भांगरभूंय | प्रतिनिधी
ओमान पंगडाचें संवसारीक टी-20 क्रिकेट सर्तींतलें आव्हान सोंपलें. गट पांवड्या वयल्यो सुरवातीच्यो तीन मॅची ताणें व्हगडायल्यात. दुसरे वटेन स्कॉटलॅण्डान पांच गुणां सयत ब गटांतली पयली सुवात मेळयली. ओमाना आड स्कॉटलॅण्डान जैत जोडल्या उपरांत इंग्लंडाचो सुपर आठांत सुवात मेळोवपा विशीं दुबाव उप्रासला.
हांगाच्या सर व्हिव्हीयन रिचर्ड स्टेडियमाचेर ओमानान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 7 विकेटी व्हगडावन 150 धांवड्यो केल्यो. पूण, स्कॉटलॅण्डान 13.1 ओव्हरींनी 3 विकेटी व्हगडावन सहज जैत जोडलें.
टॉस जिखून पयलीं बॅटींग करपी ओमानाची सुरवात बरी जाली ना. ओपनर नसीम खुशी 10 धांवड्यो करून बाद जालो. मुखेली अकीब इलियास धांवगती वाडोवपाच्या यत्नांत बाद जालो. ताणें 6 बॉलांनी 16 धांवड्यो केल्यो. झीशान मकसूद लेगीत सवाय भितर तंबूंत परतलो. अशे तरेन ओमानान 100चेर 4 विकेटी व्हगडायल्यो. पूण, दुसरे वटेन ओपनर प्रतीक आठवले उबो आशिल्लो. ताका अयान खानाची साथ मेळ्ळी. दोगांयनी डाव मुखार व्हेलो. प्रतीकान 40 बॉलांनी 54 धांवड्यो केल्यो. अयानान 39 बॉलांनी नाबाद 41 धांवड्यांची खेळी केली. ताका लागून ओमानाक 150 मेरेन मजल मारप शक्य जालें. स्कॉटलॅण्डा वतीन सफायान शरीफान दोन विकेटी घेतल्यो.
मोखीचो फाटलाव करतना स्कॉटलॅण्डाचो ओपनर मायकल जोन्स 16 धांवड्यो करून बाद जालो. दुसरो ओपनर जॉर्ज मुनसेन आक्रमक बॅटींग करतना ब्रॅण्डन मॅकुलमा वांगडा मेळून 29 बॉलांनी 65 धांवड्यांची भागिदारी करून आपल्या पंगडाचें जैत सोंपें केलें. मुनसेन 20 बॉलांनी दोन चवके आनी चार सक्यांचे मजतीन 41 धांवड्यांची खेळी केली. तो बाद जाल्या उपरांत मॅकुलमान ओमानाच्या बॉलरांची बॉलींग फोडून काडली. ताणें 31 बॉलांनी नाबाद 61 धांवड्यो केल्यो. ताणें णव चवके आनी दोन सके मारले.
दरेक गटांतले दोन पंगड सुपर आठांत सुवात मेळयतले. स्कॉटलॅण्ड तीन मॅचींतल्यान पांच गूण घेवन पयले पयले सुवातेर पावलो. ताची नेट रनरेट लेगीत बरी आसा. ऑस्ट्रेलिया दोन मॅचींतल्यान दोन जैतां सयत चार गुणां सयत दुसरे सुवातेर घसरलो. नामिबिया दोन मॅचींतल्यान दोन गुणां सयत तिसरे सुवातेर आसा. इंग्लंड दोन मॅचींतल्यान एका गुणा सयत चवथे सुवातेर आसा. ताचो सुपर आठांतलो मार्ग कठीण जाला. ताका आपल्यो उरिल्ल्यो दोनूय मॅची व्हडा फरकान जिखच्यो पडटल्यो तशेंच हेर पंगडांच्या निकालांचेर लेगीत निंबून रावचो पडतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
