भांगरभूंय | प्रतिनिधी
पणजीः इफ्फींत मास्टरक्लासींत ‘अॅकॅडमी कलर एन्कोडिंग सिस्टम’चे (एसीईएस) उपाध्यक्ष आनी एचडीआर कंटेंट वर्कफ्लोचे मुखेली जो अचीम जेल आनी ग्लोबल एसीईएस अॅडॉप्शनाचे मुखेली स्टीव टोबेंकीन हांणी मार्गदर्शन केलें.
ह्या वेळार जोआचीम जेल हांणी एसीईएस वर्कफ्लोचेर सादरीकरण केलें. एसीईएस पद्दतींत एक सामान्य रंग जागो कसो निश्चीत करतात, व्यापक रंग येवजण आनी गतिशील रंग येवजण कशी वेंचतात हें तांणी दाखयलें. तशेंच एसीईएस प्रणाली संबंदीत तंत्रज्ञानाचेर तांणी खोलायेन म्हायती दिली. तातूंत रेफरन्स रेंडरींग रुपांतर (आरआरटी), एसीईएस कलर एन्कोडिंग, एसीईएस आभासी उत्पादन, वॉल कॅलिब्रेशन, इंटर-कटिंग सामग्री हांचो आस्पाव आशिल्लो.
स्टीव टोबेंकिन हांणी एसीईएसचेर आपले विचार मांडटना सांगलें, अॅकॅडमी कलर एन्कोडिंग सिस्टीम (एसीईएस) डिजिटल इमेज फायलींचो आदान-प्रदान करपाक, रंग कार्यप्रवाह वेवस्थापन करपाक आनी वितरण आनी संग्रहा खातीर मास्टर तयार करपाक संवसारीक पांवड्यार मान्यताय मेळिल्लें मानक आसा. एसीईएस हो एसएमपीटीई मानक, उत्तम पद्दती आनी अत्याधुनीक रंग शास्त्राचो मेळ आसा जो शेंकड्यांनी वेवसायीक चित्रपट निर्मात्यांनी आनी रंग शास्त्रज्ञांनी अकादेमी ऑफ मोशन पिक्चर आर्ट्स अँड सायन्सेसाच्या सायन्स अँड टेक्नॉलॉजी कावंन्सिल खाला विकसीत केला.
सिनेमाटोग्राफींत एसीईएसचें म्हत्व स्पश्ट करतना स्टीवान सांगलें, चित्रपटाची निर्मिती, पोस्ट-प्रोडक्शन आनी साठवणूक ह्या काळांत उचेल्या पांवड्याचेर आपल्या उत्पदनाची रंगसंगती राखून, ही प्रणाली रंग वेवस्थापन प्रमाणीत आनी सोंपी करता. इतलेंच न्हय जाल्यार फुडारांत सांबाळपाक मेळटली अशी चित्रफीत तयार करपाक मजत करता.
एसीईसी म्हणल्यार कितें?
‘अकॅडमी कलर एनकोडिंग सिस्टिम’ (एसीईएस) ही खंयच्याय चित्रपट वा दूरचित्रवाणी कार्यावळीचे रंग सांबाळपाची पद्दत, तेच बरोबर रंगसंगतीचें वेवस्थापन आनी जतनाय घेवपाची पद्दत. कॅमेऱ्यांत एक दृश्य लॉक केल्ल्या खिणा सावन संकलन, व्हीएफएक्स, मास्टरींग, भौशीक सादरीकरण, संरक्षण आनी फुडाराची देखरेख ह्या सगळ्या गजालींची जतनाय घेतात. सृजनशील फायद्या वांगडाच एसीईएस, चित्रपटाची निर्मिती, निर्मिती उपरांत उप्रासपी प्रस्न, वितरण, फुटेज सांबाळपाचे सगळे प्रस्नय सोडयता. आयज डिजिटल कॅमेरे आनी वेगवेगळे फॉरमॅट आयिल्ल्यान तशेंच संवसारभर चित्रनिर्मिती व्हड प्रमाणाचेर सुरू आसतना, डिजिटल इमेजीच्यो फायली सांबाळपाचें काम हे पद्दतींतल्यान करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
