भांगरभूंय | प्रतिनिधी
जर्मनीच्या बर्लिन शारांत चालू आशिल्ले स्पेशल ऑलिम्पीक वर्ल्ड समर गेमींत गोंयची अॅथलीट गीतांजली नागवेंकार हिणें लेव्हल डी 800 मिटराचे निमाणे फेरयेंत भांगरा पदक जिखलें. हाचे खेरीत तिची सहकारी आशिफ मालानूर हिणें लेगीत लेव्हल बी 800 मिटर निमाणे फेरयेंत प्रवेश करून स्वताक पदकाचे सर्तींत कायम दवरली.
गोंयच्या 23 वांगड्यांच्या पंगडांत 13 अॅथलीट आसात आनी ते भारतीय पंगडाचे वांगडी आसात. ही सर्त 17 ते 23 जून मेरेन बर्लिनांत चलतली.
मालानूर आनी नागवेंकार हांच्या वांगडा सामील जाल्ली भारतीय अॅथलीट सोहम राजपूत हिणें लेव्हल सी 800 मिटराचे निमाणे फेरयेंत प्रवेश केल्लो.
दादल्यांच्या 4 बाय 400 मिटर पंगडान लेगीत निमाणे फेरयेची पात्रताय मेळयल्या, जाल्यार लिबिन मल्लिका राजकुमारान लेव्हल बी 200 मिटराचे निमाणे फेरयेंत प्रवेश केलो.
लेव्हल ए 25 मी ब्रेस्टस्ट्रोक आनी लेव्हल ए 25 मी फ्री स्टायल हातूंत माधव मदनान दोट्टी पदकाची मोख दवरल्या. तो सर्तीचे फायनलींत पावला.
गोंयचे खेळगडे फुटसाल (दादले), अॅथलेटिक्स (दादले आनी बायलो), रोलर स्केटिंग (बायल), बास्केटबॉल (दादले आनी बायलो), ज्युडो (दादले आनी बायलो), युनिफायड व्हॉलिबॉल (दादले आनी बायलो) आनी हँडबॉलांत भारताचे प्रतिनिधित्व करता.
हे संवसारीक सर्तींत आमच्या खेळगड्यांनी जेत तरेन मुखा वयल्या आव्हानांक तोंड दिलें तें पळोवन खूब खोस जाता. आमी निश्चीत रितीन गोंयच्या आनीक कांय खेळगड्यां कडल्यन पदकांची आस्त बाळगिता अशें स्पेशल ऑलिम्पीक भारताचे राष्ट्रीय खेळां संचालक व्हिक्टर आर. वाझान नमूद केलें.
बर्लिनांत स्पेशल ऑलिम्पिकांत 800 मिटर सर्तींत भांगरा पदक जिखिल्ले खातीर गीतांजली नागवेंकाराक परबीं. तिणें आपले कामगिरीन गोंय आनी भारताचो नांव संवसारांत व्हेलें. पर्जळ्ळीत फुडारा खातीर तिका शुभेत्सा.
डॉ. प्रमोद सावंत, मुख्यमंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
