भांगरभूंय | प्रतिनिधी
मडगांवः साश्टींतल्या शेतकारां मुखार आतां नवीच समस्या उप्रासल्या. वेस्टर्न स्वॅम्प्हेन हीं स्थलांतरीत सुकणी शेतांत लायिल्ले रोपे तोडपाक लागल्यात. ह्या प्रकाराक लागून उबगल्ल्या कुडतरीच्या शेतकारांनी कृशी विभागान हे समस्येचेर उपाय काडचो, अशी मागणी केल्या.
शेतकार तशेंच सर्वीस प्रोव्हायडर वालेंतिनो रॉड्रिग्स हांणी सांगलें, साश्ट म्हालांतल्या माकाझन, कुडतरी, मायणा वाठारांत मशिना वरवीं शेंत ओंपले उपरांत तरवो लावपा वेळार तरवो तोडून उडयिल्ल्याचें दिसून आयलें. हे खातीर तरवो कोण तोडटा हाचेर शेतकारांनी पाळत दवरली, जाल्यार वेस्टर्न स्वॅम्प्हेन नांवाचीं स्थलांतरीत सुकणीं हें काम करतात, अशें कळ्ळें.
सांजे वेळार हीं सुकणीं शेतांत येतात आनी तरवो खातना दिसतात. सांजे पासून राती मेरेन तांचें हें काम चालू आसता. सकाळच्या वेळार तीं सुकणीं तळ्यांत दिसतात. वायंगण शेताक हो त्रास चड जाता. कांय दिसां आदीं माकाझनची 6 हजार चौखण मिटर शेतजमीन जीं कितलीशींच वर्सा पडीक आशिल्ली ताचेर लागवड केल्ली. तरवो लायले उपरांत दुसऱ्या दिसा सकाळीं अर्दो अदीक तरवो पेड्डेर केल्ल्याचें नदरेक आयिल्लें. हे संबंदांत कृशी विभागाच्या अधिकाऱ्यांक कल्पना दिल्या.
वेस्टर्न स्वॅम्प्हेन सुकणीं 200 किलोमिटर अंतरा मेरेन उडपाक शकतात. ताका लागून जाळें घालपाक मेळना, अशें कृशी अधिकाऱ्यांनी सांगलें. ते खातीर आवाज करपी यंत्र लावप वा हेर कांय उपाय आसात काय कितें हाची तपासणी करतले.
कुडतरीच न्हय जाल्यार माकाझन, मायणा वाठारांत लेगीत ही समस्या आसा. हीं सुकणी चड करून तळ्यांत राबितो करतात, ताका लागून भोंवतणच्या शेतांक तांचो चड त्रास जाता. कृशी खात्यान हे समस्येचेर उपाय येवजण करची. तशेंच शेतकारांक कृशी विभागा कडल्यान लुकसाण भरपाय दिवची, अशीय मागणी वालेंतिनो रॉड्रिग्स हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
