भांगरभूंय | प्रतिनिधी
भारतांत बायलां मदीं कॅन्सराचें प्रमाण नेटान वाडत आसा. उत्तर प्रदेशांतल्या आग्राच्या सरोजनी नायडू वैजकी म्हाविद्यालयांतल्या स्त्रीरोग विभागांतल्या दोतोराच्या म्हणण्या प्रमाण, ह्या कॅन्सराचे गांठीचेर आड नदर करप हो व्हड धोको आसूं येता. सुरवातेक ही गांठ मात्तूय दुखना, वा गांठ आसा हें लेगीत कळना.. मात चुकूनय हाचे कडेन आडनदर करची न्हय. एक ल्हानशी चूक व्हडली संकश्टां आपयतात… हें केन्नाच विसरूं नाकात.
भारतांत बायलां मदीं स्तनाचो कॅन्सर नेटान पातळत आसा अशें दोतोरान स्पश्ट केलें. ताचे विशीं जाणून घेवप आनी ताका वळखप खूब गरजेचें. हाचें बेगीन निदान जाल्यार ताचे वायट परिणाम आडावंक मेळटात. हाचीं कांय लक्षणां दिसतात, तीं वळखून घेतल्यार बेगीन उपचार करूं येतात. तुमच्या स्तनाक वा खांकेंत गांठ आसल्यार ताचे कडेन आडनदर करची न्हय. तशेंच स्तन तांबडें दिसता जाल्यार ताचे कडेनूय आडनदर करची न्हय. अशीं तुमकां लक्षणां दिसल्यार रोखडोच दोतोराचो सल्लो घेवचो…
इतलेंच न्हय, स्तनाचो आकार बदलत आसा जाल्यार तें सहज घेवचें न्हय. ताचेर वेळार उपचार घेवचे. हाका लागून व्हड दुयेंसां पसून पयस जावपाक मजत जातली. स्तनाच्या कॅन्सराक आडावपा खातीर बायलांक एक चांचणी उपलब्ध आसा, जी तांणी करपाक जाय अशें दोतोरान स्पश्ट केलें.
दोतोराच्या म्हणण्या प्रमाण एक्सरे आनी एमआरआय जाले उपरांतूय कॅन्सराचें निदान जाता. तपासणे उपरांत बायोप्सी करतात. बायोप्सींत गांठ सादी काय कॅन्सराची तें कळटा… हे जिणे पद्दतींत कांय बदल करून सुरवातेकूच रोग आडावपाक मेळटा. दोतोराच्या मता प्रमाण निरोगी आनी भलायकेक फायद्याचें जेवण खावपाक जाय. दोतोरान जंक फूड आनी पॅक्ड जेवण, भायलीं खाणां टाळपाचो सल्लो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
