स्नेहल कवठणकाराचो नाबाद शेंकडो

भांगरभूंय | प्रतिनिधी

रणजी प्लेट लीग गटांतले चार दिसांचे मॅचीच्या पयल्या दिसा गोंयान मिझोरमा आड खेळटना आपल्या पयल्या डावांत 3 बाद 322 धांवड्यो केल्यात.

मॅच मोंटेरो अहमदाबादांतल्या नरेंद्र मोदी स्टेडियमाचेर आयोजीत केल्या. गोंयान टॉस जिखून पयलीं बॅटींग करपाचो निर्णय घेतलो. गोंया वतीन स्नेहल कवठणकारान नाबाद शेंकडो नोंदयलो. जाल्यार मंथन खुटकाराक फकत 5 धांवड्यांनी शेंकडो चुकलो. पयल्या दिसाचो खेळ सोंपलो त्या वेळार दीपराज गांवकार 50 धांवड्यो करून स्नेहलाक साथ दितालो. ह्या दोगांयनी चवथे विकेटी खातीर अजून मेरेन 170 बॉलांनी नाबाद 112 धांवड्यांची भागिदारी केल्या.

गोंयचे ओपनर परतून एकदा अपेशी थारले. प्रोफेशनल क्रिकेटर रोहन कदमाक बॉबीन वैयक्तीक 13 धांवड्यांचेर बोल्ड केलो. ते उपरांत रणजींत पदार्पण करपी कश्यप बखले लेगीत 13 धांवड्यांचेर तंबूंत परतलो. ताका स्पिनर के सी करिअप्पान बोल्ड केलो.

2 बाद 59 धांवड्यां वयल्यान मंथन खुटकार आनी स्नेहल कवठणकार हांणी गोंयचो डाव सांबाळ्ळो. तांणी तिसरे विकेटी खातीर 241 बॉलांनी 151 धांवड्यांची भागिदारी केली. 29 वर्सां पिरायेच्या स्नेहलाचें 57वे पयले श्रेणीचे क्रिकेटींतलो आठवो शेंकडो थारलो. स्नेहल 208 बॉलांनी 135 धांवड्यो करून खेळटा. ताणें 14 चवके मारले.

मंथनाक अंदूंच्या हंगामांतलो दुसरो शेंकडो मारपाची संद आशिल्ली. पूण, ताका करिअप्पान 95 धांवड्यांचेर बोल्ड केलो. मंथनान 11 चवके आनी दोन सके मारले.

मंथन बाद जाल्या उपरांत स्नेहलान दीपराजा वांगडा मेळून गोंयचो स्कोर 300च्या मुखार व्हेलो. मिझोरमा वतीन के सी करिअप्पान दोन जाल्यार बॉबीन एक विकेट घेतली.

गोंयान हे मॅची खातीर आपल्या पंगडांत दोन बदल केले. के व्ही सिद्धार्थ आनी शुभम तारी हांचे सुवातेर कश्यप बखले आनी हेरंब परब हांकां संद दिली.

थोडे भितर धांवतकटोः गोंय (पयलो डाव) 92 बॉलांनी 3 बाद 322 धांवड्यो ( रोहन कदम 13, मंथन खुटकार 95, कश्यप बखले 13, स्नेहल कवठणकार खेळटा 135, दीपराज गांवकार खेळटा 50)