भांगरभूंय | प्रतिनिधी
कितली म्हारगाय गे सायबिणी, संवसार कसो करचो आमी…., हें फुगडी गीत रचप्याचे दूरदिश्टीक वालोर दिवपाक जाय. कारण हाचे मुखार हें गीत लोकांच्या ओंठार रातदीस खेळपाचें आसा. म्हारगायेन हुलपुवपी गोंयकारां मुखार संवसार कसो करपाचो हो यक्षप्रस्न उबो रावला. वीज खात्यान रस्त्या वयल्या लायटींचे बील लोकांच्या बोल्सांतल्या कापून घेवपाचो निर्णय घेतला. तो चालीकूय लायला. चडशा वीज गिरायकांक हे विशीं खबर ना. पूण, कांय शिटूक गोंयकारांक बील वाडिल्लें दिसतकच तांणी चवकशी केली आनी उपरांत हें नवें ‘स्ट्रीट लायट’ शुल्काचें गुपीत भायर सरलें. ही दरवाड करपाची कायदो दुरुस्ती फाटले विधानसभेंत जाल्या, अशें वीज अधिकारी सांगतात.
लायटीच्या मूळ बिला परस हो चार्ज, तो सेस, तें जीएसटी…. अशीं आलायतीं भाडींच चड आसतात. पोरूं मे म्हयन्यांत लायटीचें बील खूबच चड आयल्लें. तेन्ना वीजमंत्र्यान ‘गर्मेच्या दिसांनी लोक फॅन, एसी लायतात, देखून बील वाडलां,’ अशें स्पश्ट केल्लें…. मजा म्हणल्यार वीज गिरायकांक तें पटलें. कारण 2-4 विरोधक सोडल्यार हेरांनी हुं की चूं करूंक ना. विरोधक दिसान दीस उणे जायत आशिल्ल्यान हाचे मुखार ‘हम करेसो कायदा’ वृत्ती पुलेना जाल्यार पुरो.
रस्त्या वयले लायटीची देखभाल, दुरुस्तीचें काम पयलीं भौशीक बांदकाम खातें करतालें. ते खातीर पंचायत, पालिके कडल्यान दुडू घेतालें. हाचे मुखार हें काम वीज खातें करतलें. तांणी ताचो खर्च वीज गिरायकां कडल्यान घेवपाचें थारायलां. ‘पब्लीक लायटनींग ड्युटी’ खाला ही वसुली जाता. लायटीच्या बिलांचेर खूब कितें बरयिल्लें आसता. ताची म्हायती वीज खात्यान आपल्या गिरायकांक दिवपाक जाय. ह्या नव्या नेमाक लागून आतां लोकांक युनिटा फाटल्यान पांच पयशे तर उद्देगीक, वेवसायिक आस्थापनांक 8 पयशे चड फारीक करचे पडटले. विजेची पुरवण जो मेरेन वाडना, तो मेरेन मोल वाडत रावतलें. आमच्या गोंयांत वीज तयार जायना. ती कर्नाटक आनी महाराष्ट्रांतल्यान येता. सध्या येता ती वीज राज्या खातीर उणीच. फुडाराक विजेचो दुकळ पडपाचो आसा. कारण वाडटें पर्यटन आनी दुबळी वीज पुरवण यंत्रणा. शेजारी राज्यांनी चड वीज दिवपाचें थारायलें तरी पुरवण यंत्रणा आदली आशिल्ल्यान आमकां ती वीज हाडप शक्य ना. जो मेरेन तमनार वीज प्रकल्प जायना आनी गोंयांत उपकेंद्रां, केबल यंत्रणांचें चड तांकीचें जाळें उबें रावना, तो मेरेन ही दरवाड जायत रावतली. लायटीचो आपालिपा जातलो तो वेगळो.
रस्त्या वयले लायटीचेर थळावे वीज कामगार लक्ष दवरतात. काळोख दाटलो काय आपशीच लायट सुरू जावपाची यंत्रणा कांय कडेन आसा. तरीय सकाळीं 8 जायसर काय गांवांनी खांब्यां वयल्यो लायटी पेटत आसतात. कांय वर्सां पयलीं पुनवेचे रातीं स्ट्रीट लायट बंद करताले. उपरांत ती येवजण बंदूच जाली. जंय लायटीची व्हडलीशी गरज ना. थंय तरी पुनवेक लायट बंद दवरपाक जाय. दुसरी म्हत्वाची गजाल म्हणल्यार एकाच खांब्यार 2-2 दिवे. सोडियम दिव्यांच्या जाग्यार एलईडी ट्युबलायटी बसयल्यो, तेन्ना कांय कडेन आदले दिवे काडूंक नात. बरोच काळ एका खांब्यार ते चकचकताले. लायटीचो हो नश्टो इबाड. अजून कांय कडेन हो प्रकार आसतलो. रातच्या वेळार येरादारी चड आसा, त्या रस्त्यांचेर उजवाड जायच. काळखाक लागून रस्त्याचो अदमास येवंक नाशिल्ल्यान वा वाटेर बशिल्ल्या गोरवांक लागून अपघात जाल्यात, हेंय वीज खात्यान विसरूंक फावना. तातूंत स्ट्रीट लायट रातभर पेटतूच आसता वा उतरली, हाची खात्री कितें? तिची देखभाल वीज खातें करतलें. पूण ती नेमान जावची. खास करून लोकवस्ती ना अशा जाग्यांचेर, रानां वाठारांत ती काळोख उलगता म्हणसर चालू आसूंक जाय. कारण आतां स्ट्रीट लायटीचे दुडू लोक फारीक करपाचे आसात. कांय ट्युबलायटी पेटनात, त्यो बेगोबेग बदलच्यो
पडटल्यो.
एके वटेन कांय पक्ष लायट फुकट दितात वा तांचें पळोवन हेर पक्ष तसलीच वेगळी घोशणा करतात. तरीय हेर गिरायकांक मात उणे रकमेचें वीज बील येना. तें वाडतूच आसा, हाका कितें म्हणचें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
