स्पेनाची जैतान सुरवात

भांगरभूंय | प्रतिनिधी

स्पेनाच्या फुटबॉल पंगडान पॅरीस ऑलिम्पीक सर्तीक जैतान सुरवात केली, जाल्यार दुसरे फळयेंतल्या खेळगड्यांक खेळोवपी अर्जेंटिना पंगडाक पयले मॅचींत बरोबरीचेर समाधान मानचें पडलें.

पॅरीस ऑलिम्पीक सर्तींतल्या फुटबॉल मॅचींक कालच्यान सुरवात जाली. ब गटांतले मॅचींत मॉरोक्को पंगडान अर्जेंटिनाक मेकळेपणान खेळ करपाक दिलो ना. रहिम सौफिनान 45+2 मिनटाक मॉरोक्को पंगडाक पयल्या अर्दांत आघाडी मेळोवन दिली. ते उपरांत 49व्या मिनटाक पॅनल्टीचेर आनीक एक गोल करून मॉरोक्कोन अर्जेंटिनाक बॅकफुटाचेर धुकल्लो. 68व्या मिनटाक सिमॉन गियुलियोच्या गोलान अर्जेंटिनाक धीर आयलो. तरी पूण, तांकां अखेरच्या खिणा मेरेन संघर्श करचो पडलो. 90+16 मिनटाक क्रिस्तियनाच्या गोलाक लागून अर्जेंटिनान (2-2) कशीबशी हार वाटायली.

क गटांतले मॅचींत स्पेन पंगडान उझबेकिस्तान पंगडाक 2-1 हारयलो. मार्क पुबिलान 29व्या मिनटाक स्पेनाक पयलो गोल करून दिलो. ते उपरांत 45+3 मिनटाक पॅनल्टीचेर एल्डर शोमुरोडोव्हान गोल करून उझबेकिस्तानाक 1-1 अशी बरोबरी सादून दिली.

दुसऱ्या अर्दांत दोनूय पंगडांनी आघाडी घेवपाक नेटाचो खेळ केलो. पूण, 62व्या मिनटाक सर्जियो गोमेझाच्या गोलान स्पेन पंगडाक आघाडी मेळोवन दिली. ते उपरांत स्पेनान 2-1 ही आघाडी कायम राखून जैत जोडलें.