भांगरभूंय | प्रतिनिधी
कृती दळान केली कला अकादमीची पळोवणी
पणजी: वातानुकूलीकरण यंंत्रणा (एसी) तशेंच नव्यान केल्ल्या स्टेजीचेर कृती दळाच्या कांय वांंगड्यांंनी असमाधान उक्तायलां. दीनानाथ मंंगेशकार सभाघरांतली स्टेज आतांचे तुळेंत पयली दर्जेदार आशिल्ली, अशें कांय जाणांंचे मत आसा. नुतनीकरण केल्ल्या कला अकादमीची सोमारा कृती दळान पळोवणी केली. समितीचे वांगडी परतून पळोवणी करतले तशेंच बसकेंत चर्चा जातली, उपरांतूच निश्कर्श काडप शक्य जातलें अशें कृती दळाचे अध्यक्ष विजय केंकरे हांंणी सांगलें.
कला अकादमीचें बांदकाम, ध्वनी यंत्रणा, एकोस्टिक्स, स्टेज तशेंच सगल्या रुमांची कृती दळाच्या वांगड्यांंनी पळोवणी केली.
कला अकादमीच्या नुतनीकरणाचेर 50 कोटीं परस चड पयशे खर्च जाल्यात. इतले पयशे खर्च करून लेगीत कला अकादमीची ध्वनी यंत्रणा पयलीं भशेन ना. तातूंत दोश आसा. नुतनीकरणा उपरांत पावसांत उदक झिरपुपाचे प्रकार जाले. कार्यावळीं खातीर कांय जाणांक भायल्यान ध्वनी यंत्रणा हाडची पडली. कला अकादमीचे स्थिती विशीं कलाकार तशेंच सामान्य लोक समाधानी नात. नुतनीकरणाच्या कामांत भ्रश्टाचार जाल्ल्याचो आरोप विरोधी पक्षां सयत कलकारांनी केला.
कला अकादमीच्या एकंदर स्थितीची तज्ञां वतीन चवकशी करपाची मागणी कला राखोण मंचान केल्ली. मागणे उपरांत सप्टेंबर सोंपपाक सरकारान कलाकार विजय केंकरे हांच्या फुडारपणा खाला कृती दळाची स्थापणूक केली. भौशीक बांदकाम खात्याचे मुखेल अभियंते संतोष म्हापने, तोमाझीन कार्दोझ, विलियम फर्नांडीस, प्रवीण गांवकार, देविदास आमोणकर, फ्रान्सीस कुएलो, मृणाल वाळके ह्या सगल्यांनी सोमारा पळोवणी केली.
कृती दळ पळोवणी करून तज्ञांचो सल्लो घेवन सरकाराक अहवाल सादर करतलो. अहवाला प्रमाण सरकार फुडली कारवाय करतलें. हाका लागून कृती दळाचेपळोवणेक म्हत्व आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
