स्टॉयनीसान ऑस्ट्रेलियेक वाटायली

भांगरभूंय | प्रतिनिधी

मार्कस स्टॉयनीसाच्या अश्टतासांच्या प्रदर्शना नेटार ऑस्ट्रेलिया पंगडान संवसारीक टी-20 क्रिकेट सर्तीतले 10वे मॅचींत ओमान पंगडाक 39 धांवड्यांनी हारयलो.

ऑस्ट्रेलियेन दिल्ली 165 धांवड्यांचे मोखीचो फाटलाव करतना ओमानान 9 विकेटी व्हगडावन 125 धांवड्यां मेरेन मजल मारली.

धांवड्यांचो फाटलाव करपाक मैदानांत देंवपी ओमानाची सुरवात सामकी बाबत जाली. एका वेळार 57 धांवड्यां मेरेन ताणें 6 विकेटी व्हगडायिल्ल्यो. ताका लागून ओमानाचो डाव रोखडोच सोंपतलो अशें दिशिल्लें. पूण, अयान खान आनी मेहरान ओमान हांणी डाव सांबाळ्ळो. अयान खानान सगल्यांत चड 36 धांवड्यो केल्यो. ते उपरांत मेहरान खानान 27 धांवड्यांची संघर्शपुर्ण खेळी केली. मुखेली अकीब इल्यास हाणें 18 आनी शकील अहमदान 11 धांवड्यो केल्यो. सात बॅट्समनांक दोट्टी आंकडो लेगीत हुपपाक जमलो ना. ओमानान 20 ओव्हरींनी 9 विकेटी व्हगडावन 125 धांवड्यो केल्यो.

ऑस्ट्रेलिये वतीन स्टॉयनीसान तीन ओव्हरींनी 19 धांवड्यो दिवन 3 विकेटी घेतल्यो. मिचेल स्टार्क, नॅथन एलीस आनी अॅडम झम्पा हांणी दरेकी 2 विकेटी घेतल्यो

ते आदीं ओमानान टॉस जिखून ऑस्ट्रेलियेक पयलीं बॅटींग करपाचें आमंत्रण दिलें. ओमाना मुखार ऑस्ट्रेलियेची बाबत सुरवात जाली. ताणें तिसरे ओव्हरींत ट्रॅव्हिस हेडाची (12) विकेट व्हगडायली. ट्रॅव्हिसाक बिलाल खानान बाद केलो. ते उपरांत णववे ओव्हरींत मुखेली मिचेल मार्श (14) लेगीत रोखडोच तंबूंत परतलो. फुडल्या बॉलाचेर मेहरान खानान आपली दुसरी विकेट घेतना ग्लॅन मॅक्सवॅलाक (0) तंबूंत धाडलो.

ऑस्ट्रेलियेचो पंगड संकश्टांत सांपडिल्लो. पूण, अशा वेळार स्टॉयनीसान डॅव्हिड वॉर्नरा वांगडा मेळून डाव सांबाळ्ळो. दोगांयनी चवथे विकेटी खातीर 102 धांवड्यांची भागिदारी केली. डॅव्हिड वॉर्नरान 56 धांवड्यो केल्यो. वॉर्नर ऑस्ट्रेलिये वतीन आंतरराष्ट्रीय टी-20 क्रिकेटींत सगल्यांत चड धांवड्यो करपी बॅट्समन थारलो. ताणें अजून मेरेन 3155 धांवड्यो केल्यात. ताणें अॅरोन फिंचाक फाटीं घालो. फिंचान 3120 धांवड्यो केल्ल्यो.

स्टॉयनीसान 36 बॉलांनी दोन चवके आनी स सक्यांचे मजतीन नाबाद 67 धांवड्यो केल्यो. ऑस्ट्रेलियेन निर्धारीत 20 ओव्हरींनी 5 विकेटी व्हगडावन 164 धांवड्यो केल्यो. ओमाना वतीन मेहरान खानान दोन विकेटी घेतल्यो. बिलाल खान आनी कलीमउल्लाह हाणें एकेक विकेट घेतली.