भांगरभूंय | प्रतिनिधी
उंचेलें शिक्षण घेतिल्ली गोंयची धूव मुख्यमंत्री म्हणून फुडल्या धा वर्सांत दिवपाची मोख अंदूंच्या आंतरराष्ट्रीय अस्तुरी दिसा दवरुया.
वर्सांची वर्सां पडून उरिल्लें 33 टक्के अस्तुरी राखीवता विधेयकाक संसदेन मान्यताय दिले उपरांत स्त्रीशक्तींतय बदल जाल्यात. ती जापसालदारकी घेवंक शिकल्या, राजकी उत्तराधिकारी म्हणून. 33 टक्के अस्तुरी राखीवता विधेयक चालीक लावपाक राज्य विधानसभांनी आरंभ जाला. गोंय 2027 चे विधानसभा वेंचणुकेंत अस्तुरेक नवी वाट दिसतली. विधानसभेंत अस्तुरी आमदार संख्या वाडटली अशी आस्त बाळगुया. 33 टक्के अस्तुरी राखीवता विधेयक चालीक लागतना नगरपालिका, पंचायत वेंचणुकेंत अस्तुरी 50 टक्क्यांनी वेंचून येवंक लागल्या हें सत. उंचेल्या शिक्षणांतल्यान अस्तुरी स्वयंसिद्ध, स्वयंपूर्णा जातना अन्नपूर्णा नवे दिकेन वता. ती करोडपती जाता तेन्ना तिका राजकारणाची वाट कळटा.
हो लेख बरयतना अन्नपुर्णेक, स्वयंपुर्णेक आनीक घटाय दिवपाक गोंयच्या अर्थसंकल्पांत तजवीज जाल्या आसतली. सवकासायेन अर्थसंकल्पांतल्या साबार येवजण्यांनी ती दिसूंक लागल्या. भौशीक मळार व्हड जातना तिका उंचायेर वचप, मळबांत उडप शक्य जालां. ती आपली वेगळेपण, अस्मिताय दाखयता तेन्ना नसाय जातली अस्तुरेकय. अस्तुरे आड अस्तुरेचें झुजप जातलें तेन्ना झुजातलें वीख सदां उरचें ना, एकली दुसरेक मजत करतली हे खातीर जतनाय घेवप गरजेची.
मनुस्मृती, संघ परिवार आनी भाजपाचें नातें दाखोवपाचे यत्न आयजूय जातात. कालच्या नात्या मदीं जाल्ले बदल कितें सांगतात? भेस बदलता, शिक्षणांतल्यान विचारय बदलतात, संघ आनी भाजपा नवे दिकेन वता, उरतात फक्त यादी. त्यो यादी सांगतना वेगीं जावपी बदलां कडेन फाट करप समा जावचें ना. ल्हान म्हान जाल्ले कितल्यांक सोंसतले? सगल्यांक ती तांक आसा? मान सकयल घालून चलतना मुखार आडमेळीं आसतात तेन्ना तिका फुडारा कडेन पळोवन हेरांच्या बराबरीन चलचें पडटा. हेरां बराबरीन चल्ल्यार तिचो भोवमानय जाता, तिका फाटीं काडपाचे येत्नय जातात. थंय ती लागसाल्ल्यांच्या मार्गदर्शनान, आपल्या बुदवंतपणाच्या बळग्यार भुजार वजेंय घेता.
गोंय सुपुल्लें राज्य, उदरगतीच्या मार्गार वतना बुद्धीमता आसूनय आयटी उद्येगाची बस चुकली, दुसरो विमानतळ उसरां जालो. संवसारीक झुजाचीं कुपां पयस आसलीं तरी झुजांच्या देशांनी शिरकल्ल्या गोंयकारांक येवपाक दुसरो मोपा विमानतळ उपेगी. त्या विमानतळा लागीं वर्सा भितर जावपी तुयें इलेक्ट्रॉनीक, ए आय शार तिकाय वाट दाखयतलो.
आदले पर्यटन मंत्री माथानी साल्ढाणा पर्यटन वेवसाया आड उलोवपी. ते अचकीत सोंपले तेन्ना तांची घरकान्न पयलींच्यो मंत्री अलिना साल्ढाणा हांकां आदले संरक्षण मंत्री, मुख्यमंत्री मनोहर पर्रीकार हांणी विधानसभेर एकवटान वेंचून हाडली. स्त्रीशक्तीचें म्हत्व आदल्या संरक्षण मंत्र्यांक खबर आशिल्लें, स्त्रीशक्ती पणजी विधानसभा वेंचणूक जिखपाक तांचो आधार जाल्ली. स्त्रीशक्ती पासत लाडली लक्ष्मी, गृह आधार, यशदामिनी येवजण्यो जाल्ल्यान राज्य महिला आयोग राष्ट्राच्या बराबरीन व्हेल्ल्यान प्रदेश भाजपा सरकार आयलें. त्या येवजण्यांचो लाव सगल्या राजकी पक्षांनी घेतला, येवजणी दुसऱ्या रुपांत देशांतल्या राज्यांनी
पावल्यात.
देशाचें अर्थीक राजपाटण महाराष्ट्र राज्यांत उपमुख्यमंत्रीपद सुनेत्रा अजीत पवार हांकां दिवन भाजपान सावित्रीबाईच्या धुवां आड आमी न्हय हें दाखोवन दिलां. उपमुख्यमंत्री सुनेत्राताई राष्ट्रवादी काँग्रेसीच्यो राष्ट्राध्यक्ष जाल्यात हें स्त्रीशक्तीच्या उदरगतींतलें भांगराळें पावल. वरिश्ठांचे मजतीन त्यो पयसाविल्ल्या राष्ट्रवादाक एकठांय हाडूंक शकतात. गोंय विधानसभा वेंचणुकेंत राष्ट्रवादी काँग्रेस (अजीत पवार) घडयाळ भाजपा वांगडा रावतलें हातूंत दुबाव ना. सुनेत्राताई गोंयचे राष्ट्रवादीची नवी बांदावळ करतल्यो व्हय? सोदतात व्हय त्यो गोंयच्यो दुर्गा, शांता, गौरी, सुवर्णा, सावित्री, निर्मला, आका, मामी? तांच्या बळग्यार गोंय विधानसभेक अस्तुरी उपमुख्यमंत्री 2027 चे विधानसभा वेंचणुकेंत मेळटल्यो अशी आस्त आसा.
आयज गोंय विधानसभेंत तीन अस्तुरी आमदार आसात. घरकार विधानसभेंत आसले तरी त्यो मतदारसंघ, म्हामंडळांतल्या वावरांतल्यान प्रदेश भाजपचो समाजीक बदलाचो खांबो जाल्यात. 2027 चे विधानसभा वेंचणुकेंत तांकां जिखून हाडटना उत्तर, दक्षीण गोंयच्यान तीन ते पांच महिलांक वेंचून हाडून राखीवतेक पाळो दिवपाचो आरंभ गोंयच्यान जावचो. प्रदेश भाजपाच्या अस्तुरी विभागांत राज्य महिला आयोगाच्यो आदल्यो अध्यक्ष विद्या गावडे आसात. राज्यांतले अस्तुरेक स्वयंसिद्धतेची दिका दाखोवपी विद्या, सुवर्णा राज्याचे विधानसभेंत कित्याक दिसच्यो न्हय? वेंचणुकेचे तयारेक त्यो लागल्यात, उंचेलें शिक्षणय, राजकी पक्षाचो तेंकोय तांकां आसा.
इतिहासाचीं पानां पळयल्यार ज्या गोंय प्रदेश काँग्रेसीन अस्तुरी प्रदेसाध्यक्ष दिल्यो तो पक्ष चार आठ महिलांक उमेदवारी दितलो. वेंचून येवपाक अणभव, अर्थीक बळगें, मतदारसंघांत वावुरप म्हत्वाचें. नवीं मुखामळां आसल्यार वेंचणुकेचो अणभव मेळटलो, फुडारांत पक्षा खातीर वावुरपी कार्यकर्ते अस्तुरेच्या रुपान मेळटले. काँग्रेस, गोवा फॉरवर्ड, रिवोल्युशनरी गोवन्स, आम आदमी पार्टी एकठांय येवन एक दोन स्त्रीशक्तीक जैता कडेन व्हरुंक शकता. अस्तुरेचें दादल्यां बराबरीन माचयेर बसप, उलोवपा इतलेंच मतदारसंघांत दोन वर्सां वावुरचें पडटा. आसा त्या तांकीची स्त्रीशक्त? विरोधी पक्ष मुखेली युरी आलेमांव, आमदार कार्लुस फेरेरा आपले घरकान्नींक, भयणींक वेंचून हाडपाक वावुरतले व्हय?
कालचे दीस आनी राजकारणय वेगळें, आयज राखीवता मेळ्ळ्या. नेमावळीक कळाव जालो तरी घरांतल्यान आमदारांनी सुरवात करपाची गरज उप्रासल्या.
कोयर वेवस्थापन मंत्री आतानासियो (बाबूश) मोंसेरात आपले घरकान्नीक वेंचून हाडपी. तांची घरकान्न तांचे पासत वेंचणुकेंत वावुरल्या. भलायकी मंत्री विश्वजीत राणे, आमदार देविया फुडारांत आपल्या धुवांक मतदारसंघां पासत वावुरपाक शिकयतलीं. उंचेलें शिक्षण घेतिल्ली गोंयची धूव मुख्यमंत्री म्हणून फुडल्या धा वर्सांत दिवपाची मोख अंदूंच्या आंतरराष्ट्रीय अस्तुरी दिसा
दवरुया.
आंतरराष्ट्रीय अस्तुरी दीस मनयतना तिचें शिक्षण, तिची भलायकी, तिची स्वयंसिद्धता गरजेची हो मंत्र दिवया. तिका अर्थकारण कळटा तेन्ना ती ताचे बराबरीन न्हय कूसभर चड दिवकं शकता, तिका तांकय आसता, गरज आसा दुस्मान, इश्ट तिणेय वळखुपाची.
राजकारण म्हेळें जातना, घरचे घरच्यांचेर दुबाव घेतना, घराबे मोडटना तकल्यो फुटच्यो न्हय ही जतनाय घेवया. कायदे, शिश्टाचार पाळपाक शिकुया.
सुरू जाल्लें झूज पालोवपाक फुडें सरपीय आसात. संवसारांतल्या देशांत वेंचून आयिल्ली स्त्रीशक्तय शांतीकाये पासत वावुरता. स्त्रीशक्तीक जावपी त्रास स्त्रीशक्तीकच चड कळटलो. त्रासांतल्यान, आडमेळ्यांतल्यान ती उंचायेर पावल्या, पावलभर फुडें गेल्या, झुजा मळारय उणी पडची ना. तिचे बगर राजकारण ना हो मंत्र दिवपाचो होच वगत.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
