भांगरभूंय | प्रतिनिधी
संवसारीक वन डे क्रिकेट सर्तीचे पात्रताय फेरयेंतले सातवे मॅचींत स्कॉटलॅण्डान उमळशीक वाडोवपी मॅचींत निमाण्या बॉलाचेर आयर्लेण्डाक एके विकेटीन हारयलो. जाल्यार आनीक एके मॅचींत ओमान पंगडान युएई पंगडाक पांच विकेटींनी हारयलो. सर्तींतलें ताचें हें सेगीत दुसरें जैत थारलें.
मजगतीं, पयलीं बॅटींग करतना आयर्लेण्डान निर्धारीत 50 ओव्हरींनी 8 विकेटी वगडावन 286 धांवड्यो केल्यो. ताका जाप दितना स्कॉटलॅण्डान 9 विकेटी वगडावन निमाण्या बॉलाचेर जैत जोडलें.
स्कॉटलॅण्डाच्या मुखेल्यान टॉस जिखून पयलीं फिल्डिंग करपाचो निर्णय घेतलो. फास्ट बॉलर ब्रॅण्डन मॅकुलमान कारकिर्दींतलें सर्वोत्कृश्ट प्रदर्शन करतना पांच विकेटी घेतल्यो.
आयर्लेण्डा वतीन कर्टिस कॅम्फरान 120 आनी डॉकरेलान 69 धांवड्यांची खेळी केली. ह्या दोगां खेरीत अॅण्डी मॅकब्रायनान 32 धांवड्यांचें योगदान दिलें.
287 धांवड्यांचो फाटलाव करपी स्कॉटलॅण्डाची सुरवात बरी जाली ना. तांणी 152 धांवड्यांचेर 7 विकेटी वगडायिल्ल्यो. आयर्लेण्डाची मॅची वयली पकड घट्ट दिसताली. अशा वेळार मायकल लेस्कान 61 बॉलांनी नाबाद 91 धांवड्यांची खेळी करून पंगडाक जैत मेळोवन दिलें.
आयर्लेण्डा वतीन मार्क अडायरान तीन विकेटी घेतल्यो. जोशुआ लिटिल आनी जॉर्ज डॉकरेल हांणी दरेकी 2 विकेटी घेतल्यो.
मजगतीं, आनीक एके मॅचींत ओमानान युएई पंगडाक पांच विकेटींनी हारयलो. सर्तींतलें ताचें हें दुसरें जैत थारलें. पयलीं बॅटींग करतना युएई पंगडान 8 विकेटी वगडावन 227 धांवड्यो केल्यो. ओमानान 46 ओव्हरींनी 5 विकेटी वगडावन जैत जोडलें.
संवसारीक वन डे क्रिकेट सर्त ऑक्टोबर-नोव्हेंबर म्हयन्यांत भारतांत जातली. हातूंत 10 पंगड वांटो घेतले. आठ पंगडांचो निर्णय रॅंकिंगेच्या आदाराचेर जाला. दोन पंगडांची निर्णय हे पात्रताय फेरयेंतल्यान जातलो.
पात्रताय फेरयेंत वॅस्ट इंडिज आनी श्रीलंका ह्या पंगडां सयत 10 पंगडांनी वांटो घेतला. झिम्बाब्वेंत चालू आशिल्ले पात्रताय फेरयेंतले पयल्या दोन क्रमांका वयले पंगड संवसारीक सर्तीक पात्र जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
