भांगरभूंय | प्रतिनिधी
भांगरभूंय । खेळां मेज
पणजीः स्पोर्टिंग क्लब दी गोवा पंगडान आय- लीग फुटबॉल सर्तींत पुनरागमन करची अशी फुटबॉल मोगींची इत्सा आशिल्ली आनी आमी ती पुराय केल्या अशें भारताचो आदलो आंतरराष्ट्रीय फुटबॉल खेळगडो आदिल खान हाणे सांगलेें. तृतीय विभागीय आय- लीग सर्तींत आयतारा स्पोर्टिंग क्लब दी गोवा वास्कोच्या टिळक मैदानार दिल्ली एफसी आड दुसऱ्या गटांतल्या आपले मोहिमेक सुरवात करतलो. कॅप्टन मार्कूस मस्कारेन्हास, जॉयनर लॉरेस्को आनी आदिल खान हांच्या अणभवाच्या नेटार व्हो पंगड सर्त जिखपाचो यत्न करतलो.
आमचे कडेन बऱ्या प्रशिक्षकांचो पंगड, वेवस्थापन आसा. आय- लिगा खातीर आमी पात्र जावचे हे खातीर आमी सामकी तयारी केल्या अशें आदिलान सांगलें. सर्तीच्या दुसऱ्या गटांत आठ पंगड आसात. डबल रावंट रॉबीन पद्दतीन ‘होम अँड अवे’ तत्त्वावर ही सर्त जातली. पयल्या दोन पंगडांक 2024-25च्या आय- लिगांत बडटी दितले. तळाकडल्या दोन पंगडांक आय-लीग तिसऱ्या विभागांत खेळचें पडटलें
2016 वर्सा उपरांत स्पोर्टिंग परत आय- लिगांत पुनरागमन करपाके नेटान यत्न करतोलो. एक सिनियर खेळगडो म्हणून पंगडातल्या तरणाट्या खेळगड्यांक मजत करपाचो म्हजो यत्न आसतोलो अशें आदिल हाणे सांगलें. कोच आर्मांदो कुलसो आनी ताचो वांगडी क्लायमॅक्स लॉरेन्स हाच्या मार्गदर्शना खाला स्पोर्टिंग दी गोवा पंगड एफसी बंगळुरू युनायटेड, मुंबर केंकरे एफसी, स्पोर्टिंग क्लब बंगळुरू, ऑरेंज एफसी आनी युनायटेड एसफी सयत गोंयांतल्या धेंपो एससी पंगडा आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
