स्नेहसंमेलनः ज्ञान, संस्कार, समाजीक जागृतीचो उत्सव

भांगरभूंय | प्रतिनिधी

शाळा आनी महाविद्यालयीन जिवितांत स्नेहसंमेलन ही वर्सुकी कार्यावळ विद्यार्थ्यांच्या सर्वांगी उदरगतीचो उत्सव आसता. वर्सभर केल्ल्या कश्टांचें सादरीकरण, कलागुणांचें प्रदर्शन आनी यशस्वी विद्यार्थ्यांचो भोवमान हाका लागून हो सुवाळो खाशेलो थारता. पूण बदलत्या काळा प्रमाण स्नेहसंमेलनाचें स्वरूप चड व्यापक आनी आशयपूर्ण जालां.
आयज कितल्योशो शाळा स्नेहसंमेलन विंगड-विंगड विशयांचेर आदारून आयोजीत करतात —भारतीय सण- परबो, भारतीय संस्कृती, कुटुंबसंस्था, स्वातंत्र्यलढो, पर्यावरण राखण, महिला सक्षमीकरण, विज्ञान- तंत्रगिन्यान इत्यादी. अशा विशयांचेर आदारिल्ल्या स्नेहसंमेलनाक लागून ही कार्यावळ फकत मनोरंजना पुरती मर्यादित उरना, तर ती ज्ञानप्रसार आनी समाजीक जागृतायेचें एक प्रभावी माध्यम थारता.
पयलीं स्नेहसंमेलन म्हणल्यार नाच, नाटका, पदां, विनोदी प्रयोग आनी इनामां वांटप इतल्या पुरतेंच मर्यादित आसतालें. आयजूय हे घटक म्हत्वाचे आसात, पूण तांकां आशयाची जोड मेळिल्ल्यान कार्यक्रम आनीक अर्थपूर्ण जातात. “भारतीय सण आनी परंपरा” ह्या विशयाचेर आदारीत स्नेहसंमेलनांत दिवाळी, होळी, ईद, नाताळ, गणेशोत्सव अशा विंगड- विंगड सणांचे संस्कृतीक दर्शन घडोवन हाडटात. विद्यार्थी त्या सणांची फाटभूंय, इतिहास, समाजीक संदेश आनी एकचाराची भावना हांचें सादरीकरण करतात. ताका लागून भुरग्यांक आपल्या देशांतले विवीधतायेंत एकता ह्या मुल्याची जाणविकाय जाता.
भारतीय संस्कृती विशयांचेर आदारीत कार्यक्रमांनी योग, आयुर्वेद, शास्त्रीय नाच, लोककला, भेस आनी पारंपरिक खेळ हांचो आस्पाव जाता. हाका लागून भुरग्यांक आपल्या परंपरांचो अभिमान दिसूंक लागता. “कुटुंब” ह्या विशयाचेर केल्ल्या सादरीकरणांतल्यान जोड कुटुंब पद्दतीचें म्हत्व, आवय- बापायचें संस्कार, आजी-आज्याचें मार्गदर्शन आनी भावंडां मदलो मोग हांचें चित्रण जाता. आजच्या आधुनिक जिणेंशैलीक लागून बदलत वचपी कुटुंबवेवस्थेची वळख करून दिवन, भुरग्यां मदीं कृतज्ञता आनी संवेदनशीलता निर्माण करपाचो यत्न जाता.
स्वातंत्र्यझुजाचेर आदारीत गॅदरिंग खास प्रेरणादायी थारता. क्रांतीकारांच्या बलिदानाची कथा, देशभक्तीपर गितां आनी स्वातंत्र्यसैनिकांच्या भुमिकांचें नाट्यरूपांतर हाका लागून विद्यार्थ्यांच्या मनांत राष्ट्रभक्तीची ज्योत पेटता. भुरग्यांक इतिहास पुस्तकांतल्यान वाचपा परस तो माचयेर पळोवन चड प्रभावीपणान समजता. अशा कार्यक्रमांतल्यान देशा खातीर केल्ल्या त्यागाची जाणविकाय जाता आनी कर्तव्याची भावना बळिश्ट जाता.
आज कित्येक शाळा पर्यावरण, नितळसाण, उदकाचो सांबाळ, प्लास्टिकमुक्त जीण, डिजिटल साक्षरता ह्या सारक्या चालू काळांतल्या विशयांचेरय स्नेहसंमेलन आयोजीत करतात. भुरग्यांनी सादर केल्ल्या नाटकुल्यांतल्यान आनी संदेश दिवपी पदांतल्यान समाजाकूय योग्य दिका मेळटा. शाळेच्या माचये वयल्यान दिल्लो संदेश फकत भुरग्यां पुरतोच मर्यादित उरना, तो थंय आशिल्ल्या पालकां मेरेन, गांवांतल्या लोकां मेरेन आनी हेर मानेस्तां मेरेन पावता. देखून स्नेहसंमेलन हें समाजीक परिवर्तनाचें एक साधन जाता.
ह्या विशयाचेर आदारिल्ल्या स्नेहसंमेलनाचो दुसरो एक म्हत्वाचो वांटो म्हणल्यार मुखेल सोयऱ्यांचें मार्गदर्शन. कार्यावळी खातीर शिक्षणतज्ञ, समाजसेवक, दोतोर, पर्यावरण मोगी, आदले सैनिक वा खंयच्याय क्षेत्रांतल्या तज्ञ व्यक्तीक आपोवणें धाडटात. त्या मानेस्तांचे विचार भुरग्यांक नवी दिका दितात. माचये वयल्यान दिल्लें मार्गदर्शन फकत कांय भुरग्यां पुरतेंच मर्यादित उरना, तर थंय आशिल्ल्या पालकांचेर आनी नागरिकांचेरय पावता. एकाच वेळार चड लोकां मेरेन सकारात्मक संदेश पावोवपाची ही एक प्रभावी माची थारता.
पालकांची उपस्थिती स्नेहसंमेलनाक खाशेलो अर्थ दिता. आपल्या भुरग्यांचे सादरीकरण पळोवन तांकां अभिमान दिसता. त्याच वांगडा कार्यक्रमांतलो संदेश तांच्याय मनाचेर परिणाम करता. देखून, पर्यावरण सांबाळाचेर आदारिल्लो कार्यक्रम पळयल्या उपरांत जायते पालक घरांत प्लॅस्टिकाचो वापर उणो करपाचो निर्णय घेतात. कुटुंबवेवस्थेचेर आदारिल्ल्या कार्यक्रमाक लागून पालकांक भुरग्यां वांगडा चड वेळ घालवपाची जाणविकाय जाता. अशा तरेन स्नेहसंमेलनांतल्यान समाजमनांत सकारात्मक बदल घडोवन हाडपाची क्षमता आसता.
स्नेहसंमेलनाची तयारी ही विद्यार्थ्यां खातीर एक व्हड शिकवण आसता. विशय समजून घेवप, सोद घेवप (संशोधन), म्हायती एकठांय करप, संवाद पाठांतर करप, भेस आनी सादरीकरणाचो आराखडो तयार करप — ह्या सगळ्या प्रक्रियांतल्यान तांची बौद्धिक आनी सर्जनशील क्षमता वाडटा. पंगडान काम करताना सहकार्य, शिस्त आनी वेळ व्यवस्थापन शिकूंक मेळटा. माचयेर उबे रावन उलोवपा खातीर आत्मविश्वास वाडटा आनी भंय उणो जाता. व्यक्तीमत्व सुदारता.
स्नेहसंमेलनाचो उद्देश भपकेबाजपण न्हय तर आशयप्रधानताय आसूंक जाय. म्हारग सजावट वा बडेजावा परस विद्यार्थ्यांच्या विचारांक आनी सर्जनशीलतेक प्राधान्य दिवप गरजेचें आसा. सादेपणांतल्यानूय प्रभावी संदेश दिवं येता, हें याद दवरप आवश्यक आसा. पर्यावरणपूरक साहित्याचो वापर करून सजावट केल्यार विद्यार्थ्यांक पर्यावरण सांबाळपाचो प्रत्यक्ष धडो मेळटा.
एकंदरीत, आधुनिक काळांतल्या विशयाचेर आदारीत स्नेहसंमेलन हें शिक्षण, संस्कार आनी समाजीक जागृतायेचो संगम थारला. गिन्यान, कला आनी मुल्यांचें सुंदर मिश्रण आशिल्लो हो सुवाळो विद्यार्थ्यांच्या आयुष्यांतलो एक याद उरपा सारखो खीण जाता. माचये वयल्यान दिल्लो दरेक संदेश समाजमनाक स्पर्श करून वता. देखूनच स्नेहसंमेलनाक फकत एक वर्सुकी कार्यावळ समजून उपकारना, तर तो एक संस्कारमय पर्व म्हणून साजरा करपाची गरज आसा. योग्य नियोजन, सृजनशीलता आनी सकारात्मक नदरेच्या आदारान स्नेहसंमेलन फुडले पिळगेक दिशा दिवपी एक प्रभावी व्यासपीठ थारूं शकता, हें आमी विसरूंक फावना.

प्रमिला प्रसाद फळ देसाय
9011834847