणांनी आपली उपस्थिती लायिल्ली. उक्तावण सुवाळ्यांत कितें तरी वेगळें पळोवपाक मेळटले म्हणून आयिल्ल्या प्रेक्षकांक थळावो नाच, थळावीं पदां आयकपाक मेळिल्ल्यान मात्शे बेजार जाले.
मल्लखांब सादरीकरण, खेळगड्यांचें संचलन काळखांत जाल्ल्यान मैदानाच्या खाची कोनश्यांत बशिल्ल्यांक कांयच दिसलें ना. बेजारिल्ल्या प्रेक्षकांनी मोदीचें भाशण सुरू जावचे पयलींच मैदान सोडलें पूण, रस्ते बंद आशिल्ल्यान तांकां परतून थांबचे पडले. ह्या वेळार साबार जणांनी नियोजनांत उणाव आशिल्ल्यानूच अशें जालें अशी चर्चा करतना दिसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
