भांगरभूंय | प्रतिनिधी
19वे आशियायी खेळां सर्तीच्या णवव्या दिसा बायलांच्या 3000 मिटर स्टिपलचेज प्रकारांत भारतान रुप्या पदक आनी कांश्या पदक जिखलें. ते उपरांत भारताक बायलांच्या लांब उडी प्रकारांत सोजन इडापिल्लीन रुप्या पदक मेळोवन दिलें. तिणें 6 मिटर 63 सेंटीमिटर उडी मारून पदक आपल्या नांवाचेर केलें.
भारताच्या मिश्र रिले पंगडान दिसाचे अखेरेक मिश्र रिले 4 बाय 400 मिटर हातूंत कांश्या पदक जिखून दिलें. मुहम्मद अनस, जिस्ना मॅथ्यू, एेश्वर्या मिश्रा, सोनिया बैश्य, मुहम्मद अजमल हांचो आस्पाव आशिल्ल्या पंगडान 3 मिनटां 14.34 सेकंदांनी सर्त पुर्ण केली. अशे तरेन काल भारतान दोन रुप्या पदकां आनी पांच कांश्या पदकां सयत वट्ट सात पदकां जिखलीं.
स्टिपलचेज प्रकारांत भारताक पारुल चौधरीन रुप्या पदक आनी प्रितीन कांश्या पदक जिखलें. ह्या पदका सयत भारतान आशियायी खेळांत इतिहास घडयलो. आशियायी खेळांत बायलांच्या 3000 मिटर स्टिपलचेज प्रकारांत पयले खेपे खंयच्या देशाच्या दोन अॅथलिटांनी पोडियम फिनीश केलां.
काल दिसाची सुरवात तीन कांश्या पदकांनी जाली. स्पीड स्कॅटींग प्रकारांत भारताच्या बायलांच्या पंगडान कांश्या पदक मेळोवन दिलें. ते उपरांत दादल्यांच्या पंगडान लेगीत कांश्या पदक जिखलें. तशेंच टेबल टॅनिसांत बायलांच्या दोट्टी गटांत कांश्या पदक जोडलें.
टेबल टॅनीसांत सुतीर्था आनी अयहिका मुखर्जी हे जोडयेक दोट्टी गटांतले सेमी फायनलींत हार घेवची पडली, ताका लागून तांकां कांश्या पदकाचेर समाधान मानचें पडलें. भारताचे जोडयेक उत्तर कोरियाचे जोडयेन 4-3 अशा फरकान हारयली.
स्कॅटींगः दोन पदकां
भारतीय बायलांचे रोलर स्कॅटींग पंगडान कांश्या पदक जिखून उत्कृश्ट सुरवात केली. संजना, कार्तिका, हिरल आनी उरथ्य ह्या खेळगडयांचो आस्पाव आशिल्ल्या भारतीय पंगडान 3000 मिटर स्पीड स्कॅटींग रिले सर्तींत 4ः34ः861 अशी वेळ नोंदयली. ते उपरांत रोखडोच दादल्यांच्या पंगडान 3000 मिटर स्पीड स्कॅटींग रिले सर्तींत आर्यन पाल, आनंद कुमार, सिद्धार्थ राहुल कांबळे आनी विक्रम हांणी 4ः10ः128 अशी वेळ नोंदयत कांश्या पदक जिखलें.
टेबल टॅनीसः सुतिर्था-अयहिका जोडयेक कांशें
भारताचे सुतिर्था-अयहिका मुखर्जी हे जोडयेन भारताक टेबल टॅनीसाचे बायलांच्या दोट्टी गटांत कांश्या पदक जिखून दिलें. बायलांच्या दोट्टी टेबल टॅनीस खेळांत पयले खेपे भारतान पदक जिखलें.
भारताचे जोडयेक सेमी फायनलींत उत्तर कोरियाचे सुयॉंग चा आनी युगयॉंग पाक हे जोडये कडल्यान हार घेवची पडली.
तिरंदाजीः भारताक पदकांची आस्त
भारताच्या खेळगड्यांनी सगल्यात चार दादल्यांच्या आनी बायलांच्या प्रकारांत नॉकआवट मॅची जिखल्यो.
अभिषेक वर्मान अयमान अलावादी (सावदी अरेबिया) हाका 147-139 फरकान हारयलो. ओजस देवतालेन अहमद अलशट्टी (कुवेट) हाका 148-138 फरकान हारयलो. ज्योती सुरेखा वेन्नमान श्रीलंकेचे अनुराधा करुणारत्नेक 145-132 फरकान हारयली आनी अदिती गोपीचंद स्वामीन नेपाळाचे इमयुंग राय हिच्या आड 149-137 फरकान जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
