भांगरभूंय | प्रतिनिधी
गोंयचें क्रिकेट आतां बरेंच म्हणपाक मेळटलें, इतलें चंवरपाक लागलां. चंवर आयले उपरांत फुलप आनी फळप हो सैमाचो धर्मूच आशिल्ल्यान फुडल्या काळांत आमचें क्रिकेट आनीक चंवरतलें, फुलतलें आनी फळटलेंय अशी आस्त बाळगून गोंयच्या क्रिकेट मोगींक कसलीच हरकत नासची अशें गोवा क्रिकेट असोसिएशनान आयतारा माशेलांतल्या बिग बी कॉम्प्लेक्सांत आयोजीत केल्ल्या ‘सक्सेस स्टोरी’ कार्यावळीक हाजीर रावले उपरांत म्हजे सारक्या कोणाकूय अशें दिसलें जाल्यार तें चुकीचें न्हय. गोंय क्रिकेटीच्या इतिहासांत इतलो व्हडलो रंगतदार इव्हेंट जावपाचो हो पयलोच वेळ आसलो तरी जे प्रमाण हो सुवाळो आयोजीत केलो, तातूंत गोंयचे क्रिकेटीच्या आतां मेरेनच्या कठीण प्रवासाची सगळ्यांक जाणविकाय जाल्या, पूण त्याच वेळार जे संघटनेच्या खात्यांत चार दशकां पयलीं ह्या प्रवासाची सुरवात करतना हजार – बाराशें रुपयाय नाशिल्ले, तीच संघटना आयज क्रिकेटींतलें खंयचेंय आव्हान स्विकारपाक तयार आसा. तेन्नाच गोंयच्या क्रिकेटीक बरो फुडार आसा अशें कोणाकूय दिसचें. गोंयाक रणजी दर्जो म्हणजे भारतीय किक्रेट नियामक मंडळाची मान्यताय मेळत सावन फाटल्या चाळीस वर्सांत पयलेच फावट गोंय क्रिकेट संघटनेच्या कार्यकारी मंडळाचो वांगडी म्हणून आनी उपरांत पत्रकार म्हणून हांव गोंयच्या क्रिकेट नियामक मंडळान केल्ल्या वाटचालीचो प्रत्यक्ष साक्षीदार जावन आसा.
गोंय क्रिकेटीचो चार दशकांचो प्रवास उतार-चढावांनी भरिल्लो आसा हें हांव मान्य करूनय आतां आमची क्रिकेट थीर जावपाक लागल्या आनी ते फाटभुंयेर आयोजीत केल्लो हो ‘यशोगाथा’ सुवाळो खूब कितें सांगता. गोवा क्रिकेट असोसिएशनाक सध्या अर्थीक अडचणीचो त्रास जायना हें अशा कार्यावळींतल्यान स्पश्ट जालें आनी गोंय क्रिकेटीच्या बऱ्या फुडारा खातीर व्हड येवजण्यो घेवन येवपा विशीं जीसीएचे कार्यकारी मंडळ खूब सकारात्मक आशिल्ल्यान फुडल्या काळांत तांचे कडल्यान खूब अपेक्षा करूं येता.
‘यशोगाथा’ कार्यावळींत फाटल्या दोन-तीन वर्सांत संघटणेन केल्ल्या बऱ्या वावराची कल्पना सगल्यांकूच आयली. गोंय रणजी पंगडान फाटल्या वर्सा प्लेट गटांत केल्ली तेजस्वी कामगिरी आनी एलिट गटांत परतून प्रवेश, तशेंच बायलां पंगडाची उंचेली कामगिरी निश्चीतपणान समाधानकारक आसा, पूण कामगिरींत सुसंगती दवरपाचेर मुखेल लक्ष दिवपाची गरज आसा. वेगवेगळ्या पिरायेच्या गटांतल्या यशस्वी पंगडांक आनी खेळगड्यांक आकर्शक इनामां दिवन तांकां प्रोत्साहन दिवपा खातीर केल्लो वावरय तोखणायेचो आसा. गोंयचे क्रिकेटीच्या उज्ज्वल फुडारा खातीर अध्यक्ष विपुल फडके, सचीव शांबा देसाय आनी कोषाध्यक्ष दया पागी ही त्या मानान युवा टीम यत्न करता, हें ठळकपणान दिसून आयलें. हें खरे आसलें तरी तांकां ते खातीर अजूनय खूब कितें करपाची तयारी दवरची पडटली.
रोहन देसाय आयज भारतांतल्या क्रिकेट नियामक मंडळाचे संयुक्त सचीव आशिल्ल्यान आतां जीसीए कडेन कागाळ करपाकूय सुवात ना. कुबेराकूय फाटल्यान उडोवन सध्या भारतीय क्रिकेट नियामक मंडळाचें भांडार भरपूर प्रमाणांत व्हांवतना गोंय क्रिकेट असोसिएशनाक ताचो फायदो जावप सभावीक. तेन्ना गोंयांत आंतरराष्ट्रीय दर्जाचें क्रिकेट स्टेडियम बांदपाक कितें अडचणी आसात हो प्रस्न उप्रासता? खरो प्रस्न म्हणल्यार थळावें सरकार, आनी खास करून मुख्यमंत्री डॉ. प्रमोद सावंत हांचो वरदहस्त माथ्यार आसतना स्टेडियमाचें घोडें खंय पेंड खाता हो खरो प्रस्न आसा. निमाणी आंतरराष्ट्रीय क्रिकेट मॅच गोंयांत जाल्ली तें वर्स याद करपा खातीर मेंदू ताणून धरचो पडटा जाल्यार ही बऱ्याचीं लक्षणां न्हय. गोंयांत आंतरराष्ट्रीय क्रिकेट मॅच खेळपाक पंदरा ते सोळा वर्सां जालीं, हें सांगतना क्रिकेटीचो सगल्या पांवड्यांचेर आमी उदरगत केली, तरी स्टेडियम नाशिल्ल्यान ताचें समर्थन करपाक मेळना. गोंय क्रिकेट असोसिएशनाचे यशोगाथेक लागून उमेद येवप सभावीक, पूण गोंयांत असो अत्याधुनीक आंतरराश्ट्रीय क्रिकेट स्टेडियम बांदना तो मेरेन निदान ही येसस्वी कथा अपूर्ण उरतली. असलो आंतरराष्ट्रीय दर्जाचो स्टेडियम गोंय खातीर काळाची गरज आसा आनी हे खातीर सगळ्या पांवड्यार यत्न करचे पडटले. सध्या जीसीएंत मतभेद नात अशें म्हणप धाडसाचें थारतलें तरी ‘यशोगाथा’ कार्यावळींत ताची झलक दिसूंक नाशिल्ल्यान म्हाका खोस जाली.
गोंय क्रिकेट आयज ज्या स्थानाचेर आसा ते खातीर जायत्या जाणांनी योगदान दिलां. आयोजकांनी यशस्वी कार्यावळींत आदलो अध्यक्ष प्रशांत जोशीक ‘लायफ टायम अचीवमेंट’ पुरस्कार भेटोवन तोखणायेचें काम केलां. गोंयचे क्रिकेटीचे उदरगतींत आदले अध्यक्ष दयानंद नार्वेकार हांचें योगदान न्हयकारूंक जायना. तांकांय जीसीए लायफटायम अचीवमेंट अॅवॉर्ड जाहीर जाल्लो, पूण कांय कारणांक लागून ते हाजीर रावंक शकले नात. अजून जायतीं नांवां सांगूंक मेळटात आनी गोंय क्रिकेट संघटनेक ताची जाणीव नासतली अशें म्हणूंक मेळचें ना. तांकां ताची दखल घेवची पडटली.
प्रशांत जोशी हांणी आपल्याक मेळिल्ल्या सन्मानाचेर उलयतना म्हणलें, चाळीस वर्सां आदीं आयज उबो आशिल्ल्या क्रिकेट मनोऱ्याची बुन्याद घाली, ज्या असंख्य अडचणींचो पाढो वाचलो हें बरें जालें. 1985 वर्सा गोंयाक रणजीचो दर्जो मेळ्ळो तेन्ना हांवूय जीसीए कार्यकारी मंडळाचो एक वांटो आशिल्लो, देखून हाची म्हाका पुराय जाणविकाय आसा. केन्ना केन्नाय, निधीच्या उणावाक लागून खेळगड्यांक दिसपट्टो भत्तो दिवप शक्य नाशिल्लें. आयज ती परिस्थिती ना. दरवर्सा क्लबांक दिल्लें दरेकीं तीन लाखांचें अनुदान पळयल्यार आमच्या क्रिकेटीच्या दर्ज्यांत आनीक सुदारणा करपाक वाव आशिल्लो अशें म्हणूं येता. मेळिल्लें अनुदान सोडल्यार जीसीए कडल्यान आनीक खूब कितें दिवपाचें काम चालू आसा. अनुदान फकत क्रिकेट खातीर वापरतात हाचेरय लक्ष दिल्यार खूब कितें साध्य करूं येता. ‘यशोगाथे’न गोंयच्या क्रिकेट क्षेत्राक चड उमेद येतलो हातूंत दुबाव नासलो तरी तातूंतल्यान क्रिकेट स्टेडियम बांदल्यार दुदांत साकर पडटली. गोंयाक आयज ताचीच गरज आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
